Xikita nochi

Tlen kiualika

 TLAMACHTIL 12

¿Ken uelis timouikas iuan toTajtsin Dios?

¿Ken uelis timouikas iuan toTajtsin Dios?

1, 2. ¿Akinmej inmiuan omouikak Jehová?

¿AKIN mitspaktiskia iuan timouikas? Xamo ikaj tlen mitsajsikamati, kichiua tlen mitspaktia uan kipia kuali iyelis.

2 Jehová kinpejpena sekimej tlen inmiuan mouika. Yiuejkika omouikak iuan Abrahán (Isaías 41:8; Santiago 2:23). Noijki omouikaya iuan ueyi tekiua David uan ye okiyolpaktiaya tlen okichiuaya (Hechos 13:22). Jehová noijki okijto ‘sapanoa okitlasojtlaya’ Daniel (Daniel 9:23).

3. ¿Tleka Jehová omouikaya iuan Abrahán, David uan Daniel?

3 ¿Tleka Jehová omouikaya iuan Abrahán, David uan Daniel? Jehová okilui Abrahán: “Otikkak notlajtol” (Génesis 22:18). Jehová mouika iuan akinmej yolyamankej uan kitlakamatij. Noijki uelis mouikas iuan nochtin akinmej chantij itech se altepetl. Ye okinyekilui israelitas: “Xiktlakamatikan notlajtol uan ne niyetos namoDios uan namejuan nanyetoskej noaltepe” (Jeremías 7:23). Tla tejuatsin tikneki timouikas iuan Jehová, noijki moneki tiktlakamatis.

JEHOVÁ KINPALEUIA AKINMEJ IUAN MOUIKAJ

4, 5. ¿Ken kinpaleuia Jehová akinmej iuan mouikaj?

4 Biblia kijtoa Jehová kitemoa ken “kinpaleuis akinmej ixpan kipiaj ajsitok inyolo” (2 Crónicas 16:9). Akinmej mouikaj iuan Jehová ye kinmiluia tlen kijtoa  Salmo 32:8: “Nimitsmakas ixtlamatilistli uan nimitsmachtis xikchiua tlen kuali. Ne nimitsmaluis”.

5 Kajki ikaj tlen techkokolia, kipia chikaualistli uan amo kineki ma timouikakan iuan toTajtsin Dios. Pero Jehová kineki techpaleuis (xiktlajtolti Salmo 55:22). Tiknekij iuan timouikaskej, ik non, tiktekichiuiliaj ika nochi toyolo uan maski titlajyouiaj, amo tikkauaj. Noijki itech titlaneltokaj ken okichi David, ik non, okijto: “Porque ye kajki noyekma uan amo keman nechmomojtiskej” (Salmo 16:8; 63:8). ¿Tlen kichiua Satanás para amo ma timouikakan iuan Jehová?

SATANÁS KIJTOA AMO MELAUAK TIKTLASOJTLAJ JEHOVÁ

6. ¿Tlen kijtoa Satanás?

6 Itech tlamachtil 11 otimomachtijkej Satanás okixnamik Jehová uan okijto san tlakajkayaua. Noijki okijto Jehová amo yolkuali porque amo okikauiliaya Adán uan Eva ma kipejpenakan tlen kuali uan tlen amo kuali. Amochtli Job kiteititia Satanás noijki kijtoa akinmej mouikaj iuan Jehová amo melauak kitlasojtlaj uan kitekichiuiliaj porque kinteochiua. Noijki kijtoa san akin uelis kichiualtis amo ma kitlakamati toTajtsin Dios. Pero tikitaskej Jehová okipaleui Job uan tlen techmachtia tlen okipanok.

7, 8. 1) ¿Tlen okijto Jehová itech Job? 2) ¿Tlen okijto Satanás?

7 ¿Akin okatka Job? Yikipia kanaj 3,600 xiuitl okatka non tlakatl. Jehová okijto amikaj okatka ken Job itech nochi tlaltikpak. Ye okitlakaitaya Jehová uan okikokoliaya tlen amo kuali (Job 1:8). Job kuali omouikaya iuan Jehová.

8 Satanás okijto Job okitekichiuiliaya toTajtsin Dios  san porque okinekiaya ma kipaleui. Satanás okilui Jehová: “¿Amo tikmaluijtok ye uan nochi ikalijtik uan nochi tlen ye kiyaualoa? Nochi tlen kichiua yotikteochi uan yomomiaktilijkej iyolkauan itech tlaltikpak. Pero axkan xikmelaua moma uan xikkixtili nochi tlen ye kipia uan melauak mitsuijuikaltis itech moixko” (Job 1:10, 11).

9. ¿Tlen okikauili Jehová ma kichiua Satanás?

9 Satanás okijto Job okitekichiuiliaya toTajtsin Dios porque okimakaya miak tlamantli. Ye okijto uelis kichiuaskia Job ayakmo ma kitekichiuili Jehová. Maski Jehová amo okipakti tlen okijto Satanás, okikauili ma kiyejyeko Job. Ijkon motaskia kox okitekichiuiliaya Jehová porque melauak okitlasojtlaya.

SATANÁS OKITLAJYOUILTI JOB

10. 1) ¿Tlen okichi Satanás para kitlajyouiltis Job? 2) ¿Tlen okichi Job?

10 Achto, Satanás okichi ma kinmichtekikan iyolkauan Job uan oksekimej ma mikikan. Noijki okinmiktijkej miakej itlakeualuan. Job okipolo nochi tlen okipiaya. Saiktlami, Satanás okichi ma mikikan majtlaktli ikoneuan ijkuak chikauak oejekak. Pero ye amo okika Jehová. Biblia kijtoa “Job amo otlajtlakolchi nion okitlajtlakolti toTajtsin Dios itech tlen amo kuali” (Job 1:12-19, 22).

Jehová okiteochi Job porque amo keman okika.

11. 1) ¿Tlen okseki tlamantli Satanás okichiuili Job? 2) ¿Tlen okichi Job?

11 Satanás okitemo ken okachi kitlajyouiltis Job. Okixnamik Jehová uan okijto: “Xikkitskili iomio uan itlalnakayo uan melauak mitsuijuikaltis itech moixko”. Ijkuakon, Satanás okichi chikauak ma mokoko (Job 2:5, 7). Pero Job okatka yolmelajki ixpan Jehová. Okijto  amo keman kikauaskia Jehová maski ixpoliuiskia (Job 27:5).

12. ¿Ken okiteititi Job amo melauak tlen okijto Satanás?

12 Job amo okimatiaya tlen okijto Satanás uan amo okimatiaya tleka sapanoa otlajyouijtoka. Ye omokuayejyeko Jehová okiyejyekojtoka (Job 6:4; 16:11-14). Pero amo okika Jehová. Ijkon okiteititi amo okitekichiuiliaya san porque okiteochiuaya. Ye iuan omouikaya porque okitlasojtlaya. Amo melauak nochi tlen okijto Satanás.

13. ¿Tlen okiseli Job porque okatka yolmelajki?

13 Maski Job amo okimatiaya tlen opanotoka iluikak ye okatka yolmelajki ixpan toTajtsin Dios uan ijkon okiteititi Satanás amo yolkuali. Jehová okiteochi Job porque amo keman okika (Job 42:12-17).

SATANÁS KIJTOA TEJUATSIN AMO MELAUAK TIKTLASOJTLA JEHOVÁ

14, 15. ¿Tlen kijtoa Satanás?

14 Tlen okipanok Job techmachtia miak tlamantli. Axkan Satanás noijki kijtoa tlen amo melauak itech itekipanojkauan toTajtsin Dios. Kijtoa kitekichiuiliaj san porque kinekij ma kinmaka miak tlamantli. Satanás okijto: “Akin kineki momakixtis kitemakas nochi tlen kipia” (Job 2:4). Okinekiaya kijtos nochtin kitekichiuiliaj Jehová porque kinekij ma kinteochiua. Amo okijto san Job ijkon okichiuaya. Yiuejkika oixpoliuik Job pero Satanás ok kijtoa miak tlamantli tlen amo melauak itech Jehová uan itekipanojkauan. Proverbios 27:11 kijtoa: “Nokone xiyeto ixtlamatki uan techyolpakti, ijkon niknankilis akin nechpinauia”.

15 Tejuatsin uelis tikpejpenas tiktekichiuilis Jehová,  iuan timouikas uan amo keman tikkauas. Ijkon tikteititis Satanás san tlakajkayaua. Para timouikas iuan toTajtsin Dios xamo monekis tikpatlas monemilis uan non tlen okachi moneki xikchiua. Satanás kijtoa tikkauas Jehová ijkuak titlajyouis. Satanás kichiua miak tlamantli para amo ma tiktlakamatikan Jehová. ¿Ken kichiua?

16. 1) ¿Tlen kitekitiltia Satanás para ayakmo ma tiktekichiuilikan Jehová? 2) ¿Ken uelis mitstsakuilis Diablo para ayakmo xiktekichiuili Jehová?

16 Satanás kitekitiltia miak tlamantli para ayakmo ma timouikakan iuan Jehová. Kichiua ken “se lío non kitemojtinemi akin kitlankokototsas iwa kikuas” (1 Pedro 5:8). Ik non, amo ximotlajtlachialti ijkuak mokalchanejkauan noso oksekimej mitsiluiskej ayakmo ximomachti Biblia uan amo xikchiua tlen tlamachtia. Xamo timokuayejyekos mitskokoliaj (Juan 15:19, 20). * Satanás ualeua mochiua “kemi se ángel non tsotlani” noso petlani. Ijkon kichiua para techkajkayauas uan ayakmo ma tiktlakamatikan Jehová (2 Corintios 11:14). Satanás kineki ayakmo ma tiktekichiuilikan Jehová, ik non, kineki ma timokuayejyekokan amo technamiki tiktekichiuiliskej (Proverbios 24:10).

XIKTLAKAMATI TLEN JEHOVÁ TECHNAUATIA

17. ¿Tleka tiktlakamatij Jehová?

17 Ijkuak tiktlakamatij Jehová tikteititiaj Satanás san tlakajkayaua. ¿Tlen techpaleuis ma titetlakamatikan?  Biblia kijtoa: “Moneki tiktlasojtlas Jehová moDios ika nochi moyolo uan ika nochi moalma uan ika nochi mochikaualis” (Deuteronomio 6:5). Tiktlasojtlaj Jehová, ik non, tiktlakamatij. Tla okachi tiktlasojtlaj, okachi tiknekiskej tikchiuaskej tlen ye technauatia. Tlatitlanil Juan okijkuilo: “Tejwah tiktenextiah tiktlasojtla Dios keman tikintlakitah itlanawatilwah, iwa amo owi se kintlakita” noso se kintlakamatis (1 Juan 5:3).

18, 19. 1) ¿Tlen tlamantli kijtoa Jehová amo kuali ma tikchiuakan? 2) ¿Ken tikmatij Jehová amo techtlajtlanilia itlaj tlen amo uelis tikchiuaskej?

18 Jehová kijtoa amo ma tikchiuakan seki tlamantli tlen amo kuali. Xikita recuadro “ Amo ma tikchiuakan tlen Jehová kikokolia”. Xamo tikijtos non tlamantli amo okachi tlajtlakoli. Pero ijkuak tikintlajtoltis textos uan timokuayejyekos tlen ompa kijtoa, tikajsikamatis melauak mitspaleuis, tla tiktlakamati tlen tlanauatia  toTajtsin Dios. Noijki xamo tikitas moneki ayakmo tikchiuas seki tlamantli. Uelis oui mitschiuilis tikkauas, pero tla ijkon tikchiuas, tikpias yolseuilistli uan tiyolpakis ijkon ken akinmej mouikaj iuan Jehová (Isaías 48:17, 18). ¿Ken tikmatij uelis tikpatlaskej tonemilis?

19 Jehová amo keman techtlajtlanilia itlaj tlen amo uelis tikchiuaskej (Deuteronomio 30:11-14). Ye melauak toyolikni, ualeua tejuan amo tikajsikamatij tlen tikmachiliaj pero Jehová kuali techixmati. Kimati tlen kuali tikpiaj itech toyelis uan tlen amo (Salmo 103:14). Tlatitlanil Pablo okijto: “ToTajtsin Dios yolmelajki uan amo kitekauilis ma namechyejyekokan hasta kanin amo uelis nantlaxikoskej, okachi kuali, ijkuak namechyejyekoskej ye namechmakixtis uan ijkon nantlaxikoskej” (1 Corintios 10:13TNM). Jehová techyolchikauas para tikchiuaskej tlen kuali uan ye techmakas “weletílistli [tlen] amo toaxka” para  tikixnamikiskej ouijkayotl (2 Corintios 4:7). Ijkuak Pablo otlajyoui Jehová okipaleui. Ik non, okijto: “Para nochi tlamantli nikpia chikaualistli itech akin nechmaka chikaualistli” (Filipenses 4:13TNM).

XIKCHIUA TLEN JEHOVÁ KIPAKTIA

20. ¿Tlen moneki tikchiuas uan tleka?

20 Tla tiknekij timouikaskej iuan Jehová amo san moneki tikkauaskej tlen ye kijtoa amo kuali. Noijki moneki tikchiuaskej okseki tlamantli (Romanos 12:9). Akin mouika iuan Jehová kichiua tlen ye kipaktia. Mochijchikaua kipias iyelis ken Jehová uan “tetlasojtla, kipia pakílistli, kipia yolsewílistli, nochi kixikoa, kuali tlakatl, [yolkuali], tlaneltokak, yolyamanki, kuali monawatia” (Gálatas 5:22, 23). Para tikmatis tlen kichiuaj akinmej mouikaj iuan toTajtsin Dios xiktlajtolti Salmo 15:1-5.

21. ¿Tlen mitspaleuis xikpia moyelis ken Jehová kipaktia?

21 ¿Tlen mitspaleuis xikpia moyelis ken Jehová kipaktia? Tla timomachtis tlen ye kineki. Ik non, mojmostla xiktlajtolti uan ximomachti Biblia (Isaías 30:20, 21). Tla ijkon tikchiuas, okachi tiktlasojtlas Jehová uan tiknekis tiktlakamatis.

22. ¿Tlen tikpiaskej tla tiktlakamatij Jehová?

22 Tikpatlas monemilis yetoskia ken tikmokixtilis motlaken tlen yotlajtlanki uan tikmotlalilis okse yankuik. Biblia kiyekijtoa: “Nomejwah yononkikajkeh tlan achto onomechyolijtlakoaya iwa yononmoyankuilijkeh. Pero axa Dios yonomechyankuili” (Colosenses 3:9, 10). Maski oui, Jehová mitsteochiuas tla tikpatla monemilis uan tiktlakamati (Salmo 19:11). Amo xiktlakamati Jehová san porque mitsteochiuas, xiktlakamati porque melauak tiktlasojtla. Ijkon tikteititis Satanás tlakajkayaua uan kuali timouikas iuan Jehová.

^ párr. 16 Non amo kijtosneki Satanás kinchiualtia sekimej ma mitstsakuilikan para ayakmo ximomachti Biblia. Pero Satanás ye “dios non kinawatijtok nin tlaltíkpaktli” uan Biblia kijtoa “iwa nochteh n tlaltikpaktlakah non amo kineltokah Dios kinnawatijtok n satanás”. Ik non, sekimej techiluiskej ayakmo ma tiktekichiuilikan Jehová (2 Corintios 4:4; 1 Juan 5:19).