Xikita nochi

Tlen kiualika

 TLAMACHTIL 19

Nochipa ximouika iuan Jehová

Nochipa ximouika iuan Jehová

1, 2. ¿Akin uelis techpaleuis?

MA TIKIJTOKAN kanaj tinejnenti uan peua tlamixtemi. Noijki tlatijtikuini uan chikauak kiaui. San niman tiktemoa kanin timokaltechos. ¡Kuali timomachilia ijkuak yitika kanin amo tisiauas!

2 Axkan noijki moneki ikaj ma techpaleui. Okachi momiaktilia tlen amo kuali. Ik non, xamo timotlajtlania: “¿Akin uelis techpaleuis?”. Se tlakatl tlen okijkuilo Biblia okijto: “Ne nikiluis Jehová: ‘Te tinopaleuilis uan tinotepamitl chikauak, noDios akin itech nitlaneltoka’” (Salmo 91:2). Jehová uelis techpaleuis ma titlaxikokan ijkuak titlajyouiaj uan techiluia satepan kuali tiyetoskej.

3. ¿Tlen moneki tikchiuaskej para ma techpaleui Jehová?

3 ¿Ken techmaluia Jehová? Techpaleuia ma tikixnamikikan san tlen ouijkayotl. Ye okachi chikauak amo ken akinmej kinekij techtlajyouiltiskej. Maski axkan uelis itlaj techpanos, satepan Jehová nochi kiyektlalis. Biblia kijtoa tlen moneki tikchiuaskej: “Xiyetokan itech itlasojtlalis toTajtsin Dios” (Judas 21TNM). Jehová techpaleuis ma tikxikokan ouijkayotl tla nochipa iuan timouikaj. ¿Tlen techpaleuis nochipa iuan timouikaskej?

MA TIKTLASOJTLAKAN JEHOVÁ KEN YE TECHTLASOJTLA

4. ¿Tlen otechmakak Jehová tlen kiteititia techtlasojtla?

4 Moneki tikajsikamatiskej Jehová sapanoa techtlasojtla  uan ijkon nochipa iuan timouikaskej. Ximokuayejyeko tlen yokichi topatka. Otechmakak tlaltikpak kanin onka miak xochitl kualtsin uan yolkamej. Noijki otechmakak miak tlamantli uelik uan atl chipauak. Uan ika Biblia Jehová noijki yotechmachti ken itoka uan ken iyelis. Pero okiteititi sapanoa techtlasojtla ijkuak okitemakak topatka iKone tlen okachi kitlasojtla (Juan 3:16). Ik non, satepan nochipa kuali tiyetoskej uan tiyolpakiskej.

5. ¿Ken kiteititia Jehová techtlasojtla?

5 Jehová techtlasojtla, ik non, okitlali se Tekiuajkayotl ompa iluikak. Ayakmo miak poliui uan non Tekiuajkayotl kitlajtlamis nochi tlen techtlajyouiltia uan nochi tlaltikpak kikopas se xochitlali. Ijkuakon, tiyetoskej ika yolseuilistli uan nochipa tiyolpakiskej (Salmo 37:29). Jehová techmachtia tlen moneki tikchiuaskej para kuali tiyetoskej. Noijki techyoleua ma tiktlatlaujtikan uan ye nochipa techkaki, ijkon kiteititia melauak techtlasojtla.

6. ToTajtsin Dios mitstlasojtla, ¿ken uelis tikteititis tiktlasojkamatilia?

6 ToTajtsin Dios mitstlasojtla, ¿ken uelis tikteititis tiktlasojkamatilia? Xikpatioita nochi tlen yomitsmakak. Axkan miakej amo motlasojkamatij ijkon ken opanoaya ijkuak Jesús nikan okatka. Se tonal okinpajti majtlaktli tlakamej tlen okipiayaj lepra pero san se okitlasojkamatili (Lucas 17:12-17). Tejuan tiknekij tikchiuaskej ken non tlakatl uan nochipa tiktlasojkamatiliskej Jehová.

7. ¿Ken moneki tiktlasojtlaskej Jehová?

7 Noijki moneki tikteititiskej tiktlasojtlaj Jehová. Jesús okinmilui imachtijkauan ma kitlasojtlakan Jehová  ika nochi inyolo, inmialma uan intlalnamikilis (xiktlajtolti Mateo 22:37). ¿Tlen kijtosneki non?

8, 9. ¿Ken tikteititiskej tiktlasojtlaj Jehová?

8 ¿San moneki tikijtoskej tiktlasojtlaj Jehová? Amo. Tla tiktlasojtlaj ika nochi toyolo, toalma uan totlalnamikilis, tikteititiskej ika tlen tikchiuaj (Mateo 7:16-20). Biblia kiyekijtoa tla tiktlasojtlaj, tiktlakamatiskej itlanauatiluan. ¿Oui tiktlakamatiskej? Amo porque itlanauatiluan Jehová “amo owi se kintlakita” (xiktlajtolti 1 Juan 5:3).

9 Tiyolpakij uan kuali tikatej ijkuak tiktlakamatij Jehová (Isaías 48:17, 18). Pero ¿tlen techpaleuis nochipa iuan ma timouikakan? Ma tikitakan.

¿KEN UELIS NOCHIPA TIMOUIKASKEJ IUAN JEHOVÁ?

10. ¿Tleka moneki okachi xikixmati Jehová?

10 ¿Ken opejki timouika iuan Jehová? Ijkuak opejki timomachtia Biblia, okachi opejki tikixmati uan opejki iuan timouika. Iuan timouikas yetoskia ken tlitl, moneki titlatlatijtoskej para amo seuis. Noijki ijkon moneki okachi xikixmati Jehová uan nochipa iuan timouikas (Proverbios 2:1-5).

Tla amo tiknekij ma seui tlitl, moneki tiktlatlatiliskej, noijki ijkon moneki ma tikchiuakan seki tlamantli para nochipa tiktlasojtlaskej Jehová.

11. ¿Ken mitspaleuis tla timomachtijtos Biblia?

11 Tlen timomachtijtias ajsis itech moyolo. Xikita ken omomachilijkej imachtijkauan Jesús ijkuak okinyekilui tlen kijtosnekij seki profecías. Imachtijkauan okijtojkej: “Satlawel otiyoltlatlayah keman otechtlapowijtiwalaya itech ojtli, noiwa kemi otechilijtiwalaya tlan kijtosneki itlajkuilol Dios” (Lucas 24:32).

12. ¿Tlen uelis kipanos tlasojtlalistli tlen tikpialiaj toTajtsin Dios?

12 Tlen Jesús okinmachti oajsik itech inyolo. Xamo  noijki sapanoa otiyolpakik ijkuak opejki tikajsikamati Biblia. Ijkon otikixmatki Jehová uan noijki opejki tiktlasojtla. Uan amo tikneki non tlasojtlalistli ma pojpoliui (Mateo 24:12).

13. ¿Tlen moneki tikchiuaskej para nochipa tiktlasojtlaskej Jehová?

13 Axkan yitimouika iuan toTajtsin Dios uan moneki timochijchikauas nochipa iuan timouikas. Ik non, moneki okachi tikixmatis ye uan Jesús. Noijki moneki timokuayejyekos tlen timomachtijtok uan tikchiuas itech monemilis (Juan 17:3). Ijkuak tiktlajtoltis uan timomachtis Biblia, ximotlajtlani: “¿Tlen nechmachtia nin itech Jehová? ¿Tleka moneki niktlasojtlas Jehová ika nochi noyolo uan noalma?” (1 Timoteo 4:15).

14. ¿Ken techpaleuis okachi ma tiktlasojtlakan Jehová tla timotlatlaujtiaj?

14 Tla tikpia se moyolikni, nochipa iuan timotlapouia.  Non kichiua okachi kuali ximouikakan. Noijki ijkon tla nochipa tiktlatlaujtiaj Jehová okachi kuali iuan timouikaskej (xiktlajtolti 1 Tesalonicenses 5:17). Ye techkauilia ma tiktlatlaujtikan uan non se ueyi tlateochiualistli. Pero moneki tiktlatlaujtiskej ika nochi toyolo (Salmo 62:8). Amo moneki san se tlamantli ma tikijtojtokan ijkuak timotlatlaujtiaj, moneki ma tikijtokan tlen melauak tikmachiliaj. Nochipa tiktlasojtlaskej Jehová tla timomachtiaj Biblia uan timotlatlaujtiaj ika nochi toyolo.

XIKINTLAPOUI OKSEKIMEJ ITECH JEHOVÁ

15, 16. ¿Ken mitspaleuis tla titetlapouis?

15 Tla tiknekij timouikaskej iuan Jehová, moneki tikintlapouiskej oksekimej tlen timomachtijtokej. Se ueyi tlateochiualistli titetlapouiskej (Lucas 1:74). Noijki Jesús ijkon okinnauati akinmej melauak kichiuaj ken ye. Ik non, moneki tinochtin ma tiktematiltikan tlen kichiuas iTekiuajkayo toTajtsin Dios. ¿Ijkon tikchijtok tejuatsin? (Mateo 24:14; 28:19, 20TNM).

16 Tlatitlanil Pablo okitaya tetlapouis ken itlaj “tlawel miak ipati” (2 Corintios 4:7). Moneki tikintlapouis oksekimej akin Jehová uan tlen kichiuas. Ijkuak titetlapouiaj tikueyichiuaj Jehová uan ye melauak kipatioita (Hebreos 6:10). Ijkuak titetlapouis, tikinpaleuis oksekimej iuan ma mouikakan uan noijki mitspaleuis okachi kuali iuan ximouika. Ijkon uelis nochipa tiyoltos uan noijki akinmej mitskakiskej (xiktlajtolti 1 Corintios 15:58). Amo onka okse tlamantli tlen kichiuas sapanoa xiyolpaki.

17. ¿Tleka moneki totoka ma titetlapouikan?

 17 Moneki totoka ma titetlapouikan. Biblia kijtoa san niman ma ‘tiktematiltikah itlajtol Diosʼ (2 Timoteo 4:2). Miakej moneki kikakiskej tlen kichiuas iTekiuajkayo toTajtsin Dios. Noijki Biblia kijtoa “iueyi tonal Jehová amo uejka kajki” uan “¡amo uejkauas!” (Sofonías 1:14; Habacuc 2:3). Amo miak poliui uan Jehová kitlajtlamis nochi tlen Satanás kiyekantok. Pero achto ijkon panos, moneki ma tikinnejmachtikan oksekimej para ma kitekichiuilikan Jehová.

18. ¿Tleka akinmej melauak tikchiuaj ken Cristo moneki ma timonechikokan?

18 Jehová kineki ma timonechikokan akinmej melauak tikchiuaj ken Cristo uan ijkon tikueyichiuaskej. Biblia kijtoa: “Matiktemolikah kenijki timosepampapalewiskeh, matimotlasojtlakah iwa matikchiwakah tlan kuali. Yika, nochipa matimololokah iwan oksikimeh tokniwah, amo matikchiwakah kemi sikimeh yomomatkeh amo kinekih mololoskeh. Tejwah moneki matimosepanyolchikawakah, iwa axa okachi por ya tikitah n tonati [...] ya walajsi” (Hebreos 10:24, 25). Moneki ma timochijchikauakan nochipa ma timonechikokan. Noijki ompa tinochtin timoyolchikauaj.

19. ¿Tlen mitspaleuis xikintlasojtla tokniuan?

19 Tla timonechikos, tikinmajsis akinmej iuan timouikas. Yejuan mitspaleuiskej xiktekichiuili Jehová. Tikinmixmatis tokniuan tlen tlatlamantli inyelis uan mochijchikauaj kitekichiuiliaj Jehová. Pero yejuan noijki tlajtlakolejkej ijkon ken tejuan uan noijki motlapololtiaj. Ik non, xikintlapojpolui ijkuak motlapololtiskej (xiktlajtolti Colosenses 3:13). Nochipa xikita tlen  kuali kichiuaj, ijkon tikintlasojtlas uan okachi kuali timouikas iuan Jehová.

“KATLEJ MELAWAK NEMILISTLE”

20, 21. ¿Tlen kijtosneki “katlej melawak nemilistle”?

20 Jehová kineki kuali ma yetokan akinmej iuan mouikaj. Biblia kijtoa satepan okachi kuali tiyetoskej.

Jehová kineki akinmej iuan mouikaj ma kipiakan “katlej melawak nemilistle”. ¿Tikselis tejuatsin?

21 Satepan ayakmo tiyoltoskej san 70 noso 80 xiuitl. Ijkuakon, ‘tiyolitoskeh nochipa’ itech xochitlali uan ayakmo timokokoskej, tikpiaskej yolseuilistli uan tiyolpakiskej. Biblia kijtoa non “katlej melawak nemilistle”. Jehová yokijto techmakas non yolilistli pero moneki ma timochijchikauakan tla tiknekij tikseliskej (1 Timoteo 6:12, 19, Itlajtol totajtzin Dios [NHY]).

22. 1) ¿Ken uelis tikseliskej “katlej melawak nemilistle”? 2) ¿Tleka maski timochijchikauaskej amo technamiki tikpiaskej yolilistli tlen amo keman tlamis?

22 ¿Ken uelis tikseliskej “katlej melawak nemilistle”? Moneki ‘matikchiwakah nochipa tlan kuali’ uan ‘matitlatemakakah’ (1 Timoteo 6:18). Non kijtosneki moneki ma tikchiuakan tlen timomachtiaj itech Biblia. Pero maski timochijchikauaskej amo technamiki tikseliskej yolilistli tlen amo keman tlamis. Non “tlatliokólili wits de Dios” uan ye kinmakas itekipanojkauan tlen yolmelajkej (Romanos 5:15). Jehová kineki ika nochi iyolo kinmakas itekipanojkauan non kualtsin tetliokolil.

23. ¿Tleka moneki xikchiua tlen kuali?

23 Ximotlajtlani: “¿Nikueyichiua toTajtsin Dios ken ye kineki?”. Tla tikita moneki itlaj tikpatlas itech monemilis, san niman xikchiua. Jehová techmaluia ijkuak itech titlaneltokaj uan timochijchikauaj  tiktlakamatiskej. Noijki kinmaluis itekipanojkauan tlen yolmelajkej itech itlamian tonalmej. Satepan kichiuas nochipa ma tiyoltokan itech xochitlali ijkon ken yokijto. Tla axkan tikchiua tlen kuali, nochipa tiyoltos.