Xikita nochi

Tlen kiualika

 TLAMACHTIL 22

Jehová okichi se milagro itech mar Rojo

Jehová okichi se milagro itech mar Rojo

Faraón amo kuali omomachili ijkuak okimatki israelitas okiskej itech Egipto. Ik non, okinmilui isoldados: “Xikinualikakan carretas tlen tikintekitiltiaj itech guerra uan ma tikintokakan. ¿Tleka otikinkauilijkej ma kisakan?”. Ijkuakon, faraón uan isoldados oyajkej inkuitlapan israelitas.

Jehová okinyekanaya israelitas ika se mixtli ijkuak otlanestoka uan yoak ika se tlitl. Okinuikak itempa mar Rojo uan okinmilui ompa ma yetokan.

Satepan, israelitas okitakej ompa oualayaj faraón uan isoldados. Yejuan okatkaj itempa ueyi atl uan ompa oualayaj egipcios. Opejkej tsajtsij uan okiluijkej Moisés: “¡Techmiktiskej! ¿Tleka otechkixti itech altepetl Egipto?”. Pero Moisés okinnankili: “Amo ximomojtikan. Ximochiakan uan xikitakan ken techmakixtis Jehová”. ¡Moisés melauak otlaneltokaya itech Jehová!

Jehová okinmilui israelitas ma motlaololilikan. Non yoak, Jehová okitlali mixtli intlajkotia egipcios uan israelitas. Kanin okatkaj egipcios otlayoatoka pero kanin okatkaj israelitas okatka tlauili.

 Jehová okilui Moisés ma kimelaua ima iyekapan ueyi atl. Ijkuakon, okichi chikauak ma ejeka nochi yoak. Ueyi atl omotlajkoxelo uan itlajkotia omotlapo se ojtli. Nochtin israelitas opanokej itlajkotia ueyi atl ipan tlali uaki uan oajsitoj okse itempa ueyi atl.

Faraón uan isoldados oyajkej inkuitlapan israelitas itlajkotia ueyi atl. Pero Jehová okichi ma motlapololtikan egipcios. Yejuan amo ueli okinuikayaj incarretas. Ijkuakon, soldados chikauak okijtojkej: “¡Ma tiakan! Jehová moteuijtok ipatka ialtepe”.

Satepan, Jehová okilui Moisés: “Xikmelaua moma ixpan ueyi atl”. San niman, atl ouetski inpan egipcios. Faraón uan isoldados omikej. Amo ikaj omomakixti.

Itempa ueyi atl, nochtin israelitas okiueyichijkej toTajtsin Dios ika se tlakuikali, okijtojkej: “Niktlakuikilis Jehová, porque okiteititi ichikaualis. Caballo uan akin ipan oyaya okintlamotlak ijtik atl”. Ijkuak otlakuikayaj, siuamej omijtotiayaj uan okintsotsonayaj panderetas. Nochtin oyolpakej porque Jehová okinmakixti.

“Tejwah weletis tikijtoskeh ika miak tlaneltokálistli [...]: ‘Amo nimawi, amaka weletis itla nechtoktis porke Dios nechpalewia’” (Hebreos 13:6).