Xikita nochi

Tlen kiualika

 TLAMACHTIL 9

¡Abrahán uan Sara okipixkej inkone!

¡Abrahán uan Sara okipixkej inkone!

Abrahán uan Sara yokipiayaj miak xiuitl omonamiktijkej. Okikajtejkej kualtsin inkalijtik tlen okipiayaj itech altepetl Ur uan ochantitoj itech mantajkalmej. Pero Sara amo itlaj okijtoaya porque otlaneltokaya itech Jehová.

Sara okinekiaya kipias se ikone, ik non, okilui Abrahán: “Tla notlakeual Agar kipias se mokone, yetos ken noaxka”. Satepan, Agar okipixki ikone uan okitokayotijkej Ismael.

Miak xiuitl satepan, ijkuak Abrahán okipiaya 99 xiuitl uan Sara okipiaya 89 xiuitl, eyi tlakamej okintlajpalotoj. Abrahán okinmilui ma moseuikan itlampa se kuauitl uan okintlamakak. ¿Tikmati akinmej okatkaj nonmej tlakamej? Okatkaj ángeles. Yejuan okiluijkej Abrahán: “Okse xiuitl, te uan mosiua nankipiaskej se namokone”. Sara okatka ijtik imantajkal uan ijkuak okikak tlen okijtojkej ángeles, oixuetskak uan omokuayejyeko: “¿Melauak nikpias nokone maski yinikpia miak xiuitl?”.

Se xiuitl satepan, Sara okipixki ikone, ijkon ken okijto iángel Jehová. Abrahán okitokayoti Isaac tlen kijtosneki “ijkuak ikaj uetska”.

 Ijkuak Isaac okipiaya kanaj makuili xiuitl, Sara okitak Ismael okipinauiaya Isaac. Sara okinekiaya kimaluis ikone, ik non, okiluito Abrahán: “Xikinmilui Agar uan Ismael ma yakan”. Abrahán amo okinekiaya kichiuas. Pero Jehová noijki okinekiaya kimaluis Isaac, ik non, okilui Abrahán: “Xikchiua tlen kijtoa Sara. Ne nikmaluis Ismael. Pero ika Isaac nikchiuas tlen yonikijto”.

“Por yen tlaneltokalistle, in Sara [...] okajsik chikawalistle iwan owelik omokonetij iwan okitlakatilij se ikone porke okimatia nik in Dios kimakas se ikone ijkón ken Dios okilwij” (Hebreos 11:11, Itlajtol totajtzin Dios [NHY]).