Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Xikinmachti mokoneuan

 TLAMACHTIL 6

David amo omomojti

David amo omomojti

¿Tlen tikchiua ijkuak timomojtia?... Uelis tio kanin monantsin uan motajtsin pampa ma mitspaleuikan. Maski ijkon, onka okse akin noijki uelis mitspaleuis. Ye okachi chikauak amo ken oksekimej. ¿Tikmati akin?... Kema, ye toTajtsin Jehová. Ma timomachtikan itech se telpochtli tlen Biblia kitokayotia David. Ye okimatiaya Jehová nochipa kipaleuiskia, ik non, ye amo omomojtiaya.

Ijkuak David ok okatka chokotsin, itatajuan okimachtijkej itech itlasojtlalis Jehová. Nin okipaleui David pampa amo momojtiskia maski okipanok seki tlamantli tlen temomojtijkej. Ye okimatiaya Jehová okatka iyolikni uan uelis kipaleuiskia. Se tonal, ijkuak David okinmaluijtoka sekimej iichkauan, ¡se ueyi león omotoki uan okiuikak se iichka itech ikamak! ¿Tikmati tlen okichi David? ¡Ye oyajki ikuitlapan león uan uelis tikijtoskej okimikti san ika imauan! Uan ijkuak se oso okinekiaya kikuas se iichka, ¡David noijki okimikti! ¿Tikmati akin okipaleui David?... Kema, Jehová.

Okse tonal David okiteititi okatka yolchikauak. Israelitas omoteuijtokaj iuan akinmej omotokayotiayaj filisteos. Se soldado filisteo okatka uejkapantik, ¡sapanoa uejkapantik! Omotokayotiaya Goliat. Nin tlakatl uejkapantik okinpijpinati soldados israelitas uan Jehová. Goliat okinmixnamik uan okinekiaya moteuis iuan soldados israelitas. Maski ijkon, israelitas omomojtiayaj moteuiskej iuan. Ijkuak David okikak nin, okilui Goliat: ‘¡Ne mouan nimoteuis! Jehová nechpaleuis, ¡uan ne nimitstlanilis!’. ¿Timokuayejyekoa David okatka yolchikauak?... Kema, sapanoa yolchikauak. ¿Mitspaktiskia tikmatis tlen opanok satepan?

David okikitski imatemeka uan 5 temej tlen petstikej, uan oyajki omoteuito uan tlakatl uejkapantik. Ijkuak Goliat okitak David ok telpochtli, ye okipijpinati David. Maski ijkon, David okilui: ‘Te tiuits ika se espada, maski ijkon, ¡ne nio moixpan  ika itoka Jehová!’. Ijkuakon ye okitlali se tetl itech imatemeka, omotlalo kanin okatka Goliat uan okikajkauili tetl. ¡Nin tetl okalak itech ixkuak! ¡Tlakatl tlen uejkapantik ouetski uan omikik! Filisteos melauak omomojtijkej uan totoka ocholojkej. ¿Ken se telpochtli ken David okitlanili se tlakatl uejkapantik?... ¡Jehová okipaleui pampa ye kipia okachi chikaualistli, amo ken tlakatl uejkapantik!

David amo omomojtiaya pampa okimatiaya Jehová okipaleuiaya

¿Tlen uelis timomachtiskej itech tlen okipanok David?... Jehová okachi chikauak amo ken nochtin. Uan ye moyolikni. Ik non, ijkuak timomojtis, ¡xikilnamiki Jehová uelis mitspaleuis pampa timoyolchikauas!

XIKTLAJTOLTI ITECH MOBIBLIA

  • Salmo 56:3, 4

  • 1 Samuel 17:20-54