Xikita nochi

Tlen kiualika

 TLAMACHTIL 6

¿Tlen kinpanoa akinmej ixpoliuij?

¿Tlen kinpanoa akinmej ixpoliuij?

1-3. 1) ¿Tlen motlajtlaniaj miakej ijkuak ikaj ixpoliui? 2) ¿Tlen kijtoaj miakej religiones kinpanoa akinmej ixpoliuij?

BIBLIA kijtoa “ayakmó yetos mikílistli” (Apocalipsis 21:4). Itech tlamachtil 5 otikitakej nochipa uelis tiyoltoskej porque Jesús topatka omotemakak. Pero axkan ok tiixpoliuij (Eclesiastés 9:5). Ik non, xamo timotlajtlaniaj: “¿Tlen kinpanoa akinmej ixpoliuij?”.

2 Okachi tiknekij tikmatiskej tla ixpoliui se tokalchanejka noso se toyolikni. Xamo timotlajtlaniaj: “¿Kanin kajki? ¿Kox techita? ¿Kanaj tlajyouijtok? ¿Uelis techpaleuis? ¿Oksepa tikitaskej?”.

3 Religiones tlatlamantli tlamachtiaj. Sekimej kijtoaj akinmej yolkualmej yauij iluikak uan akinmej amo yolkualmej yauij kanin nochipa tlatlatoskej. Oksekimej kijtoaj akinmej yomikej mokopaj espíritus uan yauij kanin katej oksekimej inkalchanejkauan tlen yoixpolikej. Oksekimej kijtoaj kinmixkomakaj uan oksepa yoltokej noso kinpatiliaj intlalnakayo. Noijki kijtoaj uelis mokopaskej okse tlaltikpaktlakatl noso se yolkatl.

4. ¿Tlen tlamachtiaj religiones?

4 Maski religiones tlamachtiaj miak tlamantli, nochtin yejuan kineltokaj itlaj ok yoltok ijkuak ikaj ixpoliui. Pero ¿kox melauak tlen kijtoaj?

¿TLEN KINPANOA AKINMEJ IXPOLIUIJ?

5, 6. ¿Tlen kinpanoa akinmej ixpoliuij?

5 Jehová kimati tlen kinpanoa akinmej ixpoliuij.  Itech Biblia ye techiluia ijkuak ikaj ixpoliui ompa tlami iyolilis. Ayakmo tlachia, ayakmo tlakaki nion mokuayejyekoa. Noijki ayakmo itlaj kilnamiki. Amo tikpiaj se espíritu tlen yoltok oksekan. *

6 Ueyi tekiua Salomón okijto akinmej yoixpolikej “ayakmo itlaj kimatij”, amo tetlasojtlaj nion tekokoliaj. Noijki okijto ‘amo onka tekitl nion uelis mokuayejyekoskej itlaj kichiuaskej nion onka tlamatilistli nion ixtlamatilistli ijtik mikakoyoktli’ (xiktlajtolti Eclesiastés 9:5, 6, 10). Salmo 146:4 kijtoa ijkuak ikaj ixpoliui, “poliui nochi tlen mokuayejyekoa”.

¿TLEN OKIJTO JESÚS ITECH MIKILISTLI?

Jehová otechchijchi uan kineki nochipa ma tiyoltokan nikan tlaltikpak.

7. ¿Tlen okijto Jesús itech mikilistli?

7 Jesús okipiaya se iyolikni tlen omotokayotiaya Lázaro pero se tonal oixpoliuik. Ijkuakon, Jesús okinmilui imachtijkauan: “Totlasoj Lázaro kochtok, iwa Ne nio nikijxititi”. ¿Tlen okinekiaya kijtos? Jesús noijki okiyekijto: “Lázaro yomikki” (Juan 11:11-14). Jesús okijto ijkuak ikaj ixpoliui yetoskia ken kochi. Amo okijto Lázaro okatka iluikak noso iuan ikalchanejkauan tlen yoixpolikej. Noijki amo okijto kox kanaj otlatlatoka noso kox omokopki okse tlaltikpaktlakatl noso se yolkatl. Ijkuak oixpoliuik yetoskia ken okochtoka. Okse tonal, Jesús noijki okiteititi ijkuak ikaj ixpoliui yetoskia ken kochi. Ijkuak okiyoliti itakotsin Jairo, okijto: “Takotsi [amo] omikki, sanwel kochi” (Lucas 8:52).

8. ¿Ken tikmatij toTajtsin Dios amo otechchijchi para ma tiixpoliuikan?

 8 ¿Okinekiaya Jehová ma tiixpoliuikan ijkuak otechchijchi? Amo. ¿Ken tikmatij? Jehová kuali okichijchi Adán uan Eva para amo keman ma mokokokan. Ye okitlali itech inyolo nochipa ma kinekikan yoltoskej (Eclesiastés 3:11). Nion se tlakatl noso siuatl kipaktia ma mokokokan ikoneuan uan ma ixpoliuikan. Noijki Jehová amo kipaktia ijkuak kita timokokoaj uan tiixpoliuij. Pero tla toTajtsin Dios kineki nochipa ma tiyoltokan, ¿tleka tiixpoliuij?

 ¿TLEKA TIIXPOLIUIJ?

9. ¿Tleka amo oui okatka tlen Jehová okinauati Adán uan Eva?

9 Itech xochitlali Edén, Jehová okilui Adán: “Uelis tikkuas itlakilo nochi kuauitl tlen onka itech xochitlali hasta tiixuis. Pero kuauitl tlen kichiua ma kimatikan tlen kuali uan tlen amo kuali, amo xikkua itlakilo porque tla tikkuas, non tonal timikis” (Génesis 2:9, 16, 17). Amo oui okatka tlen okinauati. Jehová okichijchi, ik non, san ye uelis kiluiskia tlen kuali uan tlen amo kuali. Tla Adán uan Eva kitlakamatiskiaj Jehová, kiteititiskiaj okitlasojkamatiliayaj nochi tlen okinmakak uan okinekiayaj ma kinnauati.

10, 11. 1) ¿Tlen okichi Satanás para Adán uan Eva amo ma kitlakamatikan Jehová? 2) ¿Tleka sapanoa otlajtlakolchijkej?

10 Pero Adán uan Eva amo okinekej kitlakamatiskej Jehová. Satanás okitlajtlani Eva: “¿Kox melauak Dios onamechilui amo xikkuakan itlakilo nochi kuauitl tlen kajki itech xochitlali?”. Eva okinnankili: “Uelis tikkuaskej itlakilo nochi kuauitl tlen onka itech xochitlali. Pero ijkuak toTajtsin Dios otlajto itech itlakilo kuauitl tlen kajki itlajkotia xochitlali, okijto: ‘Amo xikkuakan itlakilo, amo, amo xikkitskikan; tlamo nanmikiskej’” (Génesis 3:1-3).

11 Ijkuakon Satanás okilui Eva: “Melauak amo nanmikiskej. Porque Dios kimati ijkuak nankikuaskej, motlaposkej namoixtololouan uan nanyetoskej ken Dios, nankimatiskej tlen kuali uan tlen amo kuali” (Génesis 3:4-6). Satanás okinekiaya Eva ma kineltoka ineuian uelis kijtoskia tlen kuali uan tlen amo kuali. Noijki okikajkaya ijkuak okilui amo mikiskiaj tla amo kitlakamatiskiaj toTajtsin Dios, ik non, Eva okikua tlakilotl. Satepan okimakak inamik uan noijki okikua. Adán  uan Eva okimatiayaj Jehová okinmilui amo ma kikuakan tlakilotl. Ijkuak okikuajkej, okiteititijkej amo okinekiayaj kitlakamatiskej se tlanauatil tlen amo oui. Noijki okiteititijkej amo okitlakaitayaj inTajtsin. ¡Sapanoa otlajtlakolchijkej!

12. ¿Tleka sapanoa okiyolkoko Jehová tlen okichi Adán uan Eva?

12 Jehová melauak okiyolkoko tlen okichi Adán uan Eva. Okatka inTajtsin pero amo okitlakaitakej. Ma tikijtokan timochijchikaua kuali tikiskaltis motelpoch uan mochpoch. Pero satepan ayakmo kinekij mitstlakamatiskej uan san kichiuaj tlen yejuan kinekij, ¿amo timoyolkokos tla ijkon mitschiuiliskej?

Jehová okichijchi Adán ika tlali uan oksepa omokopki tlali.

13. ¿Tlen kijtosneki tlen Jehová okilui Adán?

13 Adán uan Eva amo otetlakamatkej, ik non, ayakmo uelis nochipa yoltoskiaj. Jehová okilui Adán: “Te titlali uan oksepa timokopas titlali” (xiktlajtolti Génesis 3:19). Ijkuak Jehová okijto Adán oksepa mokopaskia tlali, yetoskia ken amo keman okichijchi (Génesis 2:7). Ijkuak omikik ompa otlanki iyolilis.

14. ¿Tleka tiixpoliuij?

14 Adán uan Eva ok yoltoskiaj tla kitlakamatiskiaj Jehová. Pero amo okitlakamatkej, otlajtlakolchijkej uan satepan omikej. Tlajtlakoli ken se kokolistli tlen otechpanoltili  Adán uan Eva. Ik non, tiixpoliuij porque ijkuak tinesij tinochtin yititlajtlakolejkej (Romanos 5:12). Jehová amo okinekiaya ma tiixpoliuikan, ik non, Biblia kijtoa mikilistli ‘tokokolikni’ (1 Corintios 15:26).

BIBLIA TECHPALEUIA AMO MA TIKMAUILIKAN MIKILISTLI

15. ¿Tlen tlamantli ayakmo tikneltokaj?

15 Miakej religiones kijtoaj akinmej yoixpolikej oksekan yoltokej uan uelis tikinpaleuiskej. Ijkuak ikaj ixpoliui, ikalchanejkauan kitemakaj tomin para ma kichiuilikan misa noso para ma kichiuakan rezos. Pero Biblia kijtoa akinmej yoixpolikej amo kanaj tlajyouijtokej nion moyolkokoaj. Amo uelis inmiuan timotlapouiskej nion tikinpaleuiskej. Yejuan noijki amo uelis touan motlapouiskej, amo techpaleuiskej nion itlaj uelis techchiuiliskej. Ik non, amo ma tikinmauilikan. Tlen kijtoa Biblia techpaleuia amo ma tikneltokakan tlen tlamachtiaj okseki religiones.

16. ¿Tlen kijtoaj sekimej ijkuak ikaj ixpoliui?

16 Satanás kineki techkajkayauas ika tlen tlamachtiaj religiones, para ma tikneltokakan ok yoltokej akinmej yoixpolikej. Sekimej kijtoaj ijkuak ikaj ixpoliui oksekan yoltok. ¿Ijkon mitsmachtiaj itech moreligión noso mitsmachtiaj tlen kijtoa Biblia? Satanás kitekitiltia tlen amo melauak para amikaj kinekis kixmatis toTajtsin Dios.

17. ¿Tleka toTajtsin Dios amo kipaktia tlen tlamachtiaj miakej religiones?

17 Tlen tlamachtiaj miakej religiones amo kipaktia toTajtsin Dios porque kijtoaj tlen amo melauak.  Sekimej kijtoaj akinmej amo yolkualmej yaskej kanin nochipa tlatlatoskej. Pero non amo melauak. Jehová amo keman ijkon kichiua (xiktlajtolti 1 Juan 4:8). ¿Tlen tikijtoskia tla se tlakatl kimatlatia ikone ijkuak amo kitlakamati? Tikijtoskia amo yolkuali uan amo mitspaktiskia iuan timouikas. Satanás kineki ma tikneltokakan Jehová kichiua ken non tlakatl.

18. ¿Tleka amo moneki tikinmauiliskej akinmej yoixpolikej?

18 Sekimej religiones tlamachtiaj ijkuak tiixpoliuij timokopaj espíritus. Noijki kijtoaj moneki tikintlakaitaskej nonmej espíritus uan moneki tikinmauiliskej porque uelis techpaleuiskej noso techchiuiliskej tlen amo kuali. Miakej ijkon kineltokaj uan kinmauiliaj akinmej yoixpolikej, ik non, kinueyichiuaj. Pero amo ma tikinmauilikan akinmej yoixpolikej porque amitlaj kimachiliaj nion amitlaj kichiuaj. Jehová otechchijchi uan ye akin melauak toTajtsin Dios. Ik non, san ye moneki ma tikueyichiuakan (Apocalipsis 4:11).

19. ¿Ken techpaleuia tikmatiskej tlen kinpanoa akinmej ixpoliuij?

19 Tlen Biblia tlamachtia techpaleuia ayakmo ma tikneltokakan tlen kijtoaj religiones. Noijki Biblia techpaleuia okachi kuali ma tikajsikamatikan nochi tlen kualtsin kichiuas Jehová.

20. ¿Tlen tikitaskej?

20 Yiuejkika se itekipanojka toTajtsin Dios tlen omotokayotiaya Job okijto: “Tla se tlakatl ixpoliui, ¿uelis oksepa yoltos?” (Job 14:14). Itech okse tlamachtil tikitaskej tlen tlamachtia Biblia itech non tlamantli uan techyolchikauas.

^ párr. 5 Sekimej kijtoaj tikpiaj se espíritu noso se alma tlen ok yoltok ijkuak tiixpoliuij. Tla okachi tikneki tikmatis, xiktlajtolti nota 17 uan 18.