Xikita nochi

Tlen kiualika

 OKSEKI TLAMACHTILMEJ

Tlamantli tlen kipia san tepitsin estli uan ken tlapajtiaj

Tlamantli tlen kipia san tepitsin estli uan ken tlapajtiaj

Tlamantli tlen kipia san tepitsin estli. Tlamantli tlen kipia san tepitsin estli kisa itech naui tlamantli tlen kipia estli: glóbulos rojos, glóbulos blancos, plaquetas uan plasma. Se neskayotl, itech glóbulos rojos kikixtiaj se proteína tlen itoka hemoglobina. Ika hemoglobina tlen kisa itech tlaltikpaktlakatl, noso itech se yolkatl, kinchijchiuaj pajmej tlen ika kinpajtiaj akinmej estlamij, noso ijkuak sapanoa eskisaj.

Okseki tlamantli kisa itech plasma, se tlamantli tlen kipia estli tlen okachi kipia atl (kanaj 90%) uan noijki kipia miakej hormonas, sales inorgánicas, enzimas uan nutrientes ken minerales uan azúcares. Plasma noijki kipia tlamantli pampa tla ikaj eskisa, kichiua ma moketsa estli, kipia anticuerpos tlen tlapaleuia itech kokolistli uan proteínas ken albúmina. Tla moita ikaj uelis kajsis se kokolistli, akinmej tlapajtiaj uelis kiluiskej ma kimotlalili inyecciones de gammaglobulina, tlen kipia anticuerpos tlen kisa itech plasma, tlen kikixtiaj itech tlaltikpaktlakamej tlen ayakmo uelis kinmajsis non kokolistli. Itech glóbulos blancos kikixtiaj seki tlamantli ken interferones uan interleuquinas tlen ika kinpajtiaj akinmej kinmajsi se kokolistli (virus) uan akinmej kipiaj tlatlamantli cáncer.

Akinmej kichiuaj ken Cristo, ¿uelis mopajtiskej ika tlamantli tlen kipia san tepitsin estli? Biblia amo kijtoa nochi tlen moneki tikchiuaskej, ik non, moneki tisejse tiktekitiltiskej  totlalnamikilis pampa tikpejpenaskej tlen kuali iixpan toTajtsin Dios. Sekimej amo kiseliaj nion tepitsin tlamantli tlen kisa itech estli, pampa kijtoaj ijkuak toTajtsin Dios okinmakak Tlanauatil israelitas, okinmilui ijkuak okinmiktiayaj yolkamej omonekiaya ‘kinokiskej ipan tlali’ inmieso (Deuteronomio 12:22-24). Oksekimej, maski amo kiseliaj ma kintlalilikan estli noso naui tlamantli tlen kipia estli, kinekij kiseliskej itlaj tlen kipia san tepitsin estli. Kiseliaj pampa kijtoaj non tlamantli tlen kipia san tepitsin estli, ayakmo kineskayotia iyolilis tlaltikpaktlakatl nion yolkatl tlen itech okikixtijkej.

Ijkuak monekis tikpejpenas kox tikselis tlamantli tlen kipia san tepitsin estli, moneki timotlajtlanis: “¿Kuali nikmatok tla amo nikselis tlamantli tlen kipia san tepitsin estli, nikinmixtopejtok pajmej tlen kikixtiaj itech estli tlen uelis nechpaleuis itech kokolistli tlen nikpia noso tlen uelis kichiuas ma moketsa noeso? ¿Ken uelis nikyekiluis akin nechpajtia tleka nikselia noso amo, tlamantli tlen kipia san tepitsin estli?”.

Ijkuak kichiuaj se operación. Tla moneki se operación, akinmej tlapajtiaj kimatij kichiuaskej miak tlamantli pampa amo sapanoa ma eskisa akin kipajtiskej. Uelis kitlaliliskej ieso seki tlamantli (hemodilución). Kixeloaj ieso akin kipajtijtokej uan kitlaliaj ijtik seki bolsas uan kitlaliliaj seki líquidos pampa ma momiaktili. Ijkuak kichijtokej operación noso ijkuak tlamij kichiuaj, estli tlen okixelojkej oksepa kitlaliliaj akin kipajtijtokej. Uan ika recuperación de sangre kinechikoaj estli ijkuak kichiuaj se operación. Estli tlen kisaj kanin okitekej akin kipajtijtokej kichipauaj  uan satepan oksepa kitlaliliaj. Pampa akinmej tlapajtiaj tlatlamantli kichiuaj nin, tla kichiuiliskej nin tlamantli akin kichiua ken Cristo, moneki kitlajtlanis akin kipajtis ken kichiuas.

Ijkuak tikpejpenaskej kox timopajtiskej ika se tlamantli tlen yotikitakej, moneki ma timotlajtlanikan: “Tla kixeloskej noeso itech notlalnakayo noso kitsakuiliskej, ¿nechkauilis notlalnamikilis ok ma nikita noaxka non estli uan amo monekis ‘niknokis ipan tlali’?” (Deuteronomio 12:23, 24). “¿Uelis nechkuejsos  notlalnamikilis tlen yonikmachti ika Biblia tla ijkuak nechpajtiskej nechkixtiliskej noeso, kichipauaskej uan oksepa nechtlaliliskej?” “¿Nikajsikamati ijkuak nechpajtiskej tla amo nikselis ma kitekitiltikan noeso, noijki kijtosneki amo nikneki ma nechchiuilikan análisis de sangre, hemodiálisis uan noijki amo uelis kitekitiltiskej bomba de circulación extracorpórea?”

Akinmej tikchiuaj ken Cristo, moneki toselti tikijtoskej ken motekitiltis toeso ijkuak techchiuiliskej se operación. Noijki moneki kuali timokuayejyekoskej itech pruebas uan terapias kanin moneki techkixtiliskej tepitsin estli, kipatlaskej tepitsin uan oksepa techtlaliliskej.