Xikita nochi

Tlen kiualika

 TLAMACHTIL 8

¿Tleka toTajtsin Dios kikajtok ma titlajyouikan uan ma mochiua tlen amo kuali?

¿Tleka toTajtsin Dios kikajtok ma titlajyouikan uan ma mochiua tlen amo kuali?

1. ¿Ken opejki tlen amo kuali?

Itech nochi tonalmej tlen Jehová yokinkauili tlaltikpaktlakamej ma tlanauatikan, yomoteititi yejuan amo uelij kachiuaj ouijkayotl

Tlamantli tlen amo kuali opejki itech Tlaltikpak ijkuak Satanás achto otlakajkaya. Achto ye okatka se ángel yolkuali uan amo okipiaya tlajtlakoli, maski ijkon, ye amo kijtoa tlen melauak (Juan 8:44). Yolik okinektia ma kiueyichiuakan, maski ijkon, nin san kinamiki akin oTechchijchi. Satanás okikajkaya achto siuatl Eva, pampa ma kitlakamati ye uan amo toTajtsin Dios. Adán noijki amo okitlakamatki toTajtsin Dios ijkon ken isiua. Pampa yejuan amo okitlakamatkej toTajtsin Dios axkan titlajyouiaj uan timikij.​—Xiktlajtolti Génesis 3:1-6, 19.

Ijkuak Satanás okichi Eva amo ma kitlakamati Jehová, Satanás opejki kixnamiki toTajtsin Dios, pampa san Jehová kinamiki tlanauatis. Uan axkan miakej tlaltikpaktlakamej katej inauak Diablo uan amo kinekij ma kinnauati toTajtsin Dios, ik non, axkan Satanás omochi akin “kinnauatia in tlaltikpaktlakaj”.​—Xiktlajtolti Juan 14:30 uan 1 Juan 5:19.

2. ¿Itlaj amo kuali okichijchi toTajtsin Dios?

Nochi tlen okichijchi toTajtsin Dios amo okipiaya tlajtlakoli. Ik non, achto tlaltikpaktlakamej uan ángeles uelis kitlakamatiskiaj nochi itlanauatiluan toTajtsin Dios (Deuteronomio 32:4, 5). ToTajtsin Dios techkauilia ma tikpejpenakan tla tiknekij tikchiuaskej tlen kuali noso tlen amo kuali. Non techkauilia ma tiktlakamatikan pampa tiktlasojtlaj.​—Xiktlajtolti Santiago 1:13-15 uan 1 Juan 5:3.

3. ¿Tleka toTajtsin Dios ok kikajtok ma titlajyouikan?

Jehová san seki kauitl kitekauilijtok ma kixnamikikan itlanauatilis. ¿Tleka? Pampa kiteititis ken nion se tekiuajkayotl tlen amo okitlali toTajtsin Dios amo uelis kinpaleuis tlaltikpaktlakamej (Eclesiastés 7:29; 8:9). Uan itech chikuase mil xiuitl tlen yopanokej tikitaj ken nion se tekiua  itech Tlaltikpak amo uelis kachiuas guerras, kokolistli uan nochi tlen amo kuali.​—Xiktlajtolti Jeremías 10:23 uan Romanos 9:17.

Maski ijkon, tla tejuan tikauaj ma technauati toTajtsin Dios, tikseliskej miakej tlateochiualismej (Isaías 48:17, 18). Ayakmo miak poliui uan Jehová kinmixpolos nochtin tekiuajkej itech Tlaltikpak. Itech Tlaltikpak san mokauaskej tlaltikpaktlakamej tlen kipaleuiaj iTekiuajkayo toTajtsin Dios (Isaías 11:9).​—Xiktlajtolti Daniel 2:44.

Xikita video ¿Tleka toTajtsin Dios ok kikajtok ma titlajyouikan?

4. Pampa Jehová ok mochixtok, ¿tlen uelis tikchiuaskej?

Satanás okijto tlaltikpaktlakamej san kitekichiuiliaj toTajtsin Dios ijkuak kuali yetokej. Pampa toTajtsin Dios ok mochixtok, moneki nochtin tikteititiskej ika tlen tikchiuaj ken Satanás tlakajkayaua, uan noijki moneki tikteititiskej tejuan tikpaleuiaj iTekiuajkayo toTajtsin Dios, uan amo itekiuajkayo tlaltikpaktlakamej.​—Xiktlajtolti Job 1:8-12 uan Proverbios 27:11.

5. ¿Ken tikteititiaj tiknekij toTajtsin Dios ma tlanauati?

Ika tlen tikchiuaj tikteititiaj tla tiknekij ma technauati iTekiuajkayo toTajtsin Dios

Achto moneki tikmatiskej ken kineki toTajtsin Dios ma tikueyichiuakan, uan noijki moneki tiyetoskej itech tlaneltokalistli tlen melauak, tlaneltokalistli tlen tlamachtia tlen kijtoa Biblia (Juan 4:23). Uan noijki tla tejuan tikchiuaj ken Jesús uan amo timokajkalakiaj itech guerras nion política, ijkon tikteititiskej amo tikpaleuiaj itekiuajkayo Satanás.​—Xiktlajtolti Juan 17:14.

Ika ichikaualis, Satanás kichiua tlaltikpaktlakamej ma auilnemikan uan ma kichiuakan miak tlamantli tlen amo kuali. Ijkuak tikixtopeuaskej nochi nin tlamantli, uelis sekimej toyolikniuan noso tochanejkauan techpinatiskej noso techtlajyouiltiskej (1 Pedro 4:3, 4). Tla ijkon techpanoa, ma timouikakan iuan akinmej kitlasojtlaj toTajtsin Dios uan ma tiktlakamatikan itlanauatiluan. Tla ijkon tikchiuaj, tikteititiskej Satanás otlakajkaya ijkuak okijto amo ikaj kitlakamati toTajtsin Dios ijkuak tlajyouia. Xiktlajtolti 1 Corintios 6:9, 10 uan 15:33.

Amo miak kauitl poliui uan toTajtsin Dios kitlajtlamis nochi tlen amo kuali pampa ye techtlasojtla. Akinmej tlaneltokaskej itech toTajtsin Dios, yolpakiskej uan kipiaskej yolilistli tlen amo keman tlamis nikan ipan Tlaltikpak.​—Xiktlajtolti Juan 3:16.