Xikita nochi

Tlen kiualika

 TLAMACHTIL 20

Jehová okintitlanki ok chikuase chauistli

Jehová okintitlanki ok chikuase chauistli

Moisés uan Aarón okiluitoj faraón tlen okijto toTajtsin Dios: “Tla amo tikkauilis noaltepe ma uia, nikintitlanis uejueyij sayolimej itech ueyi altepetl”. Ninmej uejueyij sayolimej otlatepiniayaj. Sapanoa miakej uejueyij sayolimej okalakej inkalijtik egipcios tlen okipiayaj tomin uan tlen amo okipiayaj. Ninmej uejueyij sayolimej okatkaj itech nochi Egipto. Pero itech tlali Gosén, kanin ochantiayaj israelitas, amo okatka nion se sayoli. Chauistli naui uan oksekimej tlen okipixkej egipcios ayakmo okinpanok israelitas. Faraón okilui Moisés: “Xikilui Jehová ma kinpojpolo ninmej uejueyij sayolimej uan satepan moaltepe uelis yas”. Pero ijkuak Jehová okinpojpolo, faraón amo okichi tlen okijto. ¿Tikneltoka se tonal faraón kitlakamatiskia Jehová?

Satepan, Jehová okijto: “Inyolkauan egipcios mokokoskej uan mikiskej tla faraón amo kikauilia noaltepe ma kisa”. Mostlatika, opanok tlen Jehová okijto, pero inyolkauan israelitas amo itlaj okinpanok. Uan ken faraón okatka yoltlakuauak, amo okinkauili ma kisakan. Satepan, Jehová okinauati Moisés ma mokuepa kanin okatka faraón uan ma kiajkotlamotla tlikonextli. Tlikonextli ouetski ipan nochtin egipcios uan yolkamej uan okichi ma kipiakan sauamej tlen sapanoa okinkokoaya. Pero faraón oksepa okinmilui israelitas amo uelis yaskiaj.

 Jehová oksepa okititlanki Moisés ixpan faraón ma kiluiti: “¿Amo tikkaua ma kisa noaltepe? Mostla nikchiuas ma uetsi tesiuitl”. Mostlatika, Jehová okichi ma uetsi tesiuitl uan tlitl uan ma tlatijtikuini. Amo keman ijkon opanoaya itech Egipto. Ouetskej kuajmej uan okipojpolo tlen otoktoka intlaluan egipcios pero amo itlaj okipanok tlali Gosén. Ijkuakon, faraón okijto: “Xikilui Jehová ma tlami nochi nin uan nanyaskej”. Pero ijkuak otlanki okiauik uan ayakmo ouetski tesiuitl, faraón amo okinkauili ma yakan israelitas.

Satepan, Moisés okijto: “Axkan chapulimej kikuaskej xiuitl tlen omoka ijkuak ouetski tesiuitl”. Sapanoa miakej chapulimej okikuajkej tlen omoka itech kuajmej uan tlalan. Ik non, faraón okitlatlaujti Moisés: “Xikilui Jehová ma kinkixti chapulimej”. Pero ijkuak Jehová okinkixti chapulimej, faraón okika ma tlakuaua iyolo.

Satepan, Jehová okilui Moisés: “Xikajkokui moma”. Uan san niman otlayoak. Eyi tonal, egipcios amo itlaj okitakej. San inkalijtik israelitas okipiayaj tlauili.

Faraón okilui Moisés: “Te uan moaltepe uelis nanyaskej, pero nikan ma mokauakan namoyolkauan”. Moisés okinankili: “Moneki tikinuikaskej toyolkauan para tiktlamaniliskej toTajtsin Dios”. Faraón sapanoa okualanki uan chikauak okijto: “¡Xio! Nimitsmiktis tla oksepa nimitsitas”.

“Namejuan oksepa nankitaskej akin yolmelauak uan akin amo yolkuali, akin kitekichiuilia toTajtsin Dios uan akin amo kitekichiuilia” (Malaquías 3:18).