Xikita nochi

Tlen kiualika

 TLAMACHTIL 16

Xikueyichiua toTajtsin Dios ken ye kineki

Xikueyichiua toTajtsin Dios ken ye kineki

1, 2. ¿Tlen moneki timotlajtlanis uan tleka?

KEN timomachtijtok Biblia, yitikmati miakej kijtoaj kiueyichiuaj toTajtsin Dios pero kichiuaj uan tlamachtiaj tlen ye kikokolia (2 Corintios 6:17). Ik non, Jehová technauatia ma tikkauakan religión tlen amo melauak noso “weyi Babilonia” (Apocalipsis 18:2, 4). ¿Tlen tikchiuas? Tisejse moneki tikpejpenaskej tlen tikchiuaskej uan moneki ma timotlajtlanikan: “¿Nikneki nikueyichiuas toTajtsin Dios ken ye kineki noso ok nikchijtos ken ne nikneki?”.

2 Kuali tlen otikchi tla yotikka religión tlen amo melauak noso yotikijto ayakmo tikneki ompa tiyetos. Pero xamo ok tikneki tikchiuas seki tlamantli noso seki costumbres tlen ompa pouij. Axkan timomachtiskej seki iluitl tlen ompa kichiuaj uan tikitaskej tleka moneki ma tikinmitakan ken Jehová kinmita.

¿KUALI MA TIKINUEYICHIUAKAN TEOTSITSINTIN UAN MA TIMOTLATLAUJTIKAN PARA MA KINPALEUIKAN AKINMEJ YOIXPOLIKEJ?

3. 1) ¿Tleka sekimej kitaj oui ayakmo kiueyichiuaskej toTajtsin Dios ika teotsitsintin? 2) ¿Tlen kijtoa Biblia itech teotsitsintin?

3 Sekimej yiuejkika kipiaj inkalijtik teotsitsintin uan altares kanin kijtoaj kiueyichiuaj toTajtsin Dios. Tla ijkon otikchiuaya, xamo oui tikita noso amo kuali timomachilia ayakmo tikintekitiltia ijkuak tikueyichiua toTajtsin Dios. Pero xikilnamikto ye techmachtia ken kineki ma tikueyichiuakan. Biblia kiyekijtoa Jehová  amo kipaktia ma tikintekitiltikan teotsitsintin ijkuak tikueyichiuaj (xiktlajtolti Hechos 17:29, 30; Salmo 115:4-8; Isaías 42:8; 1 Juan 5:21).

4. 1) ¿Tleka amo timotlatlaujtiaj inpatka akinmej yoixpolikej? 2) ¿Tleka Jehová okinnauati israelitas amo ma motlapouikan iuan akinmej yoixpolikej?

4 Xamo sekimej kichiuaj costumbres porque kineltokaj ijkon kinpaleuiaj akinmej yoixpolikej uan noijki kitlatlaujtiaj toTajtsin Dios ma kinpaleui. Noijki kitemoaj ken kinyolpaktiskej uan kinmiluiaj ma kinpaleuikan pero yotimomachtijkej non amo kuali. Akinmej yoixpolikej ayakmo techpaleuiaj nion techtlajyouiltiaj, amo kanaj yoltokej. Amo kuali ejekamej tlajtoaj ken akinmej yoixpolikej para ma tikneltokakan uelis inmiuan timotlapouiskej pero non techijtlakos. Ik non, Jehová okinnauati israelitas amo ma motlapouikan iuan akinmej yoixpolikej uan amo ma kichiuakan itlaj tlen kinekij amo kuali ejekamej (Deuteronomio 18:10-12; xikita nota 26 uan 31).

5. ¿Tlen mitspaleuis ayakmo xikchiua tlen toTajtsin Dios amo kipaktia?

5 ¿Tlen mitspaleuis ayakmo xikintekitilti teotsitsintin uan ayakmo tikchiuas costumbres inpatka akinmej yoixpolikej? Xiktlajtolti Biblia uan ximokuayejyeko ken kita Jehová non tlamantli. Ye kitlajyaltia (Deuteronomio 27:15). Nochipa xiktlatlaujti Jehová ma mitspaleui ximokuayejyeko ken ye mokuayejyekoa, ijkon tikueyichiuas ken ye kineki (Isaías 55:9). Jehová mitspaleuis xikkaua nochi tlen poui itech religión tlen amo melauak.

¿KUALI MA TIKCHIUAKAN NAVIDAD?

6. ¿Tleka miakej opejkej kiiluichiuiliaj Jesús 25 de diciembre?

6 Miakej iluichiuaj itech Navidad porque kineltokaj  ijkuakon oneski Jesús. Pero Navidad poui itech religión tlen amo melauak. Se amochtli kijtoa akinmej ochantiayaj Roma uan tlen amo okitekichiuiliayaj toTajtsin Dios, okijtoayaj 25 de diciembre onesiaya tonaltsin, ik non, oiluichiuayaj. Teopixkej okinekiayaj miakej ma kineltokakan Cristo. Ik non, opejkej kiiluichiuiliaj Jesús 25 de diciembre maski ye oneski okse tonal (Lucas 2:8-12). Imachtijkauan Jesús amo okichiuayaj Navidad. Se amochtli tlen itoka Los orígenes sagrados de las cosas profundas, kijtoa itech 200 xiuitl satepan ijkuak okimiktijkej Jesús, “amikaj okimatiaya uan amikaj okinekiaya kimatis keman oneski Jesús”. Opanok 300 xiuitl ijkuak okimiktijkej Jesús uan opejki kichiuaj Navidad.

7. ¿Tleka akinmej melauak kichiuaj ken Cristo amo kichiuaj Navidad?

7 Miakej kimatokej ken opejkej kichiuaj Navidad uan costumbres tlen kichiuaj itech non iluitl, ken ijkuak san sekan tlakuaj uan motlatliokoliaj. Ompa Inglaterra uan okseki altepemej tlen katej Norteamérica, otlanauatijkaj amikaj ma iluichiua itech Navidad porque non iluitl okichiuayaj akinmej amo okatkaj itekipanojkauan toTajtsin Dios. Okintlajyouiltiayaj nochtin tlen oiluichiuayaj. Pero satepan oksepa opejkej kichiuaj Navidad. ¿Tleka akinmej melauak kichiuaj ken Cristo amo kichiuaj Navidad? Porque kinekij kiyolpaktiskej toTajtsin Dios.

¿KUALI MA TIILUICHIUAKAN IJKUAK TIKAJXITIAJ XIUITL?

8, 9. ¿Tleka akinmej okichiuayaj ken Cristo amo oiluichiuayaj ijkuak okajxitiayaj xiuitl?

8 Miakej noijki iluichiuaj ijkuak kajxitiaj xiuitl. ¿Moneki ijkon iluichiuaskej akinmej kichiuaj ken Cristo? Biblia kijtoa san akinmej amo okiueyichiuayaj Jehová ijkon oiluichiuayaj (Génesis 40:20; Marcos 6:21). Ijkuak  okajxitiayaj xiuitl uan oiluichiuayaj, okinueyichiuayaj teotsitsintin. Ik non, akinmej okichiuayaj ken Cristo okitayaj non iluitl “ken itlaj tlen poui itech religión tlen amo melauak” (Amochtli Las cosas nuestras de cada día).

9 Yiuejkika romanos uan griegos okineltokayaj se espíritu ompa okatka ijkuak ikaj onesiaya uan non espíritu nochipa kimaluiskia. “Nin espíritu okineskayotiaya dios tlen okajxitiaya xiuitl ijkuak ikaj noijki okajxitiaya” (The Lore of Birthdays [Costumbres ijkuak ikaj okajxitiaya xiuitl]).

10. ¿Tleka akinmej kichiuaj ken Cristo amo iluichiuaj ijkuak kajxitiaj xiuitl?

10 ¿Timokuayejyekoa kipaktia Jehová iluimej tlen kichiua religión tlen amo melauak? (Isaías 65:11, 12). Amo, ye amo kipaktia. Ik non, akinmej melauak kichiuaj ken Cristo amo iluichiuaj ijkuak kajxitiaj xiuitl nion kichiuaj okse iluitl tlen kichiua religión tlen amo melauak.

¿MONEKI MA TIKMATIKAN KEN OPEJKEJ ILUIMEJ?

11. 1) ¿Tleka sekimej iluichiuaj? 2) ¿Tlen moneki okachi tikpatioitas?

11 Maski sekimej kimatokej ken opejki Navidad uan okseki iluimej, ok kichiuaj. Kijtoaj iluichiuaj para yetoskej iuan inkalchanejkauan. ¿Ijkon timokuayejyekoa? Amo tlajtlakoli tla tiknekij tiyetoskej iuan tokalchanejkauan. Jehová okintlali kalchanejkej uan kineki kuali ma timouikakan (Efesios 3:14, 15). Pero okachi moneki ma tikpatioitakan timouikaskej iuan Jehová uan amo tiknekiskej tikchiuaskej tlen poui itech religión tlen amo melauak para tikinyolpaktiskej tokalchanejkauan. Tlatitlanil Pablo okijto: “Yika, xikmatikah tlanón kipaktia n Toteko” (Efesios 5:10).

12. ¿Tlen iluimej amo kipaktia toTajtsin Dios?

 12 Miakej mokuayejyekoaj amo moneki tikmatiskej ken opejkej iluimej. Pero Jehová amo ijkon mokuayejyekoa. Ye amo kipaktia iluimej tlen opejkej itech religión tlen amo melauak nion iluimej tlen ika kinueyichiuaj sekimej noso inmialtepe. Akinmej ochantiayaj Egipto oiluichiuayaj uan ijkon okinueyichiuayaj dioses. Ijkuak israelitas okiskej Egipto, opejkej kichiuaj se iluitl tlen okichiuayaj ompa Egipto uan okijtojkej: ‘Tiiluichiuaskej para Jehová’. Pero Jehová okintlajyouilti ijkuak ijkon okichijkej (Éxodo 32:2-10). Tejuan moneki tikchiuaskej tlen okijto profeta Isaías: “¡Amo xikkitskikan itlaj tlen sokio!” (xiktlajtolti Isaías 52:11).

XITETLAKAITA IJKUAK TIKYEKIJTOS TLEN TIKNELTOKA

13. ¿Tlen uelis timotlajtlanis ijkuak ayakmo tikchiuas iluimej tlen amo kipaktia toTajtsin Dios?

13 Ijkuak ayakmo tikchiuas iluimej tlen amo kipaktia toTajtsin Dios, xamo timotlajtlanis: “¿Tlen nikchiuas tla akinmej inmiuan nitekiti nechtlajtlaniaj tleka amo nikchiua Navidad? ¿Tlen nikchiuas tla ikaj itlaj nechtliokolia itech Navidad? ¿Tlen nikchiuas tla nonamik kineki ma nikchiua se iluitl tlen toTajtsin Dios amo kipaktia? ¿Tlen nikchiuas para amo ma moyolkokokan nokoneuan ijkuak oksekimej iluichiuaj noso ijkuak yejuan kajxitiaj xiuitl?”.

14, 15. ¿Tlen tikchiuas tla ikaj mitsiluia xiyolpaki itech se iluitl noso itlaj mitstliokolia?

14 Moneki kuali ma timokuayejyekokan tlen tikijtoskej noso tlen tikchiuaskej. Tla ikaj mitsiluia xiyolpaki itech se iluitl, amo xikchiua ken amo otikkak, xiktlasojkamatili akin ijkon mitsiluia. Tla ikaj kineki kimatis  tleka amo tiiluichiua, uelis tikyekiluis pero xiktlakaita. Biblia kijtoa: “Nomotlajtol nochipa mateyolpakti iwa amo xikinsojsotlawakah, iwa xikmatikah kenomi nontlanankiliskeh ijkuak itla nomechtlajtlaniskeh” (Colosenses 4:6). Xamo uelis tikyekiluis mitspaktia tiyetos iuan oksekimej uan itlaj tikintliokolis pero amo tikchiua ijkuak ikaj kiiluichiuiliaj.

15 ¿Tlen tikchiuas tla ikaj itlaj mitstliokolia? Biblia amo kijtoa nochi tlen moneki tikchiuaskej pero kema kijtoa amitlaj ma kikuejso totlalnamikilis (1 Timoteo 1:18, 19). Xamo akin itlaj mitstliokolia amo kimati amo tiiluichiua. Noso xamo mitsiluis: “Ne nikmatok amo tiiluichiua nin tonal pero nikneki itlaj nimitstliokolis”. Tejuatsin tikijtos kox tikselis noso amo. Pero moneki timotlajtlanis kox mitskuejsos motlalnamikilis. Amo tiknekij tikchiuaskej itlaj tlen kichiuas ayakmo ma timouikakan iuan Jehová.

¿TLEN UELIS TIKINMILUIS MOKALCHANEJKAUAN?

Itekipanojkauan toTajtsin Dios sapanoa yolpakij.

16. ¿Tlen uelis tikchiuas tla mokalchanejkauan kinekij iluichiuaskej?

16 ¿Tlen uelis tikchiuas tla mokalchanejkauan kinekij iluichiuaskej? Amo inmiuan ximokualani. Xikilnamikto yejuan uelis kipejpenaskej tlen kichiuaskej. Xiktlakaita tlen yejuan kichiuaj ijkon ken tikneki ma kitlakaitakan tlen tikchijtok (xiktlajtolti Mateo 7:12). Pero ¿tlen tikchiuas tla mokalchanejkauan kinekij inmiuan xiyeto ijkuak iluichiuaskej? Achto tikijtos kox inmiuan tiyetos noso amo, xiktlatlaujti Jehová ma mitspaleui uan ijkon tikpejpenas tlen okachi kuali. Ximokuayejyeko tlen tikchiuas uan xikintlajtolti amatlajkuilolmej tlen tlajtoaj itech non tlamantli. Xikilnamikto: nochipa tikneki tikyolpaktis Jehová.

17. ¿Tlen tikchiuas para mokoneuan amo ma mokuayejyekokan amo yolpakij ken akinmej iluichiuaj?

 17 ¿Tlen tikchiuas para mokoneuan amo ma mokuayejyekokan amo yolpakij ken akinmej iluichiuaj? Uelis itlaj tikinchiuilis para ma moyolpaktikan. Noijki uelis itlaj tikintliokolis pero okachi ipati xikintlasojtla uan inmiuan xiyeto.

XIKUEYICHIUA TOTAJTSIN DIOS KEN YE KINEKI

18. ¿Tleka moneki ma timonechikokan?

18 Tla tiknekij tikyolpaktiskej Jehová, moneki tikkauaskej religión tlen amo melauak, costumbres uan okseki tlamantli tlen ompa poui. Noijki moneki ma tikueyichiuakan toTajtsin Dios ken ye kineki. ¿Ken tikchiuaskej? Moneki ma timonechikokan sejse semana (xiktlajtolti Hebreos 10:24, 25). Ijkuak timonechikoaj tikueyichiuaj toTajtsin Dios (Salmo 22:22; 122:1). Ompa noijki timoyolchikauaj (Romanos 1:12).

19. ¿Tleka moneki xikintlapoui oksekimej tlen yotimomachti itech Biblia?

19 Tla tikneki tikueyichiuas toTajtsin Dios ken ye kineki, moneki xikinmilui oksekimej tlen yotimomachti itech Biblia. Miakej motekipachoaj porque san kanin panotok tlen amo kuali. Xamo tikinmixmati akinmej ijkon momachiliaj. Xikinmilui nochi tlen toTajtsin Dios kichiuas. Tla timonechikos uan tikinmiluis oksekimej tlen yotimomachti itech Biblia, ayakmo tiknekis tikchiuas tlen kichiuaj itech religión tlen amo melauak nion costumbres tlen ompa kichiuaj. Sapanoa tiyolpakis uan Jehová mitsteochiuas tla timochijchikauas uan tikueyichiuas ken ye kineki (Malaquías 3:10).