Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

“Xiyetokan itech itlasojtlalis toTajtsin Dios”

 TLAMACHTIL 14

Amo keman ma titlakajkayauakan

Amo keman ma titlakajkayauakan

“Tiknekij kuali tiyeknemiskej itech nochi tlamantli.” (HEBREOS 13:18, TNM.)

1, 2. ¿Tleka Jehová yolpaki ijkuak kita timochijchikauaj amo titlakajkayauaskej? Xikyekijto ika se neskayotl.

SE CHOKOTSIN iuan inantsin ualkisaj kanin tlanemakaj. Chokotsin san niman moketsa uan itech iixko moita momojtia. Itech ima kipia se auili tlen okitilanki kanin tlanemakaj. Ye omokuayejyekojtoka kitlalis kanin okitilanki, noso kiluis inantsin ma kikouili, pero okilka kiluis. Axkan peua choka uan kinotsa inantsin ma kipaleui. Ye kiyolseuia uan kiuika ma kitemakati auili tlen okitilanki uan ma motlapojpoluiti. Ijkuak chokotsin kitemaka auili, inantsin sapanoa yolpaki. ¿Tleka?

2 Tetajmej okachi yolpakij ijkuak kinmitaj inkoneuan mochijchikauaj amo tlakajkayauaskej. Noijki ijkon kita toTajtsin Dios tlen kajki iluikak, akin “amo weletis techkajkayawas” (Hebreos 6:18). Ijkuak Jehová kita ken mochikajti totlaneltokilis, sapanoa yolpaki pampa timochijchikauaj amo titlakajkayauaskej. Pampa tiknekij tikyolpaktiskej uan tiknekij tiyetoskej itech itlasojtlalis, tikchiuaj tlen okijkuilo Pablo: “Tiknekij kuali tiyeknemiskej itech nochi tlamantli” (Hebreos 13:18, TNM). Ik non, ma tikitakan naui tlamantli tlen okachi ipati itech tonemilis kanin sapanoa oui techchiuilia amo titlakajkayauaskej. Satepan tikitaskej seki tlateochiualismej tlen tikpiaskej tla amo titlakajkayauaskej.

AMO MA TIMOKAJKAYAUAKAN

3-5. 1) ¿Ken technejmachtia Biblia uelis timoouijtiliskej tla timokajkayauaj? 2) ¿Tlen uelis techpaleuis amo timokajkayauaskej?

3 Achto, moneki timochijchikauaskej pampa amo timokajkayauaskej.  Pampa titlajtlakolejkej amo oui se mokajkayauas. Ma tikitakan se neskayotl, Jesús okinmilui akinmej ochantiayaj Laodicea san inselti omokajkayajtokaj, pampa omokuayejyekoayaj okipiayaj nochi maski amo melauak, pampa ‘amitla okipiayah, amo otlachiayah iwa xipetstikeh’ okatkaj itech intlaneltokilis, itlaj tlen sapanoa tetekipacho (Apocalipsis 3:17). Okachi omoouijtilijkej pampa san yejuan omokajkayajtokaj.

4 Xikilnamiki tlen otechnejmachti Santiago: “Tla ikaj mokuayejyekoa kuali kiueyichijtok toTajtsin Dios uan amo kinauatia inenepil, san kikajkayajtok iyolo, uan iueyichiualis amo itlaj ipati” (Santiago 1:26, TNM). Tla timokuayejyekoskej Jehová kiselis ken tikueyichiuaj maski amo kuali tiktekitiltiaj tonenepil, san toselti timokajkayauaj. Jehová amo kiselis tla ijkon tikchiuaj, pampa non amo itlaj ipati. ¿Tlen techpaleuis amo ijkon ma techpano?

5 Noijki itech achto tlaxelolmej, Santiago kineskayotia iTlajtol toTajtsin Dios ken se teskatl. Ye techiluia ma timoitakan itech iTlanauatil toTajtsin Dios pampa ma tikmatikan tlen moneki tikyektlaliskej itech tonemilis (xiktlajtolti Santiago 1:23-25). Biblia techpaleuia amo ma timokajkayauakan uan ma tikitakan itech tlen moneki ma timoyektlalikan (Lamentaciones 3:40; Ageo 1:5). Noijki ma timotlatlaujtikan itech Jehová, ma tiktlajtlanilikan ma kita ken tikpiaj tonemilis, uan ma techpaleui ma tikyektlalikan tla itlaj amo kuali tikchijtokej (Salmo 139:23, 24). Sapanoa amo kuali titlakajkayauaskej, ik non, moneki tikitaskej ken toTajtsin Dios kita non. Proverbios 3:32 kijtoa: “Pampa Jehová kikokolia akin kitlatia iyelis, pero Ye kuali mouika iuan akinmej yolmelauakej”. Jehová uelis techpaleuis ma tikkokolikan non uan timotaskej ken ye techita. Xikilnamiki tlen okijto Pablo: “Tiknekij kuali tiyeknemiskej itech nochi tlamantli”. Pampa titlajtlakolejkej, moneki timochijchikauaskej ika nochi toyolo amo titlakajkayauaskej.

 AMO MA TIKINKAJKAYAUAKAN TOKALCHANEJKAUAN

Tla tiyolmelauakej, amo keman itlaj tiktlatiskej

6. ¿Tleka akinmej yomonamiktijkej moneki moluiskej tlen melauak, uan tlen moneki kixtopeuaskej?

6 Noijki kalchanejkej tlen kichiuaj ken Cristo moneki ma kinmixmatikan ken akinmej amo tlakajkayauaj. Akinmej yomonamiktijkej moneki moyektlapouiskej uan moluiskej tlen melauak. Akinmej yomonamiktijkej amo ma kichiuakan itlaj tlen sokio, ken ijkuak kinojnotstinemij akin amo innamik, san ichtaka moixmatij iuan ikaj itech Internet, noso kimauisoaj san tlen pornografía. Sekimej tlen kichiuaj ken Cristo ijkon kichiuaj, nemij san ichtaka iuan ikaj uan kikajkayauaj innamik. Xikita tlen okijto ueyi tekiua David: “Amo nimouika iuan akinmej tlakajkayauaj, uan nikinmixtopeua akinmej kitlatiaj inyelis” (Salmo 26:4). Tla yotimonamikti, amo keman xikchiua itlaj tlen ika uelis tikkajkayauas monamik.

7, 8. ¿Tlen neskayomej kinpaleuis konemej amo ma tlakajkayauakan?

7 Tetajmej, xiktekitiltikan ika ixtlamatilistli neskayomej tlen kipia Biblia pampa nankinmachtiskej namokoneuan amo ma tlakajkayauakan. Katej inneskayo akinmej otlakajkayajkej, ken Acán akin otlachteki uan amo okinekiaya ikaj ma kimati, Guehazí akin noijki otlakajkaya pampa okinekiaya kipias itlaj, uan Judas akin otlachteki uan otlakajkaya pampa kitlajyouiltis Jesús (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).

 8 Noijki katej inneskayo akinmej amo otlakajkayajkej, ken Jacob, akin okinmilui ikoneuan ma kikauatij oksepa tomin tlen okajsikej ijtik inkoxtaluan pampa omokuayejyekojkej ikaj omotlapololti uan ompa okitlali. Uan ijkuak Jefté okilui Jehová itlaj kimakas, iichpoch okichi ijkon pampa okitlakaitaya itajtsin, uan noijki Jesús, okinmilui akinmej okualantokaj ye akin okitemoayaj pampa ijkon mochiuaskia tlen achto omoijkuilo itech Biblia, uan pampa kinpaleuiskia iyolikniuan (Génesis 43:12; Jueces 11:30-40; Juan 18:3-11). Ninmej san seki neskayomej tlen tikinmajsij itech Biblia tlen uelis kitekitiltiskej tetajmej pampa kinmachtiskej inkoneuan uan kinmititiskej amo kuali ma tlakajkayauakan.

9. ¿Tlen amo kichiuaskej tetajmej tla kinekij kinmakaskej se kuali neskayotl inkoneuan, uan tleka miak ipati?

9 Tetajmej moneki sapanoa mochijchikauaskej kinmachtiskej inkoneuan pampa non inteki. Ik non, Pablo otlajtlanki: “Tla te tikinmachtia oksikimeh, ¿tleka amo timomachtia san te monewia? Iwa tla tikinmilia oksikimeh amokuali se matlachteki, ¿tleka te titlachteki?” (Romanos 2:21). Sekimej tetajmej san okachi kintlapololtiaj inkoneuan pampa kinmachtiaj amo ma tlachtekikan, pero yejuan tlachtekij. Ijkuak yejuan itlaj kitilanaj kijtoaj: “Tlaltikpaktlakamej yikimatij sekimej kitilanaskej ninmej tlamantli”. Uan ijkuak kijtoaj tlen amo melauak, kijtoaj: “Amo onitlajtlakolchi, san tepitsin onitlakajkaya”. Maski patio noso amo tlen kitilanaj, yitlachtektokej, uan akin kijtoa san tlen tlamantli, yitlakajkayajtok (xiktlajtolti Lucas 16:10). * Konemej san niman kitaj ijkuak ikaj amo kichiua tlen kijtoa uan non okachi kintlapololtia (Efesios 6:4). Pero ijkuak kinmitaj intatajuan amo tlakajkayauaj, yejuan noijki kiueyichiuaj Jehová itech nin Tlaltikpak kanin sapanoa tlakajkayauaj (Proverbios 22:6).

 AMO MA TITLAKAJKAYAUAKAN ITECH TLANECHIKOL

10. ¿Tleka moneki timomaluiskej itech tlen timotlapouiaj pampa amo tikinkajkayauaskej tokniuan?

10 Itech tlanechikol nochipa uelis tikteititiskej amo titlakajkayauaj. Ken otimomachtijkej itech tlamachtil 12, moneki timomaluiskej ken titlajtoaj, okachi iuan tokniuan. Ijkuak san tlen timotlapouiaj uelis timokajkalakiskej kanin amo totekij, noso tikijtoskej tlen amo melauak itech oksekimej. Tla timotlapouiaj itlaj tlen amo tikmatij ken opanok, uelis tikijtoskej itlaj tlen amo melauak, ik non, moneki kuali ma timokuayejyekokan tlen timotlapouiskej (Proverbios 10:19). Noijki maski melauak tlen motlapouiaj, non amo kijtosneki moneki tikijtojtinemiskej. Se neskayotl, tla timokajkalakiaj kanin amo toteki, tikteititiaj amo titetlasojtlaj (1 Tesalonicenses 4:11). Sekimej tlaltikpaktlakamej kijtoaj tlajtoli tlen teyolkokoa uan kineltokaj kijtojtokej tlen melauak, pero tejuan moneki ma teyolpakti totlajtol (xiktlajtolti Colosenses 4:6).

11, 12. 1) ¿Ken okachi moouijtiliaj akinmej kichiuaj se ueyi tlajtlakoli? 2) ¿Ken tlakajkayaua Satanás itech uejueyij tlajtlakolmej, uan ken uelis tikinmixtopeuaskej? 3) ¿Ken uelis tikteititiskej amo tikkajkayauaj ialtepe Jehová?

11 Noijki amo ma tikinkajkayauakan akinmej tlayekanaj  itech tlanechikol. Tla akinmej kichiuaj se ueyi tlajtlakoli kitlatiaj intlajtlakol, noso amo kijtoaj nochi ijkuak tlayekankej kintlajtlaniaj, okachi moouijtiliaj. Sekimej peua kipiaj ome inmixko, kijtoaj kitekichiuiliaj Jehová pero ok tlajtlakolchiuaj. Ik non, itech nochi innemilis san tlakajkayajtokej (Salmo 12:2). Sekimej amo kijtoaj nochi tlen melauak uan kitlatiaj tlen okachi moneki kimatiskej tlayekankej (Hechos 5:1-11). Ikaj peua tlakajkayaua ijkuak kineltoka tlen Satanás kijtoa (xikita recuadro “ Satanás tlakajkayaua itech uejueyij tlajtlakolmej”).

12 Noijki miak ipati ma tikijtokan tlen melauak ijkuak ialtepe Jehová techtlajtlanilia itlaj ma tikijkuilokan, noso ma tiknankilikan. Se neskayotl, ijkuak tiktemakaj kech otitetlapouijkej, moneki ma tikijkuilokan tlen melauak otikchijkej. Ijkuak tikijkuiloaj se amatl pampa tiknekij okachi tiktekichiuiliskej Jehová, ma tikijkuilokan kox melauak tichikajtokej uan itech okseki tlamantli tlen techtlajtlaniaj (xiktlajtolti Proverbios 6:16-19).

13. ¿Tlen moneki tikchiuaskej pampa amo timokajkayauaskej tla titekitij iuan se tokni?

13 Noijki amo ma tikkajkayauakan akin iuan titekitij noso tisepantlanemakaj. Ualeua sekimej tokniuan sepantlanemakaj. Ninmej tokniuan moneki momaluiskej pampa amo motlapouiskej itech intlanemak itech Kali kanin monechikoaj noso kanin tetlapouitiuij. Ijkuak tikmakaj tekitl se tokni moneki tiktlaxtlauiskej. Noijki tla tokniuan touan tekitij amo ma tikinkajkayauakan, moneki tikintlaxtlauiskej ken yotikinmiluijkej uan tikinmakaskej nochi ijkon ken kijtoa intlanauatil tekiuajkej (1 Timoteo 5:18; Santiago 5:1-4). Uan tla tikpaleuiaj se tokni, moneki kuali titekitiskej (2 Tesalonicenses 3:10). Maski titekitij iuan se tokni, amo tikchiaskej ma techmaka nochi tlen tiknekiskej, ken ma techkauili ma tikisakan kualkan, okachi ma techpaleui noso ma techmaka tlen amo kinmaka oksekimej (Efesios 6:5-8).

14. Tla tisepantlanemakaj iuan se tokni, ¿tlen moneki tikchiuaskej, uan tleka?

 14 ¿Tlen tikchiuaskej tla totlanemak techouijtilia pampa moneki tiktekitiltiskej miak tomin noso tiktlaneuiskej? Onka se principio bíblico tlen uelis ika timoyekanaskej: nochipa ma tikijkuilokan itech se amatl. Se neskayotl, ijkuak Jeremías okiko se tlali, okijkuilo se amatl inmixpan oksekimej uan okichiuili se copia, pampa tla monekiskia, satepan kitaskia non amatl (Jeremías 32:9-12; noijki xikita Génesis 23:16-20). Ijkuak itlaj tikinnemakiltiaj tokniuan moneki nochi kuali tikyektlaliskej uan tikijkuiloskej itech se amatl, tiktlaliliskej tofirma inmixpan oksekimej; uan non amo kijtosneki amo intech titlaneltokaj. Nin techpaleuia amo timokualaniskej, timoyolkokoskej noso timoxeloskej. Akinmej tikchiuaj ken Cristo, tla tisepantlanemakaj, ma tikilnamiktokaj amo ipati se tlanemaktli ma techxelo uan ayakmo ma yeto yolseuilistli itech tlanechikol (1 Corintios 6:1-8). *

AMO MA TIKINKAJKAYAUAKAN TLALTIKPAKTLAKAMEJ

15. ¿Ken momachilia Jehová ijkuak tlachtekij akinmej tlanemakaj, uan tlen tikchiuaj itech non tlamantli?

15 Akinmej tikchiuaj ken Cristo, amo san moneki amo titlakajkayauaskej itech tlanechikol. Ijkon ken okijto Pablo: “Tiknekij kuali tiyeknemiskej itech nochi tlamantli” (Hebreos 13:18, TNM). Akin oKichijchi nochi, amo kineki ma titlakajkayauakan ijkuak titlanemakaj. Itech amochtli Proverbios tlajtoa miak uelta itech tlatamachiuali tlen amo ajsitok (Proverbios 11:1; 20:10, 23). Yiuejkika, balanzas uan pesas okintekitiltiayaj pampa ika okitamachiuayaj tlen okinemakayaj uan noijki tomin tlen ika okitlaxtlauayaj tlen okikouayaj. Sekimej otlakajkayauayaj pampa  okitekitiltiayaj tlatlamantli tlen ika otlatamachiuayaj, se pampa otlanemakayaj, uan okse pampa ika otlakouayaj. * Jehová kikokolia ijkon ma tikchiuakan. Tla tiknekij tiyetoskej itech itlasojtlalis, amo ma titlachtekikan ijkuak titlanemakaj.

16, 17. ¿Ken tlakajkayauaj axkan tlaltikpaktlakamej, uan tlen yotikpejpenkej tikchiuaskej akinmej tikchiuaj ken Cristo?

16 Pampa Satanás ye akin tlanauatijtok itech nin Tlaltikpak, san kanin tikinmajsij akinmej tlakajkayauaj. Mojmostla moita kox titlakajkayauaj. Sekimej tlaltikpaktlakamej ijkuak kitemoaj tekitl, kijkuiloaj itech se amatl tlen amo melauak, kijtoaj sapanoa kimatij uan kijtoaj yiuejkika tekititokej itech se tekitl. Ijkuak kijkuiloaj se amatl pampa yaskej itech okse altepetl, ijkuak kitlaxtlauaskej tlen moneki, seguros uan okseki tlamantli, tlakajkayauaj pampa kipiaskej tlen kinekij. Sekimej tlen momachtiaj tlakajkayauaj itech exámenes noso ijkuak kinmijkuiloaj amamej tlen kintlajtlaniliaj kanin momachtiaj, kikixtiaj itlaj itech Internet tlen amo inmiaxka uan kijtoaj inmiaxka ijkuak kitemakaj. Noijki, sekimej tlaltikpaktlakamej yauij inmixpan tekiuajkej tlen amo yolkualmej uan kinmakaj tomin pampa kipiaskej tlen kinekij. Amo uelis tikchiaskej itlaj kuali itech nin Tlaltikpak kanin tlatikpaktlakamej ‘yetokeh xíkojteh, satlawel kiwilitah tomi, [...] mach kimatih tetlasojtlah’ (2 Timoteo 3:1-5).

17 Akinmej tikchiuaj ken Cristo, yotikpejpenkej amo tikchiuaskej nion se tlamantli tlen yotikitakej. Uelis yetos oui amo se tlakajkayauas, pampa nesi akinmej tlakajkayauaj okachi yolpakij, uan okachi itech ninmej tonalmej (Salmo 73:1-8). Pero maski sapanoa oui tipanotiaskej, amo keman tiknekij titlakajkayauaskej. ¿Ipati ma timochijchikauakan?  Kema. ¿Tleka? ¿Tlen tlateochiualismej tikpiaskej tla amo titlakajkayauaskej?

TLA AMO TITLAKAJKAYAUAJ TIKSELISKEJ TLATEOCHIUALISMEJ

18. ¿Tleka sapanoa ipati oksekimej ma kitakan tejuan amo titlakajkayauaj?

18 Amo onka miak tlamantli tlen melauak ipati ken ma techixmatikan amo keman titlakajkayauaj uan ma tlaneltokakan totech (xikita recuadro “ ¿Melauak amo nitlakajkayaua?”). Nochtin uelis timochijchikauaskej amo titlakajkayauaskej. Nin amo kijtosneki moneki tiyetoskej tiixtlamatkej, tikpiaskej miak tomin, tiyetoskej kuajkualtsitsintin, noso tikpiaskej miak tlamantli. San sekimej tlen melauak amo tlakajkayauaj (Miqueas 7:2). Sekimej techpinatiskej pampa amo titlakajkayauaj uan oksekimej techtlakaitaskej pampa amo ijkon tikchiuaj. Nin kichiuas okachi ma tlaneltokakan totech uan ma techtlakaitakan. Miakej iTlaixpantijkauan Jehová kimotlaniliaj tlen kuali pampa amo tlakajkayauaj. Ijkuak sekimej kinmiluiaj ayakmo kinmakaskej tekitl, yejuan kipiaj tekitl pampa amo tlakajkayauaj noso kinmakaj tekitl ijkuak akinmej tlakajkayauaj amo kipiaj.

19. ¿Ken kijtlakos totlalnamikilis uan ken kichiuas ayakmo kuali ma timouikakan iuan Jehová tla titlakajkayauaj?

19 Tla tejuatsin ijkon yomitspanok noso amo, uelis tikpias okseki tlateochiualismej. Se neskayotl, motlalnamikilis amo mitskuejsojtos. Ken okijkuilo Pablo: “Tikneltokaj tikpiaj kuali totlalnamikilis” noso chipauak (Hebreos 13:18, TNM). ToTajtsin Dios nochipa kipatioitas tla timochijchikauaj amo titlakajkayauaskej (xiktlajtolti Salmo 15:1, 2; Proverbios 22:1). Noijki, non techpaleuis ma tiyetokan itech itlasojtlalis, nin se tetliokolil tlen okachi kuali tikpiaskej. Axkan ma tikitakan ken kita toTajtsin Dios tekitl.

^ párr. 9 Tla itech tlanechikol onka se tokni tlen nochipa tlakajkayaua uan kichiua pampa kinmijtlakos oksekimej, eyi tlayekankej moneki kiyektlaliskej nin ouijkayotl.

^ párr. 14 Itech okse tlamachtil “¿Ken moneki tikyektlaliskej tla tisepantlanemakaj uan amo kuali kisa?”. Kiyekijtoa ken moneki tikyektlaliskej tla tisepantlanemakaj uan amo kuali kisa.

^ párr. 15 Yejuan okintekitiltiayaj tlatlamantli pesas, se pampa ika otlanemakayaj uan okse pampa ika otlakouayaj, uan ijkon nochipa otlachtekiayaj. Uan okitekitiltiayaj tlatlamantli balanzas, se okachi ueyak noso okse okachi etik pampa okinkajkayauayaj oksekimej.