Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Kuali tlajtolmej techmaka toTajtsin Dios

 TLAMACHTIL 5

¿Tlen kineki kichiuas toTajtsin Dios ipan Tlaltikpak?

¿Tlen kineki kichiuas toTajtsin Dios ipan Tlaltikpak?

1. ¿Tleka toTajtsin Dios okichijchi Tlaltikpak?

Jehová okichijchi Tlaltikpak pampa itech ma tichantikan. Ijkuak toTajtsin Dios okinchijchi achto tlaltikpaktlakamej, Adán uan Eva, amo okinchijchi pampa ma yetokan iluikak. ToTajtsin ​—Dios okinchijchi miakej ángeles pampa ma chantikan iluikak (Job 38:4, 7). Jehová okitlali achto tlakatl Adán itech se kualtsin xochitlali tlen omotokayotiaya Edén (Génesis 2:15-17). Noijki kinkauiliskia Adán uan ikoneuan nochipa ma chantikan itech Tlaltikpak.​—Xiktlajtolti Salmo 37:29 uan 115:16.

Maski ijkon, nin xochitlali Edén amo okatka itech nochi Tlaltikpak. Adán uan Eva omonekiayaj kinpiaskiaj inkoneuan pampa yetoskiaj itech nochi Tlaltikpak, uan yolik kikuepaskiaj nochi Tlaltikpak se xochitlali (Génesis 1:28). Itech Tlaltikpak nochipa yetoskej tlaltikpaktlakamej, Tlaltikpak amo keman poliuis.​—Xiktlajtolti Salmo 104:5.

2. ¿Tleka Tlaltikpak axkan amo se xochitlali?

Pampa Adán uan Eva amo okitlakamatkej toTajtsin Dios okinkixti itech xochitlali Edén. Ik non, Xochitlali Edén opoliuik uan amo ikaj ueli kichiua oksepa ma yeto. Uan Biblia kijtoa: “Tlaltikpak okinmaktilijkej akinmej amo yolkualmej” (Job 9:24). Xiktlajtolti Génesis 3:23, 24.

¿Ayakmo kichiuas toTajtsin Dios tlen okinekiaya kichiuas nikan Tlaltikpak? Kema kichiuas, pampa ye akin kipia sapanoa miak chikaualistli uan nochipa kichiua tlen ye kijtoa (Isaías 45:18). Satepan toTajtsin Dios kichiuas tlaltikpaktlakamej ma yetokan ijkon ken ye okinekiaya.​—Xiktlajtolti Salmo 37:11, 34.

3. ¿Akin kiyektlalis Xochitlali?

Jesús ken ueyi Tekiua itech iTekiuajkayo toTajtsin Dios, kikuepas Tlaltikpak se kualtsin xochitlali. Jesús uan iángeles kinmixpoloskej akinmej amo kitlasojtlaj toTajtsin Dios itech Armagedón. Ijkuakon, itech mil xiuitl kitsakuas Satanás akin  okichi Adán uan Eva amo ma tetlakamatikan. Itekipanojkauan toTajtsin Dios uelis momakixtiskej pampa Jesús kinyekanas uan kinmaluis, uan saiktlami uelis kipiaskej yolilistli tlen amo keman tlamis itech Xochitlali.​—Xiktlajtolti Apocalipsis 20:1-3 uan 21:3, 4.

4. ¿Keman tlamis nochi tlajyouilistli?

¿Keman kitlajtlamis toTajtsin Dios nochi tlen amo kuali? Jesús okijto sekimej tlamantli tlen kiteititiskia keman mochiuaskia non. Nochi tlen amo kuali tlen panotok nikan itech Tlaltikpak kiteititia tiyetokej itech “itlamian tonalmej”.​—Xiktlajtolti Mateo 24:3, 7-14, 21, 22.

“Itech mil xiuitl ijkuak Jesús yetos ken ueyi Tekiua itech iluikak ye kitlajtlamis nochi tlen techtlajyouiltia itech Tlaltikpak (Isaías 9:6, 7; 11:9). Jesús amo san yetos ueyi Tekiua, noijki yetos ueyi teopixki, uan kintlapojpoluis intlajtlakoluan nochtin tlaltikpaktlakamej akinmej kitlasojtlaj toTajtsin Dios. Ijkon, toTajtsin Dios ika Jesús kitlajtlamis kokolistli, ayakmo tiueuejtiskej noso tikokoxkatiskej uan noijki ayakmo timikiskej.​—Xiktlajtolti Isaías 25:8 uan 33:24.

5. ¿Akinmej yetoskej itech Xochitlali?

Itech Kali kanin Monechikoaj iTlaixpantijkauan Jehová, tikinmixmatis akinmej kitlasojtlaj Jehová uan kinekij kichiuaskej itlanekilis

Tlaltikpaktlakamej tlen kitlakamatij toTajtsin Dios yetoskej itech Xochitlali (1 Juan 2:17). Jesús okinnauati imachtijkauan ma kintemokan tlaltikpaktlakamej tlen yolkualmej pampa ma kinmachtikan tlen uelis kichiuaskej pampa toTajtsin Dios ma kinseli. Axkan, Jehová noijki kinmachtijtok miakej tlaltikpaktlakamej pampa uelis yetoskej itech Xochitlali (Sofonías 2:3). Akinmej yauij itech Kalmej kanin Monechikoaj iTlaixpantijkauan Jehová —kanin nochtin kalchanejkej kitekichiuiliaj toTajtsin Dios— ompa momachtiaj ken uelis kuali mouikaskej akinmej yomonamiktijkej, ken uelis kuali kinmiskaltiskej inkoneuan uan noijki ken uelis mopaleuiskej ika kuali tlajtolmej tlen kijtoa Biblia.​—Xiktlajtolti Miqueas 4:1-4.