Xikita nochi

Tlen kiualika

 TLAMACHTIL 56

Josías okipatioitaya iTlanauatil toTajtsin Dios

Josías okipatioitaya iTlanauatil toTajtsin Dios

Josías opejki tlanauatia itech Judá ijkuak okipiaya chikueyi xiuitl. Itech nonmej tonalmej, miakej otetlajchiuiayaj uan okinueyichiuayaj teotsitsintin. Ijkuak Josías okipiaya 16 xiuitl, omomachti ken okinekiaya Jehová ma kiueyichiuakan. Satepan, ijkuak okipiaya 20 xiuitl, okinpojpolo teotsitsintin uan altares tlen okatkaj itech nochi ueyi altepetl. Uan ijkuak okajxiti 26 xiuitl, okiyektlali nochi tlen motekitiltiskia para kiyektlaliskiaj iteokal Jehová.

Ueyi teopixki Hilquías, okajsik ijtik teokali rollo kanin oijkuilitoka iTlanauatil toTajtsin Dios. Uelis Moisés okijkuilo non rollo. Ueyi tekiua Josías okipiaya se secretario tlen omotokayotiaya Safán, ye okiuikili rollo Josías uan opejki kitlajtoltilia. Josías okikak uan okimatki ialtepe miak xiuitl amo okitlakamatki Jehová. Ijkuakon, ueyi tekiua Josías okilui Hilquías: “Jehová touan kualantok. Iuan ximotlapoui para ma techilui tlen moneki tikchiuaskej”. Jehová okilui se siuatl teotlajtojki tlen omotokayotiaya Huldá: “Akinmej chantij Judá ayakmo nouan katej. Nikintlajyouiltis, pero amo ijkuak Josías tlanauatijtos, porque ye yolyamanki”.

Ijkuak ueyi tekiua Josías okikak ninmej tlajtolmej, oyajki teokali uan okinnechiko nochtin akinmej ochantiayaj Judá. Satepan, chikauak okintlajtoltili tlen okijtoaya iTlanauatil Jehová. Josías uan nochtin akinmej ochantiayaj Judá okijtojkej kitlakamatiskiaj Jehová ika nochi inyolo.

 Yokipiaya miak xiuitl, akinmej ochantiayaj Judá amo okichiuayaj Pascua. Pero Josías okimatki iTlanauatil Jehová okijtoaya Pascua omonekiaya mochiuas sejse xiuitl. Ik non, okinmilui: “Tikchiuaskej Pascua para Jehová”. Satepan, Josías otlanauati ma kitemakakan miak tlamanali uan okintlali akinmej otlakuikayaj itech teokali. Ijkuakon, okichijkej Pascua uan satepan okichijkej iluitl ijkuak okinchijchiuayaj Panes tlen amo okipiayaj levadura uan ouejka chikome tonal. Amo okichiuayaj se Pascua ken okichijkej desde ijkuak okatka Samuel. Josías melauak okipatioitaya iTlanauatil Jehová. ¿Te noijki mitspaktia timomachtis itech Jehová?

“Motlajtol se lámpara para nokxi uan se tlauili para noojui” (Salmo 119:105).