Xikita nochi

Tlen kiualika

 TLAMACHTIL 10

¿Ken uelis tikmatis katli tlaneltokalistli tlen melauak?

¿Ken uelis tikmatis katli tlaneltokalistli tlen melauak?

1. ¿Onka san se tlaneltokalistli tlen melauak?

‘Ximomaluikan itech tlakamej tlen teixkajkayauaj.’​—(MATEO 7:15)

Jesús uan imachtijkauan okatkaj itech tlaneltokalistli tlen melauak, tlen okineskayoti ken se ojtli tlen kitemaka yolilistli, maski ijkon, amo miakej tlaltikpaktlakamej kajsij (Mateo 7:14). ToTajtsin Dios san kineki ma tikueyichiuakan ken ijkuilitok itech iTlajtol, Biblia. Uan akinmej ijkon kichiuaj kipiaj san se tlaneltokilistli.​—Xiktlajtolti Juan 4:23, 24; 14:6, uan Efesios 4:4, 5.

2. ¿Tlen okijto Jesús itech akinmej amo kichiuaj ken ye?

‘Yejuan kijtoaj kixmatij toTajtsin Dios, maski ijkon, ika tlen yejuan kichiuaj moita non amo melauak.’​—(TITO 1:16)

Jesús okijto yetoskiaj tlaltikpaktlakamej tlen kinkajkayauaskiaj akinmej kichiuaj ken Cristo. Ninmej tlaltikpaktlakamej uan tlaneltokalismej kanin katej kijtoaj kichiuaj ken Cristo. Yejuan kinkajkayaua miakej tlaltikpaktlakamej, pampa kijtoaj tlamachtiaj tlen melauak. Axkan tejuan uelis kuali tikmatiskej katli tlaneltokalistli tlen melauak, pampa akinmej katej itech non tlaneltokalistli kichiuaj ijkon ken akinmej melauak kichiuaj ken Cristo.​—Xiktlajtolti Mateo 7:13-23.

3. ¿Akinmej melauak kichiuaj ken Cristo?

Ma tikitakan makuili tlamantli tlen san yejuan kichiuaj:

  • Kitlakaitaj Biblia pampa kimatij non iTlajtol toTajtsin Dios. Akinmej melauak kichiuaj ken Cristo mochijchikauaj miak pampa kitlakamatiskej nochi tlanauatilmej tlen katej itech Biblia, uan amo kichiuaj ken tlamachtiaj tlaltikpaktlakamej (Mateo 15:7-9). Uan kichiuaj ken tetlapouiaj.​—Xiktlajtolti Juan 17:17 uan 2 Timoteo 3:16, 17.

  •   Kiueyichiuaj itoka toTajtsin Dios, Jehová. Jesús ijkon okichi ijkuak okitematilti itoka iTajtsin. Okintlapoui tlaltikpaktlakamej itech Jehová uan okinmachti ma motlatlaujtikan ma moueyichiua itoka Jehová (Mateo 6:9). ¿Kanin tejuatsin tichanti tlen tlaneltokalistli kitematiltia iToka toTajtsin Dios?​—Xiktlajtolti Juan 17:26 uan Romanos 10:13, 14.

  • Tetlapouiaj itech iTekiuajkayo toTajtsin Dios. ToTajtsinDios okiualtitlanki Jesús nikan Tlaltikpak pampa ma tetlapoui kuali tlajtolmej itech Tekiuajkayotl, san non Tekiuajkayotl melauak kinpaleuis tlaltikpaktlakamej. Uan ye otetlapoui itech non Tekiuajkayotl nochi tonalmej tlen oyoltoka (Lucas 4:43; 8:1; 23:42, 43,NM). Uan noijki okijto imachtijkauan tetlapouiskiaj itech nin Tekiuajkayotl. Ik non, tla ikaj mitstlapouia itech iTekiuajkayo toTajtsin Dios, ¿itech tlen tlaneltokalistli kajki?​—Xiktlajtolti Mateo 24:14.

  • Amo kichiuaj ken tlaltikpaktlakamej tlen amo yolkualmej. Imachtijkauan Jesús amo mokajkalakiaj itech política nion ijkuak tlaltikpaktlakamej mokualaniaj (Juan 17:16; 18:36). Noijki amo kichiuaj nion mokuayejyekoaj tlamantli tlen amo kuali tlen kichiuaj tlaltikpaktlakamej.​—Xiktlajtolti Santiago 4:4.

  • Yejuan melauak motlasojtlaj uan ijkon moita. ITlajtol toTajtsin Dios kinmachtiaj ma kintlakaitakan nochtin tlaltikpaktlakamej, maski san kanin uitsej. Tlaneltokalismej tlen amo melauak mokajkalakiaj itech guerras, maski ijkon, akinmej melauak kichiuaj ken Cristo amo mokajkalakiaj (Miqueas 4:1-3). ITlaixpantijkauan Jehová ika nochi inyolo kixeloaj kauitl uan tlen kipiaj pampa kinpaleuiskej oksekimej.​—Xiktlajtolti Juan 13:34, 35 uan 1 Juan 4:20.

4. ¿Tejuatsin ueli tikita tlaneltokalistli tlen melauak?

¿Tlen tlaneltokalistli tlamachtia nochi ijkon ken kijtoa Biblia? ¿Tlen tlaneltokalistli kiueyichiua itoka toTajtsin Dios uan tetlapouia itech iTekiuajkayo tlen melauak kinpaleuis tlaltikpaktlakamej? ¿Tlen tlaneltokalistli melauak motlasojtla uan amo mokajkalakia itech guerras? ¿Tlen tikijtoa tejuatsin?​—Xiktlajtolti 1 Juan 3:10-12.