Xikita nochi

Tlen kiualika

 TLAMACHTIL 25

Tabernáculo kanin okiueyichiuayaj toTajtsin Dios

Tabernáculo kanin okiueyichiuayaj toTajtsin Dios

Ijkuak Moisés okatka ipan tepetl Sinaí, Jehová okilui ma kichijchiua se mantajkali tlen okitokayotijkej tabernáculo uan ompa israelitas kiueyichiuaskiaj Jehová. Noijki uelis kiuikaskiaj san kanin yaskiaj.

Jehová okijto: “Xikinmilui israelitas ma kitemakakan tlen kinekiskej para ma mochijchiua tabernáculo”. Israelitas okitemakakej oro, plata, cobre, temej kualtsitsintin uan koskamej. Noijki okitemakakej ichkatsojmitl, lino, inkuetlax yolkamej uan okseki tlamantli. Okitemakakej miak tlamantli. Ik non, Moisés okinmilui: “Yionka miak tlamantli. Ayakmo itlaj xikualikakan”.

Miakej tlakamej uan siuamej tlen kuali otekitiayaj otlapaleuijkej ijkuak okichijchijkej tabernáculo. Jehová okinmakak ixtlamatilistli para kuali kichijchiuaskiaj. Sekimej okichijchiuayaj ikpatl, oksekimej oijkitiayaj uan otlajtsomayaj. Sekimej otlachijchiuayaj ika oro, oksekimej okitekiayaj tetl uan oksekimej okichijchijkej seki tlamantli ika kuauitl.

Israelitas okichijchijkej tabernáculo ijkon ken Jehová okinnauati. Okichijchijkej se kuajkualtsin cortina tlen ika okitlajkoxelojkej tabernáculo itech Santo uan Santísimo. Ijtik Santísimo okatka arca itech tlajtolsenkaualistli tlen okichijchijkej ika kuauitl uan oro. Ijtik  Santo okatka se candelabro de oro, se mesa uan altar kanin okitlatiayaj kopali. Kiauak okatka se akaxitl de cobre uan se ueyi altar. Ijkuak israelitas okitayaj arca itech tlajtolsenkaualistli, okilnamikiayaj ijkuak okiluijkej Jehová kitlakamatiskiaj. ¿Tikmati tlen kijtosneki se tlajtolsenkaualistli? Kijtosneki ijkuak ikaj kijtoa itlaj kichiuas.

Jehová okitlali Aarón uan ikoneuan ma yetokan teopixkej uan ma tekitikan itech tabernáculo. Yejuan okimaluiayaj tabernáculo uan ompa okitlamaniliayaj Jehová. San ueyi teopixki Aarón, okikauiliayaj ma kalaki ijtik Santísimo. Itech se xiuitl, san se uelta ompa okalakiaya uan okitemakaya tlamanali para ma kitlapojpoluikan ye, ikalchanejkauan uan nochtin israelitas.

Israelitas otlanki okichijchijkej tabernáculo se xiuitl satepan ijkuak okiskej Egipto. Axkan yokipiayaj kanin kiueyichiuaskiaj Jehová.

Jehová okiyolpakti tabernáculo, ik non, ipan okitlali se mixtli. Tla mixtli omokauaya ipan tabernáculo, israelitas omokauayaj kanin okatkaj. Pero tla mixtli omoliniaya, israelitas oksekan oyayaj. Okixitiniayaj tabernáculo uan okitokayaj mixtli.

“Onikak se tlájtoli chikawak non owalaya ik ilwikak, iwa okijtoaya: ‘Xikita, axa Dios yochanchiwato iwa n tlakah. Dios chantitos inwah; iwa yejwah yetoskeh iaxkawah nochipa, iwa Ye inewia yetos non sanwel se Dios’” (Apocalipsis 21:3).