Xikita nochi

Tlen kiualika

 TLAMACHTIL 3

Adán uan Eva amo okitlakamatkej toTajtsin Dios

Adán uan Eva amo okitlakamatkej toTajtsin Dios

Se tonal ijkuak Eva okatka iselti, se koatl okitlapoui uan okitlajtlani: “¿Kox melauak Dios amo namechkauilia xikkuakan nochi tlakilotl?”. Eva okinankili: “Nochi tlakilotl uelis tikkuaskej, san itlakilo se kuauitl amo uelis tikkuaskej. Timikiskej tla tikkuaskej itlakilo non kuauitl”. Koatl okilui: “Amo nanmikiskej. Tla nankikuaskej, nanyetoskej ken Dios”. Tlen okijto koatl amo melauak pero Eva okineltokili uan ijkuak okitaya tlakilotl okachi okinekiaya kikuas. Ik non, okikua uan okimakak Adán noijki ma kikua. Adán okikua tlakilotl maski okimatiaya mikiskia tla amo kitlakamatiskia toTajtsin Dios.

Non tiotlak, Jehová okintlajtlani Adán uan Eva tleka amo okitlakamatkej. Eva okitlajtlakolti koatl uan Adán okitlajtlakolti Eva. Jehová okinkixti Adán uan Eva itech xochitlali porque amo okitlakamatkej. Noijki para amo oksepa kalakiskiaj, okintlali ángeles uan se espada tlen oxotlatoka uan omomalakachojtoka.

Jehová noijki okijto kitlajyouiltiskia akin okikajkaya Eva. Ken Jehová amo okinchijchi koamej ma tlajtokan, amo se koatl okitlapoui Eva. Se ángel amo yolkuali okichi ma tlajto koatl uan ijkon okikajkaya Eva. Non ángel itoka Satanás uan noijki kiluiaj Diablo. Satepan, Jehová kixpolos Satanás. Ijkon Satanás ayakmo kinkajkayauas oksekimej para ma kichiuakan tlen amo kuali.

“N diablo ye se temikti desde ipewaya n tlaltíkpaktli iwa ayik kijtoa tlan milák. Porke ye amo kixmati tlan milák” (Juan 8:44).