Xikita nochi

Tlen kiualika

 TLAMACHTIL 19

Achto eyi chauistli tlen Jehová okintitlanki Egipto

Achto eyi chauistli tlen Jehová okintitlanki Egipto

Israelitas okatkaj tlakeualmej itech Egipto uan okinchiualtiayaj chikauak ma tekitikan. Jehová okintitlanki Moisés uan Aarón ma kiluitij faraón: “Xikkaua noaltepe ma nechueyichiua kanin tlauaki”. Faraón omoueyinekiaya uan otlanankili: “Amo nechtekipachoa tlen kijtoa Jehová. Amo nikinkauas ma yakan israelitas”. Satepan, faraón okinmakak okachi tekitl israelitas. Pero Jehová okitlajyouilti. ¿Ken okichi? Okintitlanki majtlaktli chauistli itech Egipto. Jehová okilui Moisés: “Faraón amo nechtlakamati. Kualkan yetos itempa aueyatl Nilo. Xio xikiluiti, aueyatl mokuepas estli porque amo kikaua ma uia noaltepe”. Moisés otetlakamatki uan okitato faraón. Faraón okitak Aarón okiuitek aueyatl Nilo ika itlako uan atl omokuepki estli. Aueyatl opejki potoni, ayakmo ikaj ueli okoniaya atl uan michimej omikej. Pero faraón amo okinkauili israelitas ma yakan kanin tlauaki.

 Ijkuak opanok chikome tonal, Jehová oksepa okititlanki Moisés ma kiluiti faraón: “Yetoskej kalamej itech nochi Egipto tla amo tikkaua ma uia noaltepe”. Faraón amo otetlakamatki, ik non, Aarón okajkokuik itlako uan itech nochi altepetl okatkaj kalamej. Okatkaj ijtik inkalijtik tlaltikpaktlakamej, kanin okochiayaj, kanin otlakuayaj, ¡okatkaj itech nochi altepetl! Ik non, faraón okilui Moisés: “Xikilui Jehová ma tlami nin chauistli uan nikinkauilis israelitas ma yakan”. Jehová okiketsalti non chauistli uan egipcios okinmololojkej sapanoa miakej kalamej tlen omikej. Nochi altepetl opejki potoni, pero faraón oksepa amo okinkauili israelitas ma yakan.

Satepan, Jehová okilui Moisés: “Aarón ma kiuiteki tlali ika itlako. Ijkuak kichiuas, tlalpinoli mokuepas moyomej”. Uan ijkon opanok, okatkaj moyomej itech nochi altepetl uan okintepiniayaj nochtin. Sekimej egipcios okiluijkej faraón: “¡Nin chauistli okiualtitlanki Dios!”. Pero faraón amo okinkauili israelitas ma kisakan.

“Nikchiuas ma kixmatikan nochikaualis uan tlen ueli nikchiua uan kimatiskej notoka Jehová” (Jeremías 16:21).