Xikita nochi

Tlen kiualika

 TLAMACHTIL 36

Jefté okitemakak itlajtol

Jefté okitemakak itlajtol

Israelitas oksepa okilkajkej Jehová uan opejkej kinueyichiuaj teotsitsintin. Pero teotsitsintin amo okinpaleuiayaj israelitas ijkuak okinteuiayaj akinmej ochantiayaj altepetl Ammón. Israelitas otlajyouijkej miak xiuitl. Ik non, okiluijkej Jehová: “Otitlajtlakolchijkej. Timitstlatlaujtiaj, techmakixti”. Israelitas okinpojpolojkej teotsitsintin uan oksepa okiueyichijkej Jehová. Ik non, ye okinmiknomatki.

Ijkuakon, israelitas okipejpenkej se soldado tlen omotokayotiaya Jefté. Ye kinyekanaskia ijkuak moteuiskiaj iuan ammonitas. Jefté okilui Jehová: “Tla techpaleuia ma titlatlanikan, nimitsmakas akin achto nechnamikiti ijkuak  nimokuepas nokalijtik”. Jehová okikak Jefté uan okipaleui ma tlatlani.

Ijkuak Jefté omokuepki ikalijtik, ichpoch achto okinamikito. Jefté san se ichpoch okipiaya. Uan ijkuak okinamikito omijtotiaya uan okitsotsonaya pandereta. ¿Tlen okichi Jefté? Okilnamik tlen okilui Jehová uan okijto: “¡Ay nochpoch! Nimoyolkokoa. Onikilui Jehová itlaj nikchiuas uan axkan moneki nimitstitlanis tabernáculo tlen kajki altepetl Siló uan ompa tiktekichiuilis Jehová”. Ichpoch okinankili: “Notajtsin, tla ijkon yotikilui Jehová, axkan moneki tikchiuas. San xinechkauili ma nio tepeyo ome metstli iuan noyolikniuan ichpokamej. Satepan, nias tabernáculo”. Ichpoch Jefté okichi tlen okijto uan nochipa okitekichiuili Jehová itech tabernáculo. Iyolikniuan oyayaj altepetl Siló kitlajpalotiuij sejse xiuitl.

“Akin kitlasojtla ipiltsi noso ichpoch okachi ke Ne, amo makimoli nika íwa” (Mateo 10:37).