Xikita nochi

Tlen kiualika

 TLAMACHTIL 50

Jehová okimakixti Jehosafat

Jehová okimakixti Jehosafat

Jehosafat otlanauatiaya Judá, ye okinpojpolo altares kanin okiueyichiuayaj Baal uan noijki teotsitsintin tlen okatkaj itech ialtepe. Ye okinekiaya nochtin ma kixmatikan itlanauatiluan Jehová. Ik non, okinnauati príncipes uan levitas ma tlamachtikan itlanauatiluan Jehová itech nochi Judá.

Akinmej ochantiayaj itech okseki altepemej amo okinekiayaj kiteuiskej altepetl Judá porque okimatiayaj Jehová okipaleuiaya ialtepe. Hasta okiuikiliayaj tetliokolilmej ueyi tekiua Jehosafat. Pero satepan akinmej ochantiayaj Ammón, Moab uan okseki altepemej tlen okatkaj itech tlali Seír okiteuitoj altepetl Judá. Jehosafat okimatiaya san Jehová uelis kipaleuiskia. Ik non, okinnechiko Jerusalén nochtin tlakamej, siuamej uan konemej. Satepan, inmixpan okichi se tlatlaujtilistli uan okijto: “Jehová, techtlaniliskej tla amo techpaleuis. Nimitstlatlaujtia, techilui tlen moneki tikchiuaskej”.

Jehová okikak Jehosafat uan okinankili: “Amo ximomojtikan, ne namechpaleuis. Ximoyekketokan, san ximokajtokan uan xikitakan ken namechmakixtis”. ¿Ken okinmakixti Jehová?

Mostlatika, Jehosafat okinpejpenki akinmej kuali otlakuikayaj uan okinmilui ma yakan inmixpan soldados. Yejuan okiskej Jerusalén uan oyajkej kanin moteuiskiaj itech se altepetsintli tlen itoka Tecoa.

Akinmej otlakuikayaj oyolpaktokaj uan chikauak okitlakuikiliayaj Jehová. Ijkuakon, Jehová omoteui ipatka ialtepe. Okichi ammonitas uan moabitas san yejuan ma moteuikan. Nochtin omikej. Pero Jehová okinmalui akinmej ochantiayaj Judá, soldados uan teopixkej. Nochtin akinmej ochantiayaj itech okseki altepemej okimatkej tlen okichi Jehová uan okajsikamatkej ye okimaluiaya ialtepe. ¿Ken kimakixtia Jehová ialtepe? Kichiua miak tlamantli para kimakixtis uan amo moneki ma kipaleuikan tlaltikpaktlakamej.

“Namejuan amo moneki nanmoteuiskej itech nin neteuilistli. Ximoyekketokan, san ximokajtokan uan xikitakan ken namechmakixtis Jehová” (2 Crónicas 20:17).