Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Mokalchanejkauan uelis yolpakiskej

 TLAMACHTIL 6

Tlen mopatla ijkuak nesi se konetl

Tlen mopatla ijkuak nesi se konetl

“Konemej non se tetliokolil tlen kitemaka Jehová.” (Salmo 127:3)

Ijkuak nesis achto konetl uelis kinyolpaktis pero noijki uelis kintekipachos. Uan uelis kintlajtlachialtia ken sapanoa miak kauitl uan chikaualistli kitekitiltiaj pampa kimaluiskej inkone. Pero ken tlakatl uan siuatl amo kochij miak uan sapanoa motekipachoaj non uelis kichiuas ma tlajyouikan. Ik non, yejuan moneki seki tlamantli kipatlaskej pampa kimaluiskej konetl uan pampa ma yolpakikan. ¿Ken uelis namechpaleuis itlanauatiluan Biblia pampa uelis nanyolpakiskej?

 1 XIKAJSIKAMATIKAN KONETL KIPATLA NOCHI MONEMILIS

BIBLIA KIJTOA: “Akin tetlasojtla, kimati texikoa; semi yolyámanki [...], nion kitemoa san tlan ye kipaktia; amo kimati kualani” (1 Corintios 13:4, 5). Siuatl akin yikin kipia ikone, okachi motekipachoa itech ikone. Pero nin uelis kichiuas inamik ma mokuayejyeko ayakmo motekipachoa itech, ik non, siuatl moneki mochijchikauas pampa noijki motekipachos itech. Ika tlasojtlalistli uelis kiteititis kineki uan kipatioita pampa noijki kimaluia konetl.

“Noiwa te, teokich [noso tlakatl], xikajsikamati mosiwa.” (1 Pedro 3:7.) Tla titlakatl uan yikin axkan nankipiaskej mokone, xikajsikamati mosiua mochijchikauas pampa kimaluis konetl, uan uelis sotlauas noso noijki moyolkokos pampa kipia okachi tekitl. Uelis ualeua kualanis mouan, pero amo xikualani, pampa “okachi kuali se tlakatl akin amo niman kualani uan amo se tlakatl tlen kipia miak chikaualistli” (Proverbios 16:32). Kuali ximokuayejyeko uan xikmaka tlen kineki (Proverbios 14:29).

TLEN UELIS TIKCHIUAS:

  • Tlakatl: Xikpaleui monamik ijkuak nankimaluiskej konetl, noijki itech yoak. Xikxelo miak kauitl pampa tiyetos iuan mosiua uan mokone

  • Siuatl: Xikseli tlapaleuilistli tlen mitsmakas monamik pampa kimaluis konetl. Tla amo kuali kichiua amo xikajua, xikmachti ika tlasojtlalistli ken uelis kichiuas

 2 OKACHI KUALI XIMOUIKAKAN

BIBLIA KIJTOA: “Moneki mochiuaskej san se tlalnakayotl” (Génesis 2:24). Maski axkan nankipiaj se konetl, amo xikilkauakan namejuan ok nanyetokej ken “san se tlalnakayotl”. Ximochijchikauakan pampa okachi kuali nanmouikaskej.

Siuatl moneki kitlasojkamatilis tlapaleuilistli tlen kimaka inamik. Tlen kijtoa uelis yetos ken itlaj tlen “tepajtia” (Proverbios 12:18). Tlakatl, moneki tikiluis monamik melauak tiktlasojtla uan tikpatioita nochi tlen kichiua pampa te uan mokone (Proverbios 31:10, 28).

“Amaka mamotekipacho tlan ye kineki kichiwas, yej noiwa mamotekipacho kenomi kinyolchikawas oksikimeh.” (1 Corintios 10:24.) Ximochijchikaua pampa tikchiuas tlen moneki pampa kuali ma yeto monamik uan xikpatioita tlen kichiua. Xikxelokan kauitl pampa nanmotlapouiskej uan ximokakikan. Uan ijkuak san sekan nanmotekaskej noso nankipiaskej relaciones sexuales, namejuan ximoyolpaktikan. Ximotekipacho itech tlen kineki monamik. Biblia kijtoa: “Yika, amo ximonenekikah. Pero tla nonmomeh yononmoyekkajkeh nonkochiskeh nonmijixkoyah” (1 Corintios 7:3-5). Moneki nanmotlapouiskej tlen nanmokuayejyekoaj itech non tlamantli. Tla nanmoajsikamatij okachi kuali nanmouikaskej.

TLEN UELIS TIKCHIUAS:

  • Moneki nankixeloskej kauitl pampa nanyetoskej san sekan

  • Ika seki tlamantli, ken se tetliokolil noso itlaj tlamantli xikteititi tiktlasojtla

 3 XIKMACHTI MOKONE

BIBLIA KIJTOA: “Desde tiselekonetl tikmatok tlan kijtoa itlajkuilol Dios. Ayik xikilkawa tlan kijtoa, porke mitsixtlamachtis iwa mitsmakixtis” (2 Timoteo 3:15). Ximotlapouikan ken nankimachtiskej konetl. Konetl uelis momachtis miak tlamantli maski ayamo nesi. Se neskayotl, uelis mitstenkakis uan noijki kimachilis tlen tikmachilia. Moneki tiktlajtoltilis itlaj maski ok konetl, maski amo mitsajsikamatis non uelis kichiuas satepan ma kipakti kitlajtoltis itlaj.

Noijki moneki tiktlapouis itech toTajtsin Dios. San sekan xiktlatlaujtikan Jehová (Deuteronomio 11:19). Ijkuak nanmauiltiskej, xiktlapoui itech nochi tlen okichijchi toTajtsin Dios (Salmo 78:3, 4). Ijkuak moskaltijtias, kitas namejuan nankitlasojtlaj Jehová uan ye noijki kitlasojtlas.

TLEN UELIS TIKCHIUAS:

  • Xiktlatlaujtikan Jehová ma namechpaleui pampa uelis nankimachtiskej mokone

  • Xikojpaui tlajtolmej tlen miak ipati pampa san niman ma momachti