Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Xikinmachti mokoneuan

 TLAMACHTIL 9

Jeremías nochipa otetlapoui itech Jehová

Jeremías nochipa otetlapoui itech Jehová

¿Tleka tlaltikpaktlakamej okualankej iuan Jeremías?

Jehová okimakixti Jeremías

Ualeua sekimej tlaltikpaktlakamej techpijpinatiaj noso kualanij touan ijkuak tikintlapouiaj itech Jehová. Nin uelis kichiuas ayakmo ma titetlapouikan itech toTajtsin Dios. ¿Se tonal ijkon yotikmachili?... Biblia techtlapouia itech se telpochtli tlen okitlasojtlaya Jehová, maski ijkon, ayakmo okinekiaya tetlapouis itech Jehová. Omotokayotiaya Jeremías. Okachi ma timomachtikan itech ye.

Ijkuak Jeremías okatka san se telpochtli, Jehová okilui ma kinmiluiti tlaltikpaktlakamej ayakmo ma kichiuakan tlamantli tlen amo kuali. Nin okatka oui uan Jeremías omomojtiaya. Ye okilui Jehová: ‘Amo nikmati tlen nikijtos. Ne ok nitelpochtli’. Maski ijkon, Jehová okilui: ‘Amo ximomojti. Ne nimitspaleuis’.

 Ik non, Jeremías opejki kinmiluia tlaltikpaktlakamej kintlajyouiltiskiaj tla amo okipatlayaj innemilis. ¿Timokuayejyekoa tlaltikpaktlakamej okichijkej tlen Jeremías okinmilui?... Amo. Yejuan okipijpinatijkej uan sapanoa okualankej iuan. ¡Noijki sekimej okinekiayaj kimiktiskej! ¿Tlen timokuayejyekoa okimachili Jeremías?... Ye omomojti uan okijto: ‘Ayakmo nitetlapouis itech Jehová’. ¿Melauak ayakmo otetlapoui?... Amo, ye amo ijkon okichi. Ye sapanoa okitlasojtlaya Jehová, ik non, nochipa otetlapoui itech Jehová. Uan pampa Jeremías nochipa ijkon okichi, Jehová okimakixti.

Se neskayotl, se tonal sekimej tlakamej akinmej amo yolkualmej okitlamotlakej Jeremías ijtik se koyoktli tlen okipiaya sokitl. Amo okipiaya tlakuali nion atl. Ninmej tlakamej okinekiayaj ompa kikauaskej Jeremías pampa ma miki. Maski ijkon, Jehová okipaleui, ¡okimakixti!

¿Tlen techmachtia ineskayo Jeremías?... Maski ualeua omomojtiaya ye nochipa otetlapoui itech Jehová. Ijkuak titetlapouis itech Jehová, miakej tlaltikpaktlakamej mitspijpinatiskej noso kualaniskej mouan. Te uelis tipinauas noso timomojtis. Maski ijkon, nochipa xitetlapoui itech Jehová. Ye nochipa mitspaleuis, ijkon ken okipaleui Jeremías.

XIKTLAJTOLTI ITECH MOBIBLIA

  • Jeremías 1:4-8; 20:7-9; 26:8-19, 24; 38:6-13