Xikita nochi

Tlen kiualika

 TLAMACHTIL 9

Xikueyichiua Jehová iuan mokalchanejkauan

Xikueyichiua Jehová iuan mokalchanejkauan

“Xikweyilikah ye akin okichijchi n ilwikak iwa n tlaltíkpaktli.” (Apocalipsis 14:7)

Itech nin amatlajkuilol yotimomachti Biblia kipia miakej principios tlen mitspaleuiaj tejuatsin uan mokalchanejkauan. Jehová kineki xiyolpakikan. Noijki kijtoa tla timochijchikauas pampa tikueyichiuas, “Dios nomechmakas nochi tlan nomechpolos” (Mateo 6:33). ToTajtsin Dios kineki yetos moyolikni. Ik non, ximochijchikaua pampa kuali timouikas iuan, pampa nin se ueyi tlateochiualistli (Mateo 22:37, 38).

 1 OKACHI KUALI XIMOUIKA IUAN JEHOVÁ

BIBLIA KIJTOA: “Ne niyetos nomotajtsi, iwa nomejwah nonyetoskeh nopilwah iwa nochpochwah, kijtoa n Toteko” Jehová (2 Corintios 6:18). ToTajtsin Jehová kineki yetos moyolikni, uan pampa uelis okachi timotokiskej itech moneki timotlatlaujtiskej. Jehová techiluia: “Ixmostla ximotiotsajtsilijtokah” (1 Tesalonicenses 5:17). Ye kipaktia ma tikiluikan tlen timokuayejyekoaj uan tlen techtekipachoa (Filipenses 4:6). Tla timotlatlaujtia iuan mokalchanejkauan yejuan kitaskej tejuatsin melauak titlaneltoka itech toTajtsin Dios.

Amo san moneki timotlatlaujtiskej ixpan toTajtsin Dios, noijki moneki tikakiskej. ¿Ken uelis tikakiskej? Tla timomachtiaj iTlajtol uan nochi amatlajkuilolmej tlen kisaj itech (Salmo 1:1, 2). Ximokuayejyeko itech tlen timomachtia (Salmo 77:11, 12). Noijki uelis tikakiskej toTajtsin Dios itech tonechikoluan, ik non, miak ipati ma timonechikokan (Salmo 122:1-4).

Noijki uelis okachi kuali timouikas iuan Jehová tla tikintlapouia oksekimej itech ye. Tla okachi titetlapouia, okachi uelis timotokis itech Jehová (Mateo 28:19, 20).

TLEN UELIS TIKCHIUAS:

  • Xikxelo kauitl pampa timotlatlaujtis uan timomachtis Biblia mojmostla

  • Xikinpaleui mokalchanejkauan achto ma kichiuakan iteki toTajtsin Dios uan satepan uelis moyolpaktiskej

2 XIYOLPAKIKAN IJKUAK NANKIUEYICHIUAJ JEHOVÁ KEN KALCHANEJKEJ

BIBLIA KIJTOA: “Xiwalmijkuanikah [noso ximotokikan] inawak Dios, iwa Ye mijkuanis [noso motokis] nomonawak” (Santiago 4:8). Ximokauakan tlen hora uan tlen tonal nankiueyichiuaskej Jehová ken kalchanejkej (Génesis 18:19). Pero noijki moneki tikilnamikis Jehová mojmostla, uan tikinpaleuis mokalchanejkauan pampa kuali ma mouikakan iuan Jehová. Biblia kijtoa: “Moneki [...] tiktlapouis [itech Jehová] ijkuak timotlalis itech mokalijtik uan ijkuak tinemis itech ojtli uan ijkuak timotekas uan ijkuak timeuas” (Deuteronomio 6:6, 7). Moneki tikijtos ken Josué: “Ne uan nokalchanejkauan, tiktekichiuiliskej Jehová” (Josué 24:15).

TLEN UELIS TIKCHIUAS:

  • Xikchiua se programa ika tlen nanmomachtiskej uan ijkon tikinpaleuis nochtin mokalchanejkauan