Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Xikinmachti mokoneuan

 TLAMACHTIL 8

Iyolikniuan Josías okatkaj yolkualmej

Iyolikniuan Josías okatkaj yolkualmej

¿Timokuayejyekoa oui pampa tikchiuas tlen kuali?... Miakej tlaltikpaktlakamej ijkon mokuayejyekoa. Biblia techtlapouia itech se chokotsin tlen omotokayotiaya Josías, oui okitak kichiuas tlen kuali. Maski ijkon, ye okipiaya kuali iyolikniuan akinmej okipaleuijkej. Ma timomachtikan okachi itech Josías uan iyolikniuan.

Itajtsin Josías okatka Amón ueyi tekiua itech Judá. Amón okatka sapanoa amo yolkuali uan okinueyichiuaya teotsitsintin. Ijkuak itajtsin Josías omikik, ye omochi ueyi tekiua itech Judá. Maski ijkon, ¡ye okipiaya san 8 xiuitl! ¿Timokuayejyekoa ye noijki okatka amo yolkuali ken itajtsin?... ¡Amo, ye amo ijkon okatka!

Sofonías okinmilui amo ma kinueyichiuakan teotsitsintin

Noijki ijkuak ye okatka san se chokotsin, okinek kitlakamatis Jehová. Ik non, ye okipejpenki mouikas iuan akinmej okitlasojtlayaj Jehová. Uan okipaleuijkej Josías pampa kichiuaskia tlen kuali. ¿Akinmej okatkaj iyolikniuan Josías?

 Se iyolikni okatka Sofonías. Sofonías okatka se teotlajtojki tlen okinmiluiaya akinmej ochantiayaj Judá tlen kinpanoskia tla kinueyichiuaskiaj teotsitsintin. Josías okikak Sofonías uan okiueyichiuaya Jehová uan amo teotsitsintin.

Okse iyolikni Josías okatka Jeremías. Yejuan san sekan omoskaltijkej. Yejuan sapanoa kuali omouikayaj, ik non, ijkuak Josías omikik Jeremías okijkuilo se tlakuikali kanin okijtoaya sapanoa okilnamikiaya. Jeremías uan Josías omopaleuijkej pampa kichiuaskej tlen kuali uan kitlakamatiskej Jehová.

Josías uan Jeremías omopaleuijkej pampa kichiuaskej tlen kuali

¿Tlen uelis timomachtis itech ineskayo Josías?... Noijki ijkuak ye okatka se chokotsin, okinekiaya kichiuas tlen kuali. Ye okimatiaya omonekiaya mouikas iuan akinmej kitlasojtlaj Jehová. Kuali xikinpejpena moyolikniuan akinmej kitlasojtlaj Jehová uan ma mitspaleuikan xikchiua tlen kuali.

XIKTLAJTOLTI ITECH MOBIBLIA

  • 2 Crónicas 33:21-25; 34:1, 2; 35:25