Xikita nochi

Tlen kiualika

 TLAMACHTIL 70

Ángeles okitematiltijkej oneski Jesús

Ángeles okitematiltijkej oneski Jesús

Tekiua romano César Augusto okinnauati nochtin judíos ma yakan inmialtepe uan ma moijkuilokan itech se amochtli. Ik non, José uan María oyajkej Belén, porque ikalchanejkauan José ompa oneskej. Uan María yikipiaskia ikonetsin.

Ijkuak oajsitoj Belén, amo okajsikej kanin mokalotiskiaj, ik non, omokalotijkej ijtik se kali kanin omokauayaj yolkamej. Ompa oneski Jesús. María okikimilo ika tsotsoli yamanki uan yolik okitekak kanin tlakuaj yolkamej.

Ik Belén, sekimej tlajpixkej yoak okinmaluijtokaj inmichkauan itech tlalan. San niman, okinmonextili se ángel uan okitakej iueyilis Jehová ken se tlauili tlen opetlaniaya. Tlajpixkej omomojtijkej, pero ángel okinmilui: “Amo ximomojtikan, namechiluis kuali tlajtolmej. Axkan oneski Mesías itech Belén”. Ijkuakon, omonextijkej iluikak sapanoa  miakej ángeles uan okijtojkej: “Ma ueyitito toTajtsin Dios ompa iluikak uan ma yeto yolseuilistli nikan Tlaltikpak”. Satepan, ángeles oyajkej. ¿Tlen okichijkej tlajpixkej?

Tlajpixkej omoiluijkej: “Ma tiakan Belén”. Ik non, san niman oyajkej uan okajsikej José, María uan konetsintli ijtik kali kanin omokauayaj yolkamej.

Omotlajtlachialtijkej nochtin akinmej okimatkej tlen ángel okinmilui tlajpixkej. María okilnamikiaya tlen okijto ángel uan amo keman okilka. Tlajpixkej omokuepkej kanin okatkaj inyolkauan uan okitlasojkamatilijkej Jehová porque okikakej uan okitakej tlen opanok.

“Ne oniwala de Dios itech nin tlaltíkpaktli. Amo oniwala san por Ne oniknek, yej Dios onechaltítlanki” (Juan 8:42).