Xikita nochi

Tlen kiualika

 TLAMACHTIL 71

Jehová okimalui Jesús

Jehová okimalui Jesús

Akinmej ochantiayaj Israel ik kanin kisa Tonaltsin, okineltokayaj sitlalimej okinyekanayaj. Se yoak, sekimej tlakamej tlen oualayaj ik kanin kisa Tonaltsin, okitakej itech iluikak itlaj tlen omotaya ken se sitlali tlen opetlaniaya uan omoliniaya. Yejuan okitokakej non “sitlali” uan oajsitoj hasta Jerusalén. Ninmej tlakamej okintlajtlanijkej akinmej ompa ochantiayaj: “¿Kanin kajki konetl tlen kinnauatis judíos? Tiknekij ixpan timotlankuaketsaskej”.

Herodes otlanauatiaya Jerusalén uan sapanoa omotekipacho ijkuak okimatki yetoskia se yankuik ueyi tekiua. Okintlajtlani tlayekankej teopixkej: “¿Kanin nesiskia non ueyi tekiua?”. Yejuan okinankilijkej: “Teotlajtojkej okijtojkej nesiskia Belén”. Ik non, Herodes okinnotski tlakamej tlen oualayaj ik kanin kisa Tonaltsin uan okinmilui: “Xiakan Belén uan xiktemokan konetl. Satepan, ximokuepakan uan xinechiluikan kanin kajki, porque ne noijki nikneki ixpan nimotlankuaketsas”. Pero amo melauak tlen okijto Herodes.

“Sitlali” opejki oksepa molinia uan tlakamej okitokakej hasta Belén. Ijkuakon, “sitlali” omoketski ikuapak se kali. Ijkuak tlakamej okalakej itech non kali okitakej Jesús uan María. Yejuan omotlankuaketskej ixpan konetl uan okitliokolijkej oro, kopali uan mirra. Pero ¿Jehová okintitlanki nonmej tlakamej kanin okatka Jesús? Amo.

Non yoak, Jehová okilui José itech se kochtemikilistli: “Herodes kineki kimiktis Jesús. Xikinuika Egipto mosiua uan mokone. Ompa ximokauakan uan amo ximokuepakan hasta ijkuak namechiluis amo itlaj namechpanos”. Ik non, yejuan san niman ocholojkej Egipto.

Jehová noijki okinmilui tlakamej tlen oualayaj ik kanin kisa Tonaltsin amo ma mokuepakan kanin okatka Herodes. Ijkuak Herodes okimatki  amo mokuepaskiaj, sapanoa okualanki. Uan ken amo okajsik Jesús, otlanauati ma kinmiktikan nochtin chokotsitsintin tlen okatkaj Belén. Pero Jesús amo itlaj okipanok porque okatka Egipto.

Satepan, Herodes omikik. Ijkuakon, Jehová okilui José: “Ayakmo itlaj namechpanos. Ximokuepakan”. José, María uan Jesús omokuepkej Israel uan opejkej chantij altepetl Nazaret.

“Notlajtol tlen kisa nokamak [...] kuali kisas ijkon ken oniktitlanki” (Isaías 55:11).