Xikita nochi

Tlen kiualika

Notas

Notas

1 JEHOVÁ

ToTajtsin Dios itoka Jehová. Itoka kijtosneki “Ye Kichiua ma Mochiua”. San ye kipia sapanoa miak chikaualistli uan nochi okichijchi. Kipia chikaualistli para kichiuas nochi tlen kineki.

Ika hebreo itoka toTajtsin Dios moijkuiloa ika naui letras uan ika español nonmej letras ijkin moijkuiloaj: YHWH noso JHVH (ualeua noijki moijkuiloa YHVH). Ijkuak yikin okijkuilojkej Biblia ika hebreo itoka toTajtsin Dios oijkuilitoka kanaj 7,000 veces. Miakej tlatlamantli kijtoaj tokayotl Jehová uan kitenkixtiaj ken moijtoa ika intlajtol.

Tlamachtil 1, párr. 15, xikita tlajtoli tlen kiualika tlakxitlan

2 “DIOS OTLANAWATI MAKIJKUILOKAH” BIBLIA

Tlen ijkuilitok itech Biblia iTlajtol toTajtsin Dios uan okintekitilti tlakamej para ma kijkuilokan. Nin yetoskia ken ijkuak se tlakatl kiluia ikone ma kijkuilo se carta. Carta amo iaxka ikone, iaxka tlakatl porque ye okiluijtia tlen kijkuiloskia. Noijki ijkon, toTajtsin Dios ika iespíritu okinmatilti tlakamej tlen okinekiaya ma kijkuilokan uan tlatlamantli okinnextili tlen kijkuiloskiaj. Ualeua okichi ma itlaj ma kitemikikan noso ijkuak oijsatokaj, okinmititi seki tlamantli uan satepan okijkuilojkej tlen okitakej.

Tlamachtil 2, párr. 5

3 PRINCIPIOS

Principios bíblicos techpaleuiaj ma tikmatikan tlen tikchiuaskej. Itech Biblia tikajsij se principio tlen kijtoa ‘tla tinemiskeh iwa akimeh kichiwah tlan amokuali, kipatlaskeh totlayejyekolis iwa techijtlakoskeh’. Non kijtosneki akinmej inmiuan timouikaj uelis techpaleuiskej noso techouijtiliskej (1 Corintios 15:33). Okse principio  kijtoa: “Nochteh kipixkah tlan kitookah”. Non kijtosneki titlajyouiskej tla tikchiuaj tlen amo kuali (Gálatas 6:7).

Tlamachtil 2, párr. 12

4 PROFECÍAS

ToTajtsin Dios kinmijtoa profecías uan ijkon kitematiltia tlen kineki, ken moneki tikpiaskej tonemilis, tlen moneki tikchiuaskej uan ken tlaixkomaka. Noijki kitematiltiaj tlen panos satepan. Miakej profecías yomochijkej.

Tlamachtil 2, párr. 13

5 PROFECÍAS ITECH MESÍAS

Nochi profecías tlen otlajtoayaj itech Mesías omochijkej itech Jesús. Xikita tabla: “ Profecías itech Mesías”.

Tlamachtil 2, párr. 17, xikita tlajtoli tlen kiualika tlakxitlan

6 ¿TLEN KINEKI KICHIUAS JEHOVÁ?

Jehová okinekiaya tlaltikpak ma yeto se xochitlali uan itech ma chantikan akinmej kitlasojtlaj. Ye ok kineki ijkon ma tiyetokan. Ayakmo miak poliui uan kipojpolos tlen amo kuali uan kichiuas nochipa ma yoltokan akinmej kitlakamatij.

Tlamachtil 3, párr. 1

7 SATANÁS, YE DIABLO

Satanás opejki kixnamiki Jehová. Tlajtoli Satanás kijtosneki “teixnamiki”. Ijkon kiluiaj porque amo kitlakamati Jehová. Diablo kijtosneki ikaj tlen “kijtoa tlen amo melauak”. Ye kijtoa tlen amo melauak itech toTajtsin Dios uan miakej kinkajkayaua.

Tlamachtil 3, párr. 4

  8 ÁNGELES

Jehová okinchijchi ángeles uan satepan tlaltikpak. Okinchijchi para ma yetokan iluikak. Katej kanaj 100 millones (Daniel 7:10). Nochtin kipiaj intoka uan tlatlamantli inyelis. Pero yolyamankej, ik non, amo kinekij ma kinueyichiuakan. Ángeles tlatlamantli tekitl kichiuaj. Sekimej kitekichiuiliaj Jehová ixpan itrono, sekimej kitematiltiaj tlen ye kineki, sekimej kinmaluiaj uan kinyekanaj itekipanojkauan nikan tlaltikpak. Noijki kichiuaj tlen yokijto Jehová uan tlapaleuiaj ma motematilti iTekiuajkayo (Salmo 34:7; Apocalipsis 14:6; 22:8, 9). Satepan, ángeles uan Jesús tlateuiskej itech guerra tlen itoka Armagedón (Apocalipsis 16:14, 16; 19:14, 15).

Tlamachtil 3, párr. 5; tlamachtil 10, párr. 1

9 TLAJTLAKOLI

Titlajtlakolchiuaj ijkuak tikmachiliaj, timokuayejyekoaj noso tikchiuaj itlaj tlen Jehová amo kipaktia uan tlajtlakoli amo techkauilia iuan ma timouikakan. Ik non, ye techmaka itlanauatiluan uan principios para amo ma tiknekikan titlajtlakolchiuaskej. Jehová nochi kuali okichijchi. Pero Adán uan Eva amo okitlakamatkej uan ijkon otlajtlakolchijkej. Ik non, satepan okokoxkatikej uan omikej. Ken Adán otechpanoltili tlajtlakoli, noijki tikokoxkatij uan tiixpoliuij.

Tlamachtil 3, párr. 7; tlamachtil 5, párr. 3

10 ARMAGEDÓN

Itech non guerra toTajtsin Dios kitlajtlamis tlen Satanás kiyekantok uan nochi tlen amo kuali.

Tlamachtil 3, párr. 13; tlamachtil 8, párr. 18

 11 ITEKIUAJKAYO TOTAJTSIN DIOS

ITekiuajkayo toTajtsin Dios kajki iluikak. Jesucristo tlanauatia itech non Tekiuajkayotl. Satepan, Jehová ika iTekiuajkayo kitlajtlamis nochi tlen amo kuali uan kinauatis nochi tlaltikpak.

Tlamachtil 3, párr. 14

12 JESUCRISTO

Jehová achto okichijchi Jesús uan satepan okiualtitlanki topatka ma motemakaki. Okimiktijkej pero satepan Jehová okiyoliti. Axkan Jesús tlanauatijtok iluikak ken ueyi Tekiua itech iTekiuajkayo toTajtsin Dios.

Tlamachtil 4, párr. 2

13 PROFECÍA ITECH 70 SEMANAS

Biblia okijto keman momatiskia akin Mesías. Achto omonekiaya panos 69 semanas. Nonmej semanas opejkej itech xiuitl 455 achto itech xiuitl se (a.i.x. 1) uan otlankej xiuitl 29.

¿Ken tikmatij nonmej semanas otlamitoj itech xiuitl 29? 69 semanas opejkej itech xiuitl 455 a.i.x. 1, ijkuak Nehemías oajsito Jerusalén uan opejki kiyektlalia altepetl (Daniel 9:25; Nehemías 2:1, 5-8). Ijkuak tikkakij “docena” timokuayejyekoaj itech número 12. Tlajtoli “semana” kichiua ma timokuayejyekokan itech número chikome. Itech nin profecía sejse semana amo kipia chikome tonal, kipia chikome xiuitl porque profecías ijkin mopoaj: “Se tonal kijtosneki se xiuitl” (Números 14:34; Ezequiel 4:6). Non kijtosneki sejse semana uejkaua chikome xiuitl uan 69 semanas uejkaua 483 xiuitl (69 x 7). Tla tikpoaj 483 xiuitl desde 455 a.i.x. 1, tiajsitiuij xiuitl 29. Itech xiuitl 29 Jesús omoapolakti uan omochi Mesías (Lucas 3:1, 2, 21, 22).

 Itech nin profecía noijki moijtoa okse semana, kijtosneki ok chikome xiuitl. Itech nonmej xiuitl kimiktiskiaj Mesías. Ijkon opanok itech xiuitl 33. Itech xiuitl 36 opejki motetlapouia kuali tlajtolmej itech iTekiuajkayo toTajtsin Dios itech nochi altepemej uan amo san okintlapouiayaj judíos (Daniel 9:24-27).

Tlamachtil 4, párr. 7, xikita tlajtoli tlen kiualika tlakxitlan

 14 AMO ONKA TRINIDAD

Biblia kijtoa Jehová okichijchi nochi tlen onka pero achto okichijchi Jesús, satepan okseki tlamantli (Colosenses 1:15, 16). Jesús amo toTajtsin Dios akin kipia sapanoa miak chikaualistli. Jesús amo keman okijto ye noijki ijkon ken toTajtsin Dios. Se tonal okijto: “Notajtsi okachi weyijkatitok ke Ne” (Juan 14:28; 1 Corintios 15:28). Pero miakej religiones tlamachtiaj onka Trinidad. Kijtoaj Teta, teKone uan espíritu santo tlatlamantli pero mochiuaj san se Dios. Pero tlajtoli “trinidad” amo kanaj ijkuilitok itech Biblia. Non kiteititia amo onka trinidad.

Espíritu santo ichikaualis toTajtsin Dios tlen ika kichiua itlanekilis. Non chikaualistli amo se tlaltikpaktlakatl nion mota. Ijkuak miakej opejkej kichiuaj ken Cristo “otenkej de Espíritu Santo” uan noijki Jehová okijto kitemakaskia iespíritu santo (Hechos 2:1-4, 17NHY).

Tlamachtil 4, párr. 12; tlamachtil 15, párr. 17

15 CRUZ

¿Tleka akinmej melauak tikchiuaj ken Cristo amo tiktekitiltiaj cruz ijkuak tikueyichiuaj toTajtsin Dios?

  1. Religiones yiuejkika kitekitiltiaj cruz. Ualeua okitekitiltiayaj ijkuak otlaueyichiuayaj uan ijkuak okichiuayaj miak tlamantli para auilnemiskej. Kanaj 300 xiuitl satepan ijkuak okimiktijkej Jesús, akinmej okichiuayaj ken ye amo okitekitiltiayaj cruz ijkuak okiueyichiuayaj toTajtsin Dios. Pero se tekiua tlen omotokayotiaya Constantino uan otlanauatiaya Roma, okichi ma kitekitiltikan cruz miakej tlen okijtoayaj okichiuayaj ken Cristo para okachi miakej ma tlaneltokakan. Pero ijkuak okimiktijkej Jesús amo okitekitiltijkej cruz. Se amochtli tlen okijkuilojkej católicos kijtoa: “Achto ualaskia Cristo miakej yokitekitiltiayaj cruz uan noijki akinmej amo okichiuayaj ken Cristo” (New Catholic Encyclopedia).

  2.   Jesús amo okimiktijkej itech se cruz. Ika griego tlajtoli “cruz” kijtosneki “tlaketsali” noso “se kuauitl melaktik”. Se Biblia kijtoa Nuevo Testamento ika griego “amo kanaj kijtoa ome kuauitl onepanitokaj” (The Companion Bible). Jesús okipilojkej itech se tlaketsali.

  3. Jehová amo kineki ma tikueyichiuakan ika teotsitsintin noso ika okseki tlamantli (Éxodo 20:4, 5; 1 Corintios 10:14).

Tlamachtil 5, párr. 12

16 TIKILNAMIKIJ IMIKILIS JESÚS

Jesús okinnauati imachtijkauan ma kilnamikikan imikilis. Akinmej tikchiuaj ken Cristo tikilnamikij imikilis tonal 14, itech metstli tlen judíos okiluiayaj nisán. Itech non tonal israelitas okichiuayaj Pascua. Ijkuak tikilnamikij imikilis Jesús, mopanoltia pan uan vino tlen kineskayotiaj itlalnakayo uan ieso Jesús. Nochtin akinmej tlanauatiskej iluikak iuan Jesús kikuaj pan uan konij vino. Akinmej chantiskej itech xochitlali noijki kilnamikij imikilis Jesús ika tlakaitalistli pero amo kikuaj pan nion konij vino.

Tlamachtil 5, párr. 21

17 ALMA

Traducción del Nuevo Mundo, kitekitiltia tlajtoli “alma” uan kijtosneki 1) tlaltikpaktlakamej, 2) yolkamej noso 3) iyolilis se tlaltikpaktlakatl noso se yolkatl. Tikitaskej seki tlamantli tlen techpaleuis ma tikajsikamatikan.

  • Tlaltikpaktlakamej. “Itech tonatijmeh ijkuak Noé onemia [...] sanwel chikweyi [almas, TNM] omomakixtijkeh imak n weyi kiawitl” (1 Pedro 3:20). Itech nin versículo kijtoa “almas” uan non kijtosneki tlaltikpaktlakamej: Noé, isiua, eyi inkoneuan uan insiuauan.

  •  Yolkamej. “ToTajtsin Dios okijto: ‘Itech tlaltikpak ma yetokan nochi tlatlamantli [almas], yolkamej tlen katej kalijtik uan yolkamej tlen motilanaj uan nochi tlatlamantli yolkamej tlen nemij kuajyoʼ. Uan ijkon opanok” (Génesis 1:20, 24).

  • Inyolilis tlaltikpaktlakamej noso yolkamej. Jehová okilui Moisés: “Yomikej nochtin tlakamej tlen okinekiayaj [moalma]” (Éxodo 4:19). Ijkuak Jesús nikan okatka okijto: “Ne nikuali tlájpixki. Se kuali tlájpixki kinmokuitlawia iichkawah, maya makimiktikah [maski kitemakas ialma, TNM]” (Juan 10:11).

    Ijkuak Biblia kijtoa ikaj kichiua itlaj ika nochi ialma, kijtosneki kichiua ika nochi iyolo uan mochijchikaua kuali kichiuas (Deuteronomio 6:5; Mateo 22:37). Noijki ijkuak kijtoa “alma”, ualeua kijtosneki tlen se kimachilia. Biblia kijtoa se mikatl noijki se alma tlen yoixpoliuik (Números 6:6; Proverbios 23:2; Ageo 2:13).

Tlamachtil 6, párr. 5, xikita tlajtoli tlen kiualika tlakxitlan; tlamachtil 13, párr. 17; tlamachtil 15, párr. 17

18 ESPÍRITU

Tlajtoli “espíritu” tlen kisa itech hebreo uan griego tlen kitekitiltia Traducción del Nuevo Mundo kijtosneki miak tlamantli. Espíritu amo ueli tikitaj ijkon ken ejekatl noso ken inmijyo tlaltikpaktlakamej uan yolkamej. Tlajtoli espíritu kijtosneki nochtin akinmej amo motaj (espíritus) uan noijki kijtosneki espíritu santo noso ichikaualis toTajtsin Dios. Biblia amo kijtoa ijkuak tiixpoliuij itlaj mokaua tlen ok yoltok (Éxodo 35:21; Salmo 104:29; Mateo 12:43; Lucas 11:13).

Tlamachtil 6, párr. 5, xikita tlajtoli tlen kiualika tlakxitlan; tlamachtil 15, párr. 17

 19 GEHENA

Ijkon okitokayotiayaj kanin okitlatiayaj tlajsoli ompa Jerusalén. Ijkuak Jesús nikan okatka, amo kanaj kijtoa kox ikaj ompa okitlajyouiltiayaj noso okintlatiayaj tlaltikpaktlakamej uan yolkamej tlen ok oyoltokaj. Ik non, Gehena amo kijtosneki kanin nochipa kintlatiaj uan kintlajyouiltiaj akinmej ixpoliuij. Ijkuak Jesús okijto sekimej yaskiaj itech Gehena, okinekiaya kijtos sepa kinmixpoloskej (Mateo 5:22; 10:28TNM).

Tlamachtil 7, párr. 20

20 PADRENUESTRO

Ika padrenuestro Jesús okinmititi imachtijkauan ken motlatlaujtiskej. Ye okijto tlen moneki tiktlajtlaniskej ijkuak timotlatlaujtiaj:

  • “Ma mochipaua motoka”

    Tiktlatlaujtiaj Jehová ma kichipaua itoka porque itech yokijtojkej tlen amo melauak. Nochtin akinmej yetoskej iluikak uan tlaltikpak kitlakaitaskej uan kiueyichiuaskej itoka.

  • “Ma uiki moTekiuajkayo”

    Tiktlatlaujtiaj Jehová ika iTekiuajkayo ma kitlajtlami nochi tlen Satanás kiyekana, ma ualtlanauati nikan tlaltikpak uan ma kikopa se xochitlali.

  • “Ma mochiua motlanekilis [...] nikan tlaltikpak”

    Tiktlatlaujtiaj Jehová ma mochiua itlanekilis nikan tlaltikpak: akinmej kitlakamatij ayakmo ma tlajtlakolchiuakan uan nochipa ma yoltokan itech xochitlali. Ijkon okinekiaya Jehová ma tiyetokan ijkuak otechchijchi.

Tlamachtil 8, párr. 2

 21 JESÚS TOPATKA OMOTEMAKAK

Jehová okitemakak iKone, ijkon uelis techmakixtis itech tlajtlakoli uan mikilistli. Omonekiaya ikaj motemakas para oksepa tikpiaskiaj tlen Adán okipolo. Noijki omonekiaya para oksepa timouikaskiaj iuan toTajtsin Dios. Jehová okiualtitlanki Jesús ma motemakaki topatka porque tinochtin titlajtlakolejkej. Tlen Jesús okichi tinochtin techpaleuia, ijkon uelis tiyoltoskej nochipa uan ayakmo titlajtlakolchiuaskej.

Tlamachtil 8, párr. 21; tlamachtil 9, párr. 13

22 ¿TLEKA MIAK IPATI XIUITL 1914?

Profecía tlen kajki itech Daniel capítulo 4 kijtoa iTekiuajkayo toTajtsin Dios peuas tlanauatiskia itech 1914.

Profecía. Jehová okichi ma kitemiki ueyi tekiua Nabucodonosor itlaj tlen satepan panoskia. Ueyi tekiua okitemik se ueyi kuauitl tlen okitsontekiayaj. Satepan okitak okiyaualojkej itlaktson ika tepostli uan cobre para amo ma moskalti “chikome tiempos”. Ijkuak tlamiskia non tiempo, kuauitl oksepa moskaltiskia (Daniel 4:1, 10-16).

Tlen kijtosneki. Kuauitl kineskayotia iTekiuajkayo toTajtsin Dios. Miak xiuitl toTajtsin Dios okinyekanaya israelitas ika tekiuajkej tlen okatkaj Jerusalén (1 Crónicas 29:23). Pero nonmej tekiuajkej amo okitlakamatkej toTajtsin Dios, ik non, ayakmo okinkauili ma tlanauatikan. Itech xiuitl 607 achto itech xiuitl se (a.i.x. 1), okipojpolojkej Jerusalén. Itech non xiuitl opejki “chikome tiempos” (2 Reyes 25:1, 8-10; Ezequiel 21:25-27). Jesús okijto nochi altepemej kitlajtlaksaskiaj Jerusalén hasta ma ajsi “tlan kichijtokeh n tlakah non amo judíojteh”. Non kijtosneki “chikome tiempos” (Lucas 21:24). Ik non, “chikome tiempos” amo otlanki ijkuak Jesús nikan okatka. Jehová okijto kitlaliskia se ueyi Tekiua ijkuak  tlamiskia “chikome tiempos”. Non ueyi Tekiua ye Jesús uan nochipa kinteochiuas itekipanojkauan toTajtsin Dios nikan tlaltikpak (Lucas 1:30-33).

Keski uejkauaskia. “Chikome tiempos” ouejka 2,520 xiuitl. Tla peua tikpoaj 2,520 xiuitl desde 607 a.i.x. 1, tiajsiskej itech xiuitl 1914. Ijkuakon Jehová okitlali Jesucristo noso Mesías ken ueyi Tekiua ompa iluikak.

¿Ken tikmatij “chikome tiempos” kijtosneki 2,520 xiuitl? Biblia kijtoa eyi tiempos iuan tlajko kijtosneki 1,260 tonalmej (Apocalipsis 12:6, 14). Ik non, “chikome tiempos” kijtosneki 2,520 tonalmej. Pero profecías ijkin mopoaj: “Se tonal kijtosneki se xiuitl”. Ik non, 2,520 tonalmej kijtosneki 2,520 xiuitl (Números 14:34; Ezequiel 4:6).

Tlamachtil 8, párr. 23

23 ARCÁNGEL MIGUEL

“Arcángel” kijtosneki “akin kinyekana ángeles”. Biblia kijtoa kajki san se arcángel uan itoka Miguel (Daniel 12:1; Judas 9).

Miguel kinyekana nochtin ángeles. Biblia kijtoa: “Miguel iwa iangelwah omotekilmakakeh iwa n dragón [...] iwa iangelwah” (Apocalipsis 12:7). Noijki kijtoa Jesús kinyekana iángeles toTajtsin Dios. Ik non, Miguel okse itoka tlen kipia Jesús (Apocalipsis 19:14-16).

Tlamachtil 9, párr. 4, xikita tlajtoli tlen kiualika tlakxitlan

24 ITLAMIAN TONALMEJ

Nin kijtosneki seki xiuitl ijkuak panoskia miak tlamantli tlen miak ipati nikan tlaltikpak. Nin mochiuaskia ijkuak amo miak poliuiskia iTekiuajkayo toTajtsin Dios kitlajtlamiskia nochi tlen Satanás kinauatijtok. Profecías tlen katej itech Biblia kitekitiltiaj tlatlamantli tlajtolmej para itlamian tonalmej, ken “yitlamis nochi tlen onka  itech tlaltikpak” uan ijkuak yikajki ‘Ye Non omochi tlakatl’ (Mateo 24:3, 27, 37). Saiktlami tonalmej opejkej ijkuak toTajtsin Dios okitlali iTekiuajkayo ompa iluikak itech xiuitl 1914. Uan tlamiskej ika guerra Armagedón ijkuak kitlajtlamiskej nochi tlen Satanás kinauatijtok (2 Timoteo 3:1; 2 Pedro 3:3).

Tlamachtil 9, párr. 2

25 KINYOLITISKEJ AKINMEJ YOIXPOLIKEJ

ToTajtsin Dios kinyolitis akinmej yoixpolikej. Biblia kijtoa okinyolitijkej chiknaui. ToTajtsin Dios okimakak chikaualistli Elías, Eliseo, Jesús, Pedro uan Pablo ijkuak sekimej okinyolitijkej. Jehová yokijto kinyolitis para ma chantikan nikan tlaltikpak “akimeh otlájtlakolchijkeh iwa akimeh amó” [akinmej yolmelauakej uan akinmej amo yolmelauakej] (Hechos 24:15). Biblia noijki kijtoa sekimej kinyolitiaj para yetoskej iluikak. ToTajtsin Dios kinpejpena ma yetokan iuan Jesús ompa iluikak (Juan 5:28, 29; 11:25; Filipenses 3:11; Apocalipsis 20:5, 6).

Tlamachtil 9, párr. 13

26 NAUALOTL NOSO TLEN KICHIUAJ AMO KUALI EJEKAMEJ

Naualotl kijtosneki ijkuak sekimej kinekij motlapouiskej iuan amo kuali ejekamej noso kitlakeuaj akin tetlajchiuia noso akin kijtoa tlen panos satepan. Non amo kuali. Akinmej kichiuaj naualotl kineltokaj ijkuak ikaj ixpoliui kipia itlaj tlen oksekan yoltok uan mochiua se espíritu tlen kipia miak chikaualistli. Pero non amo melauak. Amo kuali ejekamej kichiuaj miak tlamantli para amo ma tiktlakamatikan toTajtsin Dios. Ik non, tlakajkayauaj ika tlachixkej, ika akinmej tetlajchiuiaj uan akinmej tepopoaj. Miakej kineltokaj tla kitaj se miston tliliuik, itlaj mochiuaskej. Noijki sekimej kinmilpiliaj itlaj chichiltik konemej, yolkamej uan okseki tlamantli. Oksekimej kitlaliaj  cruz inkalijtik para amitlaj ma kinchiuilikan amo kuali ejekamej uan kitlaliaj okseki tlamantli. Miakej amochmej, revistas, horóscopos, películas, fotos uan tlakuikalmej kijtoaj ma tikneltokakan techpaleuia magia uan amo kuali ejekamej. Miakej costumbres tlen kichiuaj ijkuak ikaj ixpoliui noijki poui iuan amo kuali ejekamej. Sekimej kichiuaj miak tlamantli itech velorio, tliliuik motlakentiaj, mopopoaj, kichiuaj novenario, misa, kitlamaniliaj ijkuak mikailuitl noso Todos Santos. Sekimej tlauanaj, kitekitiltiaj tabaco noso drogas ijkuak kinnotsaj amo kuali ejekamej (Gálatas 5:20; Apocalipsis 21:8).

Tlamachtil 10, párr. 10; tlamachtil 16, párr. 4

27 SAN JEHOVÁ KINAMIKI TLANAUATIS

Jehová ye toTajtsin Dios akin kipia sapanoa miak chikaualistli uan okichijchi nochi semanauak (Apocalipsis 15:3). Ik non, nochi tlen onka iaxka uan ye Ueyi Tekiua. Non kijtosneki kinamiki kinauatis nochi tlen onka (Salmo 24:1; Isaías 40:21-23; Apocalipsis 4:11). Jehová okintlali tlanauatilmej itech nochi tlen okichijchi. Noijki ye kinamiki kintlalis akinmej technauatiskej. Tla tiktlasojtlaj uan tiktlakamatij, tikteititiaj san ye kinamiki ma technauati (1 Crónicas 29:11).

Tlamachtil 11, párr. 10

28 ¿KUALI MA TIKMAYAUIKAN SE KONETL?

Tlajtlakoli ijkuak kimiktiaj se konetsintli tlen ayamo nesi. Se konetsintli yiyoltok maski yikin peua moskaltia ijtik inantsin.

Tlamachtil 13, párr. 5

29 SEKIMEJ KIMOTLALILIAJ ESTLI

Akinmej tlapajtiaj kitekitiltiaj estli noso seki tlamantli tlen kipia estli: plasma, glóbulos rojos, glóbulos blancos uan  plaquetas. Ualeua kintlaliliaj inmieso oksekimej noso kinechikoaj ieso akin kipajtijtokej uan oksepa kitlaliliaj.

Tlamachtil 13, párr. 13

30 MA TIKINYEKTLALIKAN TOKONEUAN

Ijkuak Biblia kijtoa ikaj “kiyektlaliaj”, amo kijtosneki kitlajyouiltiaj. Ijkuak techyektlaliaj, kijtosneki techmachtiaj uan techpaleuiaj amo ma tikchiuakan itlaj tlen amo kuali. Jehová amo techtlajyouiltia ijkuak techyektlalia (Proverbios 4:1, 2). Tlen kichiua melauak techpaleuia, ik non, tikpatioitaj (Proverbios 12:1). Ye techmachtia uan techyektlalia porque techtlasojtla. Techiluia ken tikyektlaliskej seki tlamantli uan non techpaleuia ma timokuayejyekokan uan ma tikchiuakan tlen ye kipaktia. Tetajmej moneki ma kichiuakan ken Jehová kichiua ijkuak kinyektlaliaj inkoneuan. Moneki kinpaleuiskej ma kajsikamatikan tleka miak ipati ma tetlakamatikan. Noijki moneki kinmachtiskej ma kitlasojtlakan Jehová, ma kipatioitakan iTlajtol uan ma kajsikamatikan principios bíblicos.

Tlamachtil 14, párr. 13

31 AMO KUALI EJEKAMEJ

Amo ueli tikinmitaj uan yejuan okachi chikauakej amo ken tejuan. Nonmej ángeles omochijkej amo yolkualmej ijkuak amo okitlakamatkej toTajtsin Dios uan opejkej kikokoliaj (Génesis 6:2; Judas 6). Noijki okixnamikej ijkon ken okichi Satanás (Deuteronomio 32:17; Lucas 8:30; Hechos 16:16; Santiago 2:19).

Tlamachtil 16, párr. 4