Xikita nochi

Tlen kiualika

 TLAMACHTIL 28

Se burra otlajto

Se burra otlajto

Israelitas yokaxitijtokaj 40 xiuitl kanin tlauaki. Okinmoaxkatijkej miakej altepemej ueyititokej. Ijkuakon, israelitas yokatkaj ixtlauak Moab, ik kanin kisa Tonaltsin itech aueyatl Jordán uan yikimoaxkatiskiaj tlali tlen Jehová okijto kinmakaskia. Ueyi tekiua itech Moab omotokayotiaya Balac. Ye omomojtiaya porque israelitas okinekiayaj kimoaxkatiskej ialtepe. Ik non, okilui se tlakatl tlen omotokayotiaya Balaam ma uia Moab ma kinuijuikaltiti israelitas uan ijkon ma kinpano tlen amo kuali.

Pero Jehová okilui Balaam: “Amo xikinuijuikalti israelitas”. Ik non, Balaam amo okinek yas Moab. Ueyi tekiua Balac oksepa okilui ma uia uan okilui kimakaskia san tlen kinekiskia, pero Balaam oksepa amo okinek yas. Ijkuakon, Jehová okilui Balaam: “Nimitskauilis xio. Pero san tikijtos tlen ne nimitsiluis”.

Balaam otlejkok ipan iburra uan oyajki Moab tlen okatka ik sur. Okinekiaya kinuijuikaltis israelitas maski Jehová okilui amo ma kichiua. Pero iángel Jehová okimonextili eyi uelta itech ojtli. Balaam amo okitaya ángel, pero iburra kema okitaya. Achto, burra okiski itech ojtli uan oyajki tetlalan. Satepan, burra omotlakaltecho itech tepamitl tlen okichijchijkej ika tetl uan okipatsilijtoka ikxi Balaam. Saiktlami, burra omotekak itlajkotia ojtli. Nin eyi uelta, Balaam okiuitekiaya burra ika se kuauitl.

Satepan, Jehová okichi ma tlajto burra. Uan burra okitlajtlani Balaam: “¿Tleka tinechuiteki?”. Balaam okinankili: “Tikchiua ma nimota ken se xoxo. Nimitsmiktiskia tla nikpiaskia se espada”. Burra okilui: “Yimiak xiuitl nopan otitlejkok. ¿Keman ijkon yonimitschiuili?”.

Ijkuakon, Jehová okichi Balaam ma kita ángel. Nin ángel okilui: “Jehová omitsilui amo xikinuijuikalti israelitas”. Balaam okinankili: “Amo kuali tlen nikneki nikchiuas. Nimokuepas nokalijtik”. Pero iángel  Jehová okilui: “Uelis tias Moab, pero san tikijtos tlen toTajtsin Dios mitsiluis”.

¿Otetlakamatki Balaam? Amo, porque satepan eyi uelta okiyejyeko kinuijuikaltis israelitas. Pero Jehová okichiuaya ma kinteochiua uan amo ma kinuijuikalti. Saiktlami, israelitas okiteuitoj altepetl Moab uan Balaam omikik. Amo ijkon kipanoskia tla kitlakamatiskia Jehová.

“Amo xikmokawilikah manomechyoltilana n tomi, porke n tlakatl amo kipia nemílistli san por kipia miak tomi” (Lucas 12:15).