Xikita nochi

Tlen kiualika

 TLAMACHTIL 53

Jehoiadá okatka yolchikauak

Jehoiadá okatka yolchikauak

Jezabel okipixki se itakotsin tlen omotokayotiaya Atalía uan noijki okatka amo yolkuali. Atalía omonamikti iuan ueyi tekiua tlen otlanauatiaya altepetl Judá. Ijkuak nin ueyi tekiua omikik, ikone opejki tlanauatia. Uan ijkuak omikik ikone, Atalía otlanauatiaya altepetl Judá. Ye amo okinekiaya okse ma tlanauati, ik non, okinekiaya kinmiktis ikoneuan ueyi tekiua uan akinmej uelis tlanauatiskiaj ipatka. ¡Hasta okinmikti ixuiuan! Ik non, nochtin okimauiliayaj.

Ueyi teopixki Jehoiadá uan isiua tlen omotokayotiaya Jehoseba, okimatiayaj sapanoa amo kuali tlen okichijtoka Atalía. Ik non, maski uelis kinmiktiskiaj, okimaluijkej se ixui Atalía uan okiskaltijkej itech teokali. Nin konetsintli omotokayotiaya Jehoás.

Ijkuak Jehoás okipiaya chikome xiuitl, Jehoiadá okinnechiko nochtin tlayekankej uan levitas. Okinmilui: “Xitlamaluikan ikaltempa teokali. Amo xikkauilikan ikaj ma kalaki”. Satepan, Jehoiadá okitlalili se corona Jehoás para tlanauatiskia altepetl Judá. Uan akinmej ochantiayaj Judá chikauak okijtojkej: “¡Ma yolto ueyi tekiua!”.

Siuatl ueyi tekiua Atalía okikak ken chikauak otlajtoayaj uan omotlalo hasta oajsito teokali. Ijkuak okitak yankuik ueyi tekiua, chikauak okijto: “¡Otlaixnamikej! ¡Otlaixnamikej!”. Tlayekankej okikitskijkej Atalía, okiuikakej uan okimiktijkej. Nin siuatl okatka amo yolkuali uan okinmachtiaya oksekimej ijkon ma kichiuakan. ¿Tlen opanok satepan?

Jehoiadá okinpaleui akinmej ochantiayaj Judá ma kichiuakan se tlajtolsenkaualistli iuan Jehová. Yejuan okijtojkej san Jehová kiueyichiuaskiaj. Jehoiadá otlanauati ma kinpojpolokan teotsitsintin uan teokali kanin  okiueyichiuayaj Baal. Okintlali teopixkej uan levitas ma tekitikan itech teokali para nochtin oksepa ompa kiueyichiuaskiaj Jehová. Noijki okintlali akinmej otlamaluiayaj itech teokali uan ijkon amo kalakiskia ikaj akin amo chipauak. Satepan, Jehoiadá uan tlayekankej okiuikakej Jehoás kanin chantiskia uan ye omotlali ipan itrono. Akinmej ochantiayaj Judá sapanoa oyolpakej. Axkan kema kitekichiuiliskiaj Jehová. Ayakmo okatka Atalía akin okinchiualtiaya ma kiueyichiuakan Baal. ¿Tikneltoka Jehoiadá okatka yolchikauak? ¿Otikitak okinpaleui miakej porque okatka yolchikauak?

“Amo xikinmawilikah akimeh weletis nomechmiktiskeh, porke maya manomechmiktikah, mach weletis kixpoloskeh nomoalma. Yej xikiimakajsikah Dios Akin weletis kixpolos nomokuerpo iwa nomoalma” (Mateo 10:28).