Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Kuali tlajtolmej techmaka toTajtsin Dios

 TLAMACHTIL 6

¿Uelis oksepa tikinmitaskej akinmej yomikej?

¿Uelis oksepa tikinmitaskej akinmej yomikej?

1. ¿Ok uelis tikinmitaskej akinmej yomikej?

Se tonal ijkuak Jesús okatka ipan Tlaltikpak, iyolikni Lázaro omikik. Ye ochantiaya Betania, se altepetl tlen amo uejka omokauaya itech Jerusalén. Ijkuak Jesús oajsito, Lázaro yokipiaya naui tonal omikik. Marta uan María ikniuan Lázaro, uan Jesús oyajkej itech mikakoyoktli, uan satepan miakej tlaltikpaktlakamej ompa oajsitoj. ¿Timokuayejyekoa ken oyolpakej Marta uan María ijkuak okitakej Jesús okiyoliti Lázaro?​—Xiktlajtolti Juan 11:21-24, 38-44.

Itech kuali tlajtolmej tlen tikajsij itech Biblia techilia toTajtsin Dios kinyolitis akinmej yomikej. Marta okimatiaya Jehová okijto kinyolitis akinmej yomikej pampa ma chantikan itech Tlaltikpak.​—Xiktlajtolti Job 14:14, 15.

2. ¿Ken katej akinmej yomikej?

ToTajtsin Dios okili Adán: “Te titlali uan timokuepas tlali”​—(GÉNESIS 3:19)

ToTajtsin Dios nochtin otechchijchi ika tlali (Génesis 2:7; 3:19). Amo tikpiaj se espíritu. Ijkuak timikij, amo itlaj mokaua tlen ok yoltok. Ijkuak ikaj miki ayakmo itlaj mokuayejyekoa. Ik non, akinmej yomikej ayakmo itlaj kimachiliaj, nion ayakmo itlaj kintekipachoa. Ik non, ijkuak Lázaro okiyolitijkej amo okijto kox itlaj okipanok.​—Xiktlajtolti Salmo 146:4 uan Eclesiastés 9:5, 6, 10.

Sekimej kijtoaj toTajtsin Dios kintlajyouiltia ijtik tlitl akinmej yomikej, maski ijkon, non amo melauak. Ken yotimomachtijkej, akinmej yomikej ayakmo itlaj kimatij. Ik non, akinmej ijkon kijtoaj san kiistlakauiaj Jehová ijkuak kijtoaj ye tetlajyouiltia itech tlitl, pampa Jehová nion mokuayejyekoa ikaj kitlajyouiltis itech tlitl pampa nin sapanoa amo kipaktia.​—Xiktlajtolti Jeremías 7:31.

 3. ¿Uelis motlapouiskej touan akinmej yomikej?

Akinmej yomikej ayakmo tlajtoaj nion tlakakij (Salmo 115:17). Maski ijkon, katej sekimej ángeles amo yolkualmej, yejuan uelij motlapouiaj iuan tlaltikpaktlakamej uan yejuan mochiuaj ken akinmej yomikej (2 Pedro 2:4). Ik non, Jehová kikualania ma tikyejyekokan timotlapouiskej iuan akinmej yomikej.​—Xiktlajtolti Deuteronomio 18:10, 11.

4. ¿Akinmej kinyolitiskej oksepa?

Miakej tlaltikpaktlakamej tlen yomikej oksepa yoltoskej ipan Tlaltikpak. Noijki Jehová kinyolitis akinmej amo okixmatkej maski okichijkej miak tlamantli amo kuali.​—Xiktlajtolti Lucas 23:43, NM uan Hechos 24:15.

Akinmej kinyolitiskej uelis momachtiskej tlen melauak itech toTajtsin Dios, tlaneltokaskej itech Jesús uan tetlakamatiskej (Apocalipsis 20:11-13). Tla ijkon kichiuaskej yoltoskej nochipa nikan ipan Tlaltikpak.​—Xiktlajtolti Juan 5:28, 29.

5. ¿Tlen techmachtia nin itech Jehová?

Ken Jehová kinyolitis akinmej yomikej non techititia melauak techtlasojtla uan noijki ye yolkuali. Pampa toTajtsin Dios okiualtitlanki iKone ma mikiki topampa, tikpiaj non chialistli. Uan tejuatsin, ¿akin tikneki tikitas ijkuak kinyolitiskej akinmej yomikej?​—Xiktlajtolti Juan 3:16 uan Romanos 6:23.