Xikita nochi

Tlen kiualika

 TLAMACHTIL 7

Ken moneki kinmachtiskej konemej

Ken moneki kinmachtiskej konemej

“Ninmej tlajtolmej tlen axkan nimitsnauatijtok moneki yetoskej ipan moyolo; uan moneki tikmachtis mokone.” (Deuteronomio 6:6, 7)

Ijkuak Jehová okitlali kalchanejkej, okinkauili tetajmej ma kinmaluikan inkoneuan (Colosenses 3:20). Tetajmej moneki kinmachtiskej inkoneuan ma kitlasojtlakan Jehová uan ma yetokan yolkualmej ijkuak moskaltiskej (2 Timoteo 1:5; 3:15). Noijki moneki kimatiskej tlen kipiaj itech inyolo. Pero noijki moneki kinmakaskej se kuali neskayotl. Tetajmej achto moneki kipiaskej iTlajtol toTajtsin Dios itech inyolo pampa uelis kinmachtiskej inkoneuan (Salmo 40:8).

 1 XIKINPALEUI MOKONEUAN PAMPA MOUAN MA MOTLAPOUIKAN

BIBLIA KIJTOA: “Nonnochteh san xitlamatokah ijkuak nonkinkakiskeh oksikimeh, amo san nima xitlajtokah” (Santiago 1:19). Melauak kuali tla tikneki mokoneuan mouan ma motlapouikan. Pero achto moneki kitaskej tejuatsin melauak tikinkakis ijkuak kinekiskej mitstlapouiskej. Ximochijchikaua pampa ma yeto yolseuilistli uan ijkon kinekiskej mitstlapouiskej (Santiago 3:18). Tla yejuan kitaskej tikinmajuas noso tikinpinatis, uelis ayakmo kinekiskej mitstlapouiskej. Ik non, amo xikualani uan nochipa xikinmilui tikintlasojtla (Mateo 3:17; 1 Corintios 8:1).

TLEN UELIS TIKCHIUAS:

  • Xikinkaki ijkuak mokoneuan kinekiskej mitstlapouiskej

  • Ximotlapoui nochipa iuan mokoneuan, amo san ijkuak kipiaj ouijkayotl

2 XIMOCHIJCHIKAUA PAMPA TIKAJSIKAMATIS TLEN MITSILUIAJ

BIBLIA KIJTOA: “Akin kuali mokuayejyekoa kichiua nochi ika ixtlamatilistli” (Proverbios 13:16). Ualeua moneki kuali timokuayejyekos pampa tikajsikamatis tlen kimachiliaj. Miak uelta telpokamej kinpaktia kijtoskej miak tlamantli maski amo ijkon kimachiliaj. “Ijkuak ikaj tlanankilia maski ayamo kikaki tlen kijtoskej, kiteititia melauak xoxo uan mopinatia.” (Proverbios 18:13.) Ik non, amo san niman xikualani (Proverbios 19:11).

TLEN UELIS TIKCHIUAS:

  • Maski san tlen mitsiluis mokone, amo xikualani uan xikaki nochi tlen mitsiluis

  • Xikilnamiki tlen otikmachiliaya uan tlen omitstekipachoaya ijkuak otikatka telpochtli

 3 SAN SEKAN XIKINPALEUIKAN

BIBLIA KIJTOA: “Nomejwah tetajmeh, [...] nomopilwah, xikinyekiskaltikah ika tlanonotsálistli iwa ika itlajtol n Toteko” (Efesios 6:4). Jehová kinkauilia tetajmej ma kinmachtikan inkoneuan. Siuatl uan tlakatl moneki kinmachtiskej inkoneuan pampa ma tetlakaitakan uan ma tetlakamatikan (Efesios 6:1-3). Konemej kitaj ijkuak tetajmej ‘kuali moyekwikah iwa mokuanamikih’ (1 Corintios 1:10). Ik non, tla itlaj amo namechpaktia amo ximokualanikan ixpan nanmokoneuan, pampa nin uelis kichiuas amo ma namechtlakaitakan.

TLEN UELIS TIKCHIUAS:

  • Ximokauakan ken nankinmachtiskej nanmokoneuan

  • Tla tejuatsin uan monamik amo nanmokauaj ken nankinmachtiskej nanmokoneuan, ximochijchikaua pampa tikajsikamatis tlen kijtoa

 4 XIMOKUAYEJYEKO TLEN UELIS TIKCHIUAS

BIBLIA KIJTOA: “Kuali xikmachti telpochtli axkan pampa kuali ma uia” (Proverbios 22:6). Tla tikneki kuali ma yeto inyelis mokoneuan, amo xikinkaua. Moneki timokuayejyekos ken uelis tikinmachtis uan tikinnotsas (Salmo 127:4; Proverbios 29:17). Ijkuak tikintlapouis amo kijtosneki tikintlajyouiltis, kijtosneki tikinpaleuis ma kajsikamatikan tleka ijkon tikchiua (Proverbios 28:7). Xikinmititi noijki ma kitlasojtlakan iTlajtol toTajtsin Dios uan ma mokuayejyekokan itech itlanauatiluan Biblia (Salmo 1:2). Ijkon kipiaskej se kuali inkuayejyekolis (Hebreos 5:14).

TLEN UELIS TIKCHIUAS:

  • Ximochijchikaua pampa mokoneuan ma kitakan toTajtsin Dios ken ikaj akin melauak kajki uan uelis itech tlaneltokaskej

  • Xikinpaleui ma kixmatikan uan ma kixtopeuakan tlen uelis kichiuas ma tlajtlakolchiuakan, tlen onka itech Internet uan redes sociales. Xikinmachti pampa amo ma kinselikan akinmej kinekij kichiuaskej auilnemilistli

“Kuali xikmachti telpochtli axkan pampa kuali ma uia”