Xikita nochi

Tlen kiualika

 TLAMACHTIL 14

¿Ken uelis yolpakiskej kalchanejkej?

¿Ken uelis yolpakiskej kalchanejkej?

1, 2. ¿Ken kineki Jehová ma yetokan kalchanejkej?

JEHOVÁ okinamikti achto tlakatl uan siuatl. Biblia kijtoa Jehová okichijchi siuatl uan okimakak Adán. Ye sapanoa oyolpakik uan okijto: “Axkan nin omitl itech noomiouan uan nakatl itech nonakayo” (Génesis 2:22, 23). Jehová kineki ma yolpakikan nochtin akinmej yomonamiktijkej.

2 Miakej kalchanejkej amo yolpakij. Pero Biblia kipia miakej principios tlen kinpaleuiaj kuali ma mouikakan uan ma yolpakikan (Lucas 11:28).

¿TLEN KINEKI TOTAJTSIN DIOS MA KICHIUA TLAKATL?

3, 4. 1) ¿Tlen moneki kichiuaskej tlakamej? 2) ¿Tleka moneki motlapojpoluiskej akinmej yomonamiktijkej?

3 Biblia kijtoa tlakatl moneki ma kitlasojtla isiua uan ma kitlakaita (xiktlajtolti Efesios 5:25-29). Moneki kiluis kitlasojtla. Noijki moneki ma kimalui uan amo ma kiyolkoko.

4 ¿Tlen moneki kichiuas tlakatl tla isiua motlapololtia? Biblia kinmiluia tlakamej: “Xiktlasojtlakah nomosiwa iwa amo san xikinmajwatokah” (Colosenses 3:19). Tlakamej, xikilnamiktokan namejuan noijki nanmotlapololtiaj. Noijki tla nankinekij toTajtsin Dios ma namechtlapojpolui, moneki nankitlapojpoluiskej namosiua (Mateo 6:12, 14, 15). Tla  akinmej yomonamiktijkej motlapojpoluiaj, melauak yolpakiskej.

5. ¿Tleka tlakatl moneki kitlakaitas isiua?

5 Jehová kineki tlakatl ma kitlakaita isiua, ma kimaka tlen moneki uan ma kajsikamati. Miak ipati ijkon ma kichiua, tla amo kitlasojtla isiua, xamo Jehová amo kikakis ijkuak motlatlaujtis (1 Pedro 3:7). Jehová amo san kinpatioita tlakamej uan siuamej amo. Ye kinpatioita nochtin akinmej kitlasojtlaj.

6. ¿Tlen kijtosneki ijkuak Biblia kijtoa tlakatl uan isiua “ayakmó ome, yej sanwel se”?

6 Jesús okiyekijto tlakatl uan isiua “ayakmó ome, yej sanwel se” (Mateo 19:6). Tlakatl uan isiua moneki nochipa san sekan yetoskej uan amo momekatiskej (Proverbios 5:15-21; Hebreos 13:4). Amo san intech moneki mokuayejyekoskej, moneki motekaskej iuan innamik (1 Corintios 7:3-5). Tlakatl moneki kilnamikis “amaka kikokolia ikuerpo, yej kimalwia iwa kitlakualtia”. Ik non, moneki kitlasojtlas isiua uan kiteititis ika tlen kichiua. Siuatl kineki ma yeto yolkuali inamik uan ma kimalui (Efesios 5:29).

¿TLEN KINEKI TOTAJTSIN DIOS MA KICHIUA SIUATL?

7. ¿Tleka moneki ikaj ma kiyekana kalchanejke?

7 Para kuali yetos se kalchanejke, moneki ikaj ma kiyekana. Biblia kijtoa itech 1 Corintios 11:3: “Cristo Ye n tlayákanki, itech nochi tlakatl non kitlakita. Iwa n [tlakatl] ye akin kiyakana isiwa, ijkó kemi Dios kinawatia Cristo”.

8. ¿Ken kiteititia se siuatl kitlakaita inamik?

8 Nochtin tlakamej motlapololtiaj. Pero ijkuak insiua  kintlakamati uan kinpaleuia, inkalchanejkauan kuali katej (1 Pedro 3:1-6). Biblia kijtoa: “Tesiwa noiwa makitlakita [inamik]” (Efesios 5:33). Pero ¿tlen kichiuas tla inamik amo momachtia Biblia? Moneki kitlakaitas maski amo momachtia. Biblia noijki kijtoa: “Siwameh, xiktlakitakah [namonamik]. Ijkó, non amo tlaneltokakeh, tlaneltokaskeh ijkuak nomechitaskeh kenijki nontetlakitah, iwa [amo] ok monekis xiktetlapowikah itlajtol Dios. Porke yejwah kitaskeh kenomi nonmoyekuikah iwa nonmotlakitah” (1 Pedro 3:1, 2). Tla siuatl kichiua tlen moneki, inamik kajsikamatis uan kitlakaitas tlen ye kineltoka.

9. 1) ¿Tlen uelis kichiuas siuatl tla amo mokuayejyekoa ken inamik? 2) ¿Tlen kijtoa Tito 2:4, 5 moneki kichiuaskej siuamej?

9 ¿Tlen uelis kichiuas siuatl tla amo mokuayejyekoa ken inamik? Uelis kiluis tlen ye mokuayejyekoa pero moneki kiyekiluis uan kitlakaitas. Ijkon okichi Sara ijkuak okilui Abrahán itlaj tlen amo okipakti. Jehová okilui Abrahán: “Xikkaki tlen mitsiluia” (Génesis 21: 9-12). Siuatl moneki kichiuas tlen kijtos inamik tla amo kixnamiki tlen kijtoa Biblia (Hechos 5:29; Efesios 5:24). Noijki moneki kinmaluis ikalchanejkauan (xiktlajtolti Tito 2:4, 5). Ijkuak inamik uan ikoneuan kitaskej ken kinmaluia uan kinpaleuia, okachi kitlakaitaskej uan kitlasojtlaskej (Proverbios 31:10, 28).

¿Ken kinpaleuia siuamej tlen okichi Sara?

10. ¿Tlen kijtoa Biblia ijkuak akinmej yomonamiktijkej moxeloaj noso mokajkauaj ixpan tekiuajkej?

10 Sekimej san niman moxeloaj noso mokajkauaj inmixpan tekiuajkej. Pero Biblia kijtoa “tesiwa amo makikajkawa [inamik]” uan “[tlakatl] amo makikajkawa isiwa” (1 Corintios 7:10, 11). Ualeua xamo monekis moxeloskej pero moneki kuali mokuayejyekoskej achto ijkon kichiuaskej. * ¿Uelis mokajkauaskej inmixpan tekiuajkej? Biblia kijtoa akinmej yomonamiktijkej uelis mokajkauaskej inmixpan tekiuajkej tla innamik momekatia (Mateo 19:9).

¿TLEN KINEKI TOTAJTSIN DIOS MA KICHIUAKAN TETAJMEJ?

Tlen okichi Jesús techmachtia tlen moneki ma tikchiuakan iuan tokalchanejkauan.

11. ¿Tlen moneki ma kichiuakan tetajmej?

11 Tetajmej, ximochijchikauakan xiyetokan iuan namokoneuan porque ijkon kuali momachiliskej. Pero okachi moneki xikinpaleuikan ma kixmatikan Jehová (Deuteronomio 6:4-9).

12. ¿Tlen moneki kichiuaskej tetajmej para kinmaluiskej inkoneuan?

12 Axkan tlanauatijtok Satanás uan okachi yomomiaktili tlen amo kuali. Sekimej kinekij itlaj kinchiuiliskej tokoneuan. Uelis ikaj kinchiualtis inmiuan  ma moteka. Sekimej tetajmej oui kitaj motlapouiskej itech non tlamantli iuan inkoneuan. Pero moneki kinnejmachtiskej uan kinmiluiskej ken momaluiskej para amitlaj ma kinchiuilikan. Tetajmej, moneki xikinmaluikan namokoneuan (1 Pedro 5:8). *

13. ¿Ken moneki tetajmej kinmachtiskej inkoneuan?

13 ¿Ken uelis tikinmachtis mokoneuan ma kichiuakan tlen kuali? Maski moneki tikinyektlalis, amo keman sapanoa xikinuiteki (Jeremías 30:11).  Amo xikinyektlali ijkuak tikualantok, tlamo tikinmiluis itlaj tlen kinyolkokos ken tikintsoponiliskia se espada (Proverbios 12:18). Xikinpaleui ma kajsikamatikan tleka moneki tetlakamatiskej (Efesios 6:4; Hebreos 12:9-11; xikita nota 30).

¿TLEN KINEKI TOTAJTSIN DIOS MA KICHIUAKAN KONEMEJ?

14, 15. ¿Tleka konemej moneki kintlakamatiskej intatajuan?

14 Jesús nochipa okitlakamatki iTajtsin maski ualeua oui okatka (Lucas 22:42; Juan 8:28, 29). Jehová kineki konemej ma kintlakamatikan intatajuan (Efesios 6:1-3).

15 Xamo tikita oui tikintlakamatis motatajuan. Pero xikilnamikto tla tikintlakamatis, Jehová uan motatajuan sapanoa yolpakiskej (Proverbios 1:8; 6:20; 23:22-25). *

¿Tlen kinpaleuis tokoneuan ma yetokan yolmelajkej ijkuak sekimej kinekiskej ma kichiuakan tlen amo kuali?

16. 1) ¿Tlen kichiua Satanás para sekimej ma kichiuakan tlen amo kuali? 2) ¿Tleka moneki timouikas iuan akinmej kitlasojtlaj Jehová?

16 Satanás uelis kintekitiltis akinmej iuan timouika uan oksekimej para xikchiua itlaj tlen amo kuali. Ye kimati san niman uelis tikchiuas tlen amo kuali tla mitschiualtiaj. Ijkon okipanok ichpoch Jacob tlen omotokayotiaya Dina. Ye omouikaya iuan akinmej amo okitekichiuiliayaj Jehová, ik non, sapanoa otlajyoui uan noijki ikalchanejkauan (Génesis 34:1, 2). Tla timouika iuan akinmej amo kitlasojtlaj Jehová, xamo mitsiluiskej xikchiua itlaj tlen amo kuali. Tla ijkon tikchiuas, sapanoa titlajyouis uan tikinyolkokos mokalchanejkauan  uan Jehová (Proverbios 17:21, 25). Ik non, moneki ximouika san iuan akinmej kitlasojtlaj Jehová (1 Corintios 15:33).

UELIS NANYOLPAKISKEJ

17. ¿Tlen moneki tikchiuaskej?

17 Ijkuak kalchanejkej kitlakamatij Jehová, amo kipiaj miak ouijkayotl. Ik non, tla tikpia mosiua, xiktlasojtla. Tla tikpia monamik, xiktlakaita, xikpaleui uan xikchiua tlen kijtoa Proverbios 31:10-31. Tla tikinpia mokoneuan, xikinmachti ma kitlasojtlakan toTajtsin Dios (Proverbios 22:6). Tla tikpia mosiua uan mokoneuan, kuali xikinyekana (1 Timoteo 3:4, 5; 5:8). Konemej, moneki xikintlakamatikan namotatajuan (Colosenses 3:20). Ma tikilnamiktokan tinochtin timotlapololtiaj, ik non, moneki tiyetoskej tiyolyamankej uan tikijtoskej ma techtlapojpoluikan. Ijkon ken yotikitakej, Jehová techiluia ika Biblia tlen moneki tikchiuaskej.

^ párr. 10 Tla tikneki tikmatis okachi, xikita amochtli “Xiyetokan itech itlasojtlalis toTajtsin Dios”, páginas 219 a 221, tlen kichijchiuaj iTlaixpantijkauan Jehová.

^ párr. 12 Tla tikneki okachi timomachtis ken tikinmaluis mokoneuan, xikita amochtli Aprendamos del Gran Maestro, tlamachtil 32, tlen kichijchiuaj iTlaixpantijkauan Jehová.

^ párr. 15 Tla tetajmej kiluiaj inkone ma kichiua itlaj tlen toTajtsin Dios amo kipaktia, amo moneki kintlakamatis (Hechos 5:29).