Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Xikinmachti mokoneuan

 TLAMACHTIL 7

¿Tikmachilia moselti tika uan timomojtia?

¿Tikmachilia moselti tika uan timomojtia?

Xikita chokotsin itech tlaixkopinal. Moita iselti kajki uan momojtia, ¿amo melauak? ¿Ualeua noijki ijkon timomachilia?... Nochtin ualeua ijkon timomachiliaj. Biblia techtlapouia itech iyolikniuan Jehová tlen noijki omomachiliayaj inselti uan omomojtiayaj. Se okatka Elías. Ma timomachtikan okachi itech ye.

Jezabel okinekiaya kimiktis Elías

Elías ochantiaya itech Israel miak xiuitl achto nesiskia Jesús. Acab, ueyi tekiua itech Israel amo okiueyichiuaya akin melauak toTajtsin Dios, Jehová. Acab uan isiua, Jezabel, okiueyichiuayaj teotsin Baal. Ik non, akinmej ochantiayaj itech Israel opejkej kiueyichiuaj Baal. Siuatl ueyi tekiua Jezabel amo yolkuali okatka uan okinekiaya kinmiktis nochtin akinmej okiueyichiuayaj Jehová, ¡noijki Elías! ¿Tikmati tlen okichi Elías?...

¡Elías ocholo! Ye uejka oyajki kanin tlauaki uan omotlati itech se koyoktli. ¿Tikmati  tleka ijkon okichi?... Kema, ye omomojtiaya. Maski ijkon, Elías amo omonekiaya momojtis. ¿Tleka? Pampa ye okimatiaya Jehová uelis kipaleuiskia. Achto Jehová yokiteititi ichikaualis Elías. Se tonal Jehová okinankili itlatlaujtilis Elías ijkuak okiualtitlanki tlitl itech iluikak. ¡Axkan Jehová noijki uelis kipaleuiskia Elías!

¿Ken Jehová okipaleui Elías?

Ijkuak Elías okatka itech koyoktli Jehová okitlapoui uan okitlajtlani: ‘¿Tlen nikan tikchijtok?’. Elías okinankili: ‘San ne ok nimitsueyichiua. San noselti niyetok uan nimomojtia pampa nechmiktiskej’. Elías okineltokaya oksekimej akinmej okiueyichiuayaj Jehová yokinmiktijkej. Maski ijkon, Jehová okilui Elías: ‘Amo, non amo melauak. Ok katej kanaj 7 mil tlaltikpaktlakamej akinmej nechueyichiuaj. Ximoyolchikaua. ¡Ok nikpia okseki tekitl pampa te!’. ¿Timokuayejyekoa Elías oyolpakik ijkuak okikak non?...

¿Tlen mitsmachtia tlen okipanok teotlajtojki Elías?... Amo keman ximokuayejyeko moselti tika nion ximomojti. Tikinpia moyolikniuan akinmej kitlasojtlaj Jehová uan mitstlasojtlaj. Noijki Jehová kipia miak chikaualistli, ¡uan nochipa mitspaleuis! ¿Mitsyolpaktia tikmatis amo keman moselti tiyetos?...

XIKTLAJTOLTI ITECH MOBIBLIA

  • 1 Reyes 19:3-18

  • Salmo 145:18

  • 1 Pedro 5:9