Xikita nochi

Tlen kiualika

 TLAMACHTIL 1

¿Tlen kuali tlajtolmej onka pampa tejuan?

¿Tlen kuali tlajtolmej onka pampa tejuan?

1. ¿Tlen kuali tlajtoli techmaka toTajtsin Dios?

ToTajtsin Dios kineki nochtin tlaltikpaktlakamej ma yolpakikan itech Tlaltikpak. Ye okichijchi Tlaltikpak uan nochi tlen nikan onka pampa techtlasojtla. Ayakmo miak kauitl poliui uan ye kitlajtlamis nochi tlen kichiua ma yeto tlajyouilistli uan kichiuas nochtin tlaltikpaktlakamej kuali ma yetokan.​—Xiktlajtolti Jeremías 29:11.

Nion se tekiua amo ueli kachiua kokolistli nion mikilistli nion amo ueli kichiua tlaltikpaktlakamej ayakmo ma mokualanikan. Maski ijkon, onka sekimej kuali tlajtolmej: ayakmo miak poliui pampa toTajtsin Dios kintlajtlamis nochtin tekiuajkej uan kitlalis iTekiuajkayo. Uan tlaltikpaktlakamej tlen mokauaskej ipan Tlaltikpak kipiaskej yolseuilistli uan ayakmo mokokoskej.​—Xiktlajtolti Isaías 25:8; 33:24, uan Daniel 2:44.

2. ¿Tleka sapanoa miak ipati ninmej kuali tlajtolmej?

Pampa ayakmo yetos tlajyouilistli itech Tlaltikpak, toTajtsin Dios kinmixpolos nochtin tlaltikpaktlakamej tlen kichiuaj tlen amo kuali (Sofonías 2:3). ¿Uan keman kichiuas? Itech Biblia omoijto tlamantli tlen axkan kintlajyouiltia nochtin tlaltikpaktlakamej. Nochi nin kiteititia ayakmo miak poliui pampa toTajtsin Dios kixpolos nochi tlen amo kuali.​—Xiktlajtolti 2 Timoteo 3:1-5.

3. ¿Tlen moneki ma tikchiuakan?

Moneki timomachtiskej Biblia pampa tikmatiskej itech toTajtsin Dios, Biblia ken se amatlajkuilol tlen se teta kintlajkuililia ikoneuan. Ompa techiluia tlen moneki tikchiuaskej pampa uelis tiyolpakiskej axkan, uan noijki techiluia tlen moneki tikchiuaskej pampa tikpiaskej yolilistli tlen amo keman tlamis nikan itech Tlaltikpak. Uan melauak, amo nochtin kinpaktis ximomachti Biblia. Maski ijkon, amo xikaua non ma mitstsakuili, pampa tlateochiualismej tlen uelis tikselis melauak miak ipati.​—Xiktlajtolti Proverbios 29:25 uan Apocalipsis 14:6, 7.