Xikita nochi

Tlen kiualika

 TLAMACHTIL 72

Telpochtli Jesús

Telpochtli Jesús

José uan María ochantiayaj Nazaret iuan Jesús. Pero noijki okinpiayaj oksekimej chokotsitsintin uan takotsitsintin. José okatka kuajxinki uan ijkon okinmakaya ikalchanejkauan tlen ika mopanoltiskiaj. Noijki okinmachtiaya iTlanauatil Jehová. José uan ikalchanejkauan okiueyichiuayaj toTajtsin Dios itech sinagoga uan oyayaj Jerusalén sejse xiuitl para kichiuaskiaj Pascua.

Ijkuak Jesús okipiaya 12 xiuitl, ikalchanejkauan oyajkej Jerusalén ken okichiuayaj sejse xiuitl. Ompa okatkaj sapanoa miakej akinmej oiluichiuatoj itech Pascua. Ijkuak otlankej oiluichijkej, José uan María omokuepkej inchan uan omokuayejyekojkej Jesús oyaya iuan inkalchanejkauan. Pero ijkuak opejkej kitemoaj, amo okajsikej.

Yejuan omokuepkej Jerusalén uan eyi tonal okitemojkej Jesús. Satepan, okajsikej itech teokali. Jesús okatka iuan tlamachtijkej, okinkakiaya uan okintlajtlaniaya miak tlamantli. Tlamachtijkej okintlajtlachialti ken otlajtoaya Jesús, ik non, yejuan opejkej  kitlajtlaniaj. Okintlajtlachialti ken okinnankiliaya uan okitakej Jesús kuali okajsikamatiaya iTlanauatil Jehová.

José uan María sapanoa omotekipachojkej. María okilui Jesús: “Nokone, otimitstemojtokaj. ¿Kanin otikatka?”. Ye okinankili: “¿Amo nankimatij moneki niyetos ichan noTajtsin?”.

Jesús omokuepki Nazaret iuan itatajuan. Ompa, José okimachti Jesús ma kuajxima. ¿Ken timokuayejyekoa okatka Jesús ijkuak telpochtli? Jesús omoskalti uan okatka ixtlamatki. Ik non, toTajtsin Dios uan tlaltikpaktlakamej okachi okitlasojtlayaj.

“Nechyolpaktia nikchiuas motlanekilis, oh noTajtsin Dios uan motlanauatil kajki noijtik” (Salmo 40:8).