Xikita nochi

Tlen kiualika

 TLAMACHTIL 13

¿Tlen kijtoa Biblia kinpanos tlaneltokalismej?

¿Tlen kijtoa Biblia kinpanos tlaneltokalismej?

1. ¿Techpaleuiaj nochi tlaneltokalismej?

Itech nochi tlaneltokalismej katej tlaltikpaktlakamej yolkualmej. Uan kuali tikmatiskej toTajtsin Dios kinpatioita ninmej tlaltikpaktlakamej. Maski ijkon, miakej kitekitiltiaj tlaneltokalistli pampa kichiuaskej miak tlamantli tlen amo kuali (2 Corintios 4:3, 4; 11:13-15). Kemantika momati ken itech tlaneltokalismej yetokej tlaltikpaktlakamej tlen kinmiktiaj oksekimej, mokajkalakiaj itech guerras, kinmiktiaj akinmej uitsej itech okse ueyi altepetl uan konemej kinchiuiliaj miak tlamantli tlen amo kuali. ¡Uan nin melauak kinyolkokoaj tlaltikpaktlakamej akinmej melauak tlaneltokaj itech toTajtsin Dios!​—Xiktlajtolti Mateo 24:3-5, 11, 12.

Tlaneltokalistli tlen melauak kitlakaita Jehová uan tlaneltokalistli tlen amo melauak kiyolkokoa. Tlaneltokalistli tlen amo melauak tlakajkayauaj itech toTajtsin Dios uan itech ken katej akinmej yomikej, uan itech miak tlamantli tlen amo ijkuilitok itech Biblia. Maski ijkon, Jehová kineki tlaltikpaktlakamej ma kimatikan akin melauak ye.​—Xiktlajtolti Ezequiel 18:4 uan 1 Timoteo 2:3-5.

2. ¿Tlen kijtoa Biblia kinpanos tlaneltokalismej?

ToTajtsinDios amo kipaktia tlaneltokalismej tlen kijtoaj kitlasojtlaj, maski ijkon, ika tlen kichiuaj kiteititiaj kitlasojtlaj tlen amo kuali tlen Satanás kineki ma kichiuakan (Santiago 4:4). Biblia kintokayotia nochi tlaneltokalismej tlen amo melauak “Ueyikan de Babilonia”, nin tokayotl techilnamiktia altepetl tlen yiuejkika okatka kanin opejki tlaneltokalistli tlen amo melauak, satepan ijkuak opanok Apachiuilistli. Ayakmo miak poliui uan toTajtsin Dios kinpojpolos nochi tlaneltokalismej tlen kinkajkayauaj uan kintlajyouiltia tlaltikpaktlakamej.​—Xiktlajtolti Apocalipsis 17:1, 2, 5, 16, 17 uan 18:8.

ToTajtsin Jehová kimati itech tlaneltokalismej tlen amo melauak yetokej tlaltikpaktlakamej tlen yolkualmej uan kinnechikojtok. ¿Ken kichijtok? Kinmachtijtok tlen melauak.​—Xiktlajtolti Miqueas 4:2, 5.

 3. ¿Tlen moneki kichiuaskej akinmej melauak yolkualmej?

Tlaneltokalistli tlen melauak kinsentilia tlaltikpaktlakamej

Jehová motekipachoa itech tlaltikpaktlakamej tlen kitlasojtlaj tlen melauak uan kinekij kichiuaskej tlen kuali. Ik non, kinyoleua ma kisakan itech tlaneltokalismej tlen amo melauak. Tla melauak kitlasojtlaj Jehová, kinekiskej kipatlaskej innemilis uan ijkon kiyolpaktiskej.​—Xiktlajtolti Apocalipsis 18:4.

Itech achto siglo, miakej kuali okiselijkej tlajtolmej tlen itlatitlaniluan Jesús okintlapouijkej. Jehová okinmili tlen omonekiaya kichiuaskej pampa kuali yetoskiaj, kimatiskiaj tlen kichiuaskiaj uan yolpakiskiaj, uan pampa tlaneltokaskiaj itech. Ijkon ken yejuan, noijki moneki kuali tikseliskej ninmej kuali tlajtolmej, uan nin tikchiuaskej ijkuak okachi tikpatioitaskej tikchiuaskej tlen Jehová kineki.​—Xiktlajtolti 1 Tesalonicenses 1:8, 9 uan 2:13.

Jehová kuali kinselia akinmej kisaj itech tlaneltokalistli tlen amo melauak uan peuaj tlaneltokaj itech tlen melauak. Nochtin yejuan mouikaj iuan toTajtsin Dios, noijki kipiaj miakej ikniuan tlen kintlasojtlaj uan noijki uelis yoltoskej nochipa nikan Tlaltikpak. ¿Mitspaktiskia tikselis ninmej tlateochiualismej?​—Xiktlajtolti Marcos 10:29, 30 uan 2 Corintios 6:17, 18.

4. ¿Tlen kichiuas toTajtsin Dios pampa itech nochi Tlaltikpak ma yeto yolseuilistli uan yolpakilistli?

Ijkuak Jehová kixpolos tlaneltokalistli tlen amo melauak, yetos yolseuilistli itech nochi Tlaltikpak. Tlaneltokalistli tlen amo melauak ayakmo kinkajkayauas tlaltikpaktlakamej nion ayakmo kichiuas ma mokualanikan. Nochtin tlaltikpaktlakamej kiueyichiuaskej san akin melauak toTajtsin Dios. ¿Amo melauak nin se kuali tlajtoli?​—Xiktlajtolti Apocalipsis 18:20, 21 uan 21:3, 4.