Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

“Xiyetokan itech itlasojtlalis toTajtsin Dios”

 TLAMACHTIL 10

Namiktilistli: se tetliokolil tlen techmaka Jehová akin techtlasojtla

Namiktilistli: se tetliokolil tlen techmaka Jehová akin techtlasojtla

“Se mekatl tlen kipia eyi ichtli amo uelis san niman kotonis.” (ECLESIASTÉS 4:12.)

1, 2. 1) ¿Tlen timotlajtlaniaj itech akinmej monamiktiaj, uan tleka? 2) ¿Tlen tlajtlanilmej tikinnankiliskej itech nin tlamachtil?

¿MITSPAKTIA tias ijkuak ikaj monamiktia? Miakej kema kinpaktia yaskej pampa itech non tonal nochtin yolpakij. Noijki itech non tonal akinmej monamiktijtokej, sapanoa kuajkualtsin intlaken uan itech inmixko moita sapanoa yolpakij. Ika nochi inyolo kichiaj yolpakiskej nochipa.

2 Itech ninmej tonalmej namiktilistli kipia miak ouijkayotl. Uan maski tiknekij nochi kuali ma kisa itech innamiktilis, ualeua timotlajtlaniaj: “¿Melauak yolpakiskej? ¿Uejkauas innamiktilis?”. Nin moitas tla akinmej yomonamiktijkej tlaneltokaj itech toTajtsin Dios uan mopaleuiaj ika tlen kinmiluia itech namiktilistli (xiktlajtolti Proverbios 3:5, 6). Uan moneki ijkon kichiuaskej pampa yetoskej itech itlasojtlalis toTajtsin Dios. Axkan timomachtiskej naui tlajtlanilmej tlen Biblia technankilis: ¿Tleka tikneki timonamiktis? ¿Ken uelis tikpejpenas iuan akin timonamiktis? ¿Ken uelis timoyektlalis pampa kuali kisas monamiktilis? ¿Tlen uelis kinpaleuis ma yolpakikan akinmej yomonamiktijkej?

¿TLEKA TIKNEKI TIMONAMIKTIS?

3. ¿Tleka amo kuali ma timonamiktikan san ika itlaj tlen amo ipati?

3 Sekimej kijtoaj moneki monamiktiskej pampa yolpakiskej,  tla amo yetoskej iuan ikaj, amo yolpakiskej. ¡Akinmej ijkon mokuayejyekoaj motlapololtiaj! Jesús akin amo keman omonamikti, okijto akinmej inselti katej, kipiaj se tetliokolil uan okinyole ijkon ma yetokan (Mateo 19:11, 12). Noijki Pablo okijto tla toselti tiyetoskej, okachi uelis tikchiuaskej miak tlamantli (1 Corintios 7:32-38). Jesús uan Pablo amo otlanauatijkej amo ikaj ma monamikti, pampa Biblia kijtoa ijkuak ikaj ‘mach ok kitekawilia se mamonamikti’ non “intlamachtilis n demonios” (1 Timoteo 4:1-3). Akinmej inselti okachi kuali kitekichiuiliaj toTajtsin Dios uan amo itlaj kintsakuilia. Ik non, amo ma timonamiktikan san ika itlaj tlen amo ipati, ken ijkuak sekimej techiluiaj ma timonamiktikan.

4. ¿Tleka san itech namiktilistli okachi kuali kinmiskaltiskej konemej?

4 ¿Tleka tikneki timonamiktis? Namiktilistli se tetliokolil tlen techmaka toTajtsin Dios (xiktlajtolti Génesis 2:18). Namiktilistli techpaleuia uan kichiua okachi ma tiyolpakikan. Se neskayotl, namiktilistli kuali pampa tikpiaskej tokalchanejkauan. Pampa konemej moneki moskaltiskej iuan intatajuan, tlen kintlasojtlaskej, kinmachtiskej uan kinnojnotsaskej (Salmo 127:3; Efesios 6:1-4). Noijki, onka okseki tlamantli tlen uelis mitsyolinis ximonamikti.

5, 6. 1) Ijkon ken kijtoa Eclesiastés 4:9-12, ¿ken techpaleuia ijkuak kuali timouikaj iuan toyolikniuan? 2) Akinmej yomonamiktijkej, ¿ken uelis yetoskej ken se mekatl tlen kipia eyi ichtli?

5 Ma tikitakan tlen okachi techiluia nin tlaxelol tlen kajki kanin peua nin tlamachtil: “Okachi kuali ome uan amo san se, pampa kipiaj kuali intetliokolil pampa chikauak tekitij. Uan tla se uetsi, iyolikni uelis kipaleuis. Pero ¿tlen kipanos akin uetsis tla amo ikaj iuan kajki pampa kipaleuis? Noijki, tla ome san sekan motekaj, uelis mototoniskej, pero ¿ken mototonis akin san iselti kajki? Uan tla ikaj uelis kitlanis se, ome uelis kixnamikiskej. Uan se  mekatl tlen kipia eyi ichtli amo uelis san niman kotonis” (Eclesiastés 4:9-12).

6 Ninmej tlaxelolmej kiteititiaj miak ipati tikinpiaskej toyolikniuan. Pero akinmej yomonamiktijkej, innamik ye akin okachi kuali inyolikni yetos. Ijkon ken kiteititiaj ninmej tlaxelolmej, akinmej yomonamiktijkej uelis mopaleuiskej, moyolseuiskej uan momaluiskej. Uan tla namiktilistli kipias itlaj tlen kisetilis, okachi chikauak yetos. Noijki ninmej tlaxelolmej kijtoaj tla se mekatl kipia ome ichtli, uelis kotonis uan tla kipia eyi ichtli, okachi oui kotonis. Ijkuak akinmej yomonamiktijkej mochijchikauaj kichiuaskej tlen Jehová kipaktia, yetoskia ken se mekatl tlen kipia eyi ichtli. Ik non, Jehová kinpaleuia akinmej yomonamiktijkej pampa okachi kuali ma mouikakan.

7, 8. 1) ¿Tlen okinmilui Pablo akinmej katej inselti uan kimoxikoltiaj tlen kimachiliaj? 2) ¿Tlen kijtoa Biblia kinpanos akinmej monamiktiaj?

7 Noijki, san itech namiktilistli se tlakatl uelis motekas iuan se siuatl. Ik non, san akinmej yomonamiktijkej uelis motekaskej uan moyolpaktiskej (Proverbios 5:18). Pero ualeua akinmej inselti, maski yopanok ijkuak okachi okinekiayaj motekaskej iuan ikaj, ok kimachiliaj oui kimoxikoltiskej tlen kineki intlalnakayo, Pablo kinmiluia nin: “Pero tla amo nonmoxikoah, ximonamiktikah. Porke okachi kuali ximonamiktikah, para amo manomechyoltilana tlan kelewia nomokuerpo” (1 Corintios 7:9, 36; Santiago 1:15).

8 Akinmej kinekij monamiktiskej moneki kimatoskej tlen uelis kinpanos. Ik non, Pablo okijto akinmej monamiktiaj “panoskeh itech miak tlaijyowílistli” (1 Corintios 7:28). Akinmej monamiktiaj kipiaskej ouijkayotl tlen amo kipiaj akinmej inselti. Tla tikneki timonamiktis, ¿tlen uelis tikchiuas pampa amo okachi tikpias ouijkayotl uan tiyolpakis? Moneki kuali tikpejpenas iuan akin timonamiktis.

 ¿KEN UELIS TIKPEJPENAS IUAN AKIN TIMONAMIKTIS?

9, 10. 1) ¿Ken moneskayotia akinmej monamiktiaj iuan akinmej amo tlaneltokaj itech toTajtsin Dios? 2) ¿Tlen kinpanoa akinmej amo kintlakamatij itlanauatiluan toTajtsin Dios uan monamiktiaj iuan akinmej amo tlaneltokaj itech?

9 Pablo okijkuilo se principio bíblico tlen moneki ika moyekanas akin kineki monamiktis, pampa kuali kipejpenas inamik: “Amo ximowikatinemikah inwah akimeh amo kitlakitah Cristo” (2 Corintios 6:14). Se neskayotl, tla se yolkatl kisetiliaj iuan okse tlen okachi tsikitsin, tlajyouiskej ijkuak sepantekitiskej. Ijkon panoa itech namiktilistli. Tla se tlaneltoka uan okse amo tlaneltoka, san tlajyouiskej. Tla se kineki yetos itech itlasojtlalis toTajtsin Dios uan okse amo kineki, moyolkokoskej pampa tlatlamantli kinekij kichiuaskej. Ik non, Pablo okinmilui akinmej kichiuaj ken Cristo ma monamiktikan iuan akin “kineltoka Toteko Dios” (1 Corintios 7:39).

10 Ualeua sekimej sapanoa inselti momachiliaj, ik non, monamiktiaj iuan ikaj tlen amo itlaixpantijka Jehová. Amo moyekanaj ika principio bíblico tlen yotikitakej, uan monamiktiaj iuan akinmej amo kitekichiuiliaj Jehová. Satepan kajsikamatij akin iuan omonamiktijkej tlatlamantli kitaj tlen okachi ipati itech innemilis. Uan momachiliaj okachi inselti ken ijkuak ayamo omonamiktiayaj. Pero miakej tokniuan, amo ijkon momachiliaj pampa tlaneltokaj itech Jehová uan kintlakamatij itlanauatiluan (xiktlajtolti Salmo 32:8). Maski katej inselti, kineltokaj se tonal kajsiskej akin iuan monamiktiskej tlen noijki kiueyichiua toTajtsin Dios.

11. ¿Tlen mitspaleuis pampa kuali tikpejpenas iuan akin timonamiktis? (Xikita recuadro “ ¿Tlen niktemojtok itech akin iuan nimonamiktis?”).

11 Noijki, maski akin iuan timonamiktis kitekichiuilia Jehová, non amo kijtosneki nochi kuali kisas. Tla timokuayejyekojtok timonamiktis, xiktemo akin  kipia iyelis ken tejuatsin tikpia, tlen kineki kichiuas ken tejuatsin uan noijki ma kitlasojtla toTajtsin Dios. Tlakeuali yolmelajki kitemaka miakej amatlajkuilolmej itech nin tlamantli, ik non, kuali tikchiuas tla timomachtis itech nin tlamantli, noijki ximotlatlaujti itech Jehová uan ximoyekana ika iTlajtol pampa mitspaleuis xikpejpena tlen okachi kuali (xiktlajtolti Salmo 119:105). *

12. Itech seki altepemej, ¿ken kintemoliaj insiua inkoneuan, uan tlen neskayotl tikajsij itech Biblia?

12 Itech seki altepemej tetajmej kintemoliaj insiua inkoneuan. Ijkon kichiuaj pampa tetajmej okachi kipiaj ixtlamatilistli uan kimatij ken kinpejpeniliskej innamik. Ken yiuejkika okichiuayaj, akinmej kinpejpeniliaj insiua ualeua kuali kisa innamiktilis. Ik non, uelis kinpaleuis ineskayo Abrahán ijkuak okititlanki itlakeual ma kitemoliti isiua Isaac, uan okilui siuatl omonekiaya kisas itech ikalchanejkauan. Uan Abrahán amo okitekipachoaya kox nochtin okixmatiayaj ichpochtli, noso kox okipiaya tomin. Okachi kuali, okitemo se siuatl tlen noijki okiueyichiuaya Jehová (Génesis 24:3, 67). *

¿KEN UELIS TIMOYEKTLALIS PAMPA UELIS TIMONAMIKTIS?

13-15. 1) ¿Ken kipaleuia Proverbios 24:27 tlakatl tlen kineki monamiktis? 2) ¿Ken kimatis siuatl tlen tekitl kichiuas ijkuak monamiktis?

13 Tla timokuayejyekojtok timonamiktis, moneki ximotlajtlani: “¿Melauak yiuelis nimonamiktis?”. Amo san  tlen tikmachilia, tlen tikmati ijkuak se tlakatl moteka iuan se siuatl noso san pampa tikneki tikinpias mokoneuan, non amo mitspaleuis tikmatis tla yiuelis timonamiktis. Okachi kuali, tlakatl uan siuatl moneki achto mokuayejyekoskej tlen kichiuaskej.

14 Tla se tlakatl kineki monamiktis, moneki mokuayejyekos itech nin principio bíblico: “Achto xitekiti kiauak uan xikajxiti moteki itech tlalan. Satepan moneki tikchijchiuas mokalijtik” (Proverbios 24:27). ¿Tlen kijtosneki nin? Yiuejkika, akin okinekiaya kipias ikalchanejkauan, omonekiaya motlajtlanis: “¿Melauak yiniuelis nikmaluis nosiua uan nikmakas tlen kipoloa uan noijki ijkuak nesiskej nokoneuan?”. Ik non, achto monamiktiskia tlakatl, omonekiaya tekitis itech itlala. Ika nin principio bíblico axkan noijki uelis moyekanaskej akinmej kinekij monamiktiskej. Ik non, tla se tlakatl kineki monamiktis, achto moyektlalis pampa kuali kichiuas iteki. Uan pampa ok telpochtli moneki tekitis chikauak. Noijki Biblia kijtoa moneki kinmakas tlen kinpoloa ikalchanejkauan, kinyolchikauas uan kinchikauilis intlaneltokilis, uan tla amo kichiuas yetoskia ken akin amo tlaneltoka (xiktlajtolti 1 Timoteo 5:8).

15 Noijki tla se siuatl kineki monamiktis, moneki kimatis tlen tekitl kichiuas. Uan Biblia kiluia ken kichiuas iteki, ken kipias iyelis pampa kipaleuis inamik uan ken kimaluis ikalijtik (Proverbios 31:10-31). Tlakamej uan siuamej tlen san niman monamiktijtikisaj, amo kimatij tlen tekitl kichiuaskej, san intech motekipachoaj pampa amo mokuayejyekoaj kox melauak uelis kipaleuiskej innamik. Noijki, akinmej kinekij monamiktiskej moneki moyektlaliskej pampa moyekanaskej ika principios bíblicos itech innamiktilis.

16, 17. ¿Itech tlen principios bíblicos moneki mokuayejyekoskej akinmej kinekij monamiktiskej?

 16 Akinmej kinekij monamiktiskej, moneki achto kimatiskej tlen tekitl kinmaka Jehová. Tlakatl tlen kineki monamiktis, moneki kimatis ken kinyekanas ikalchanejkauan. Nin tlanauatil amo kikauilia ma yeto ken se akin san tlanauatijtos, okachi kuali, moneki tlayekanas ken Jesús kichiua (Efesios 5:23). Siuatl noijki moneki kimatis tlen tekitl kichiuas ijkuak monamiktis. Ik non, moneki ma motlajtlani: “¿Melauak niktlakamatis ‘itlanawátil’ nonamik?” (Romanos 7:2). Siuatl tlen iselti moyekantok ika itlanauatil Jehová uan Cristo (Gálatas 6:2). Pero ijkuak siuatl monamiktia moneki kitlakamatis inamik. Ik non, oksepa ma motlajtlani: “¿Uelis nikpaleuis uan niktlakamatis se tlakatl tlen tlajtlakole?”. Tla mokuayejyekoa amo uelis, okachi kuali amo ma monamikti.

17 Noijki, akin monamiktia moneki kimakas tlen kipoloa inamik (xiktlajtolti Filipenses 2:4). Ik non, toTajtsin Dios okinauati Pablo ma kijkuilo: “Tlakatl makitlasojtla isiwa kemi ye inewia motlasojtla, iwa n tesiwa noiwa makitlakita iokich”. Pablo okajsikamatki tlakatl moneki kitas isiua kitlakaita, uan  siuatl moneki kitas inamik kitlasojtla (Efesios 5:21-33).

Novios kiteititiaj kipiaj ixtlamatilistli ijkuak kiluiaj ikaj ma yeto inmiuan

18. ¿Tleka novios moneki kimoxikoltiskej tlen kimachiliaj?

18 Ik non, ijkuak katej novios amo san pampa moyolpaktiskej. Non pampa kinpaleuis kuali ma moixmatikan uan kitaskej kox monamiktiskej noso amo. Maski amo tlajtlakoli sapanoa mouelitaskej, novios moneki kimoxikoltiskej tlen kimachiliaj. Uan tla melauak motlasojtlaj, amo kichiuaskej itlaj tlen kichiuas ayakmokuali ma mouikakan iuan Jehová (1 Tesalonicenses 4:6). Ik non, tla tinemi iuan ikaj, xikmoxikolti tlen  tikmachilia pampa non mitspaleuis, maski timonamiktis noso amo.

¿KEN UELIS TIMOYEKTLALIS PAMPA KUALI KISAS MONAMIKTILIS?

19, 20. ¿Ken kitaj sekimej namiktilistli uan ken kitaj akinmej kichiuaj ken Cristo? Xikyekijto ika se neskayotl.

19 Pampa namiktilistli uejkauas moneki amo se kajauilmatis. Ijkuak tlamij novelas uan tlamauisolmej, kiteititiaj akinmej monamiktiaj sapanoa yolpakij uan nochipa ijkon yetoskej. Pero amo melauak ompa tlami, pampa ijkuak ikaj monamiktia yikin kipeualtia tlen Jehová okitlali pampa ma uejkaua (Génesis 2:24). Axkan, miakej ayakmo ijkon kitaj. Itech seki altepemej kitaj namiktilistli ken ome mekatl tlen “ilpitok san sekan”. Ninmej tlajtolmej kuali kineskayotiaj ken kitaj namiktilistli. ¿Tleka? Pampa sekimej kinekij yetoskej san sekan tla kuali katej, uan tla amo, san niman uelis mokajkauaskej.

20 Axkan, miakej kijtoaj namiktilistli amo moneki uejkauas. Ik non, sekimej san niman monamiktiaj pampa mokuayejyekoaj kipiaskej tlen kinekij uan tla kipiaj ouijkayotl, san niman uelis mokajkauaskej. Ik non, xikilnamiki Biblia kineskayotia namiktilistli ika se mekatl. Se neskayotl, arriata se mekatl tlen chikauak. Arriata kichijchiuaj pampa ma uejkaua, uan amo san niman ma kotoni. Noijki ijkon, namiktilistli okitlalijkej pampa ma uejkaua. Ik non, Jesús okijto: “Tlan Dios yokiseitili, amaka makinxexelo” (Mateo 19:6). Tla tikneki timonamiktis moneki ijkon tikitas namiktilistli. Uan nin amo kijtosneki se tlamamali.

21. Akinmej yomonamiktijkej, ¿tlen moneki ma kitakan itech innamik, uan tlen neskayotl kinpaleuis?

21 Akinmej monamiktiaj, amo san moneki kitaskej tlen amo kuali itech innamik. Tla sejse kitaskej kuali inyelis,  yolpakiskej uan yetoskej ika yolseuilistli. Moneki kitaskej tlen kuali itech innamik, maski tlajtlakolejkej. Se neskayotl, maski Jehová kita tlen amo kuali tikchiuaj, okachi kita tlen kuali tikchiuaj. Ik non, salmista okijto: “Tla san tlajtlakoli tikita, oh Jah, ijkuakon, oh Jehová, ¿akin uelis moketos?” (Salmo 130:3). Akinmej yomonamiktijkej, moneki ma kitakan tlen kuali itech innamik uan ma motlapojpoluikan (xiktlajtolti Colosenses 3:13).

22, 23. ¿Tleka Abrahán uan Sara kinmakaj se kuali neskayotl akinmej yomonamiktijkej?

 22 Akinmej yomonamiktijkej okachi yolpakiskej ijkuak panotias xiuitl. Biblia techtlapouia itech inamiktilis Abrahán uan Sara ijkuak yiuejueyij okatkaj. Yejuan noijki okipiayaj ouijkayotl. Ximokuayejyeko, ijkuak Sara okipiaya kanaj 60 xiuitl, okikajte ikalijtik ompa itech altepetl Ur kanin okipiaya nochi, uan satepan itech nochi inemilis ochantiaya itech mantajkalmej. Pero nochipa okitlakamatki inamik. Okatka iajsikayo Abrahán pampa ika tlakaitalistli okipaleuiaya itech tlen okipejpenaya kichiuas. Uan tlen okichiuaya okiteititiaya okitlakamatiaya inamik, pampa itech Biblia kijtoa “ipan iyolo” okiluiaya “noteko” (Génesis 18:12; 1 Pedro 3:6). Sara okitlakaitaya inamik ika nochi iyolo.

23 Noijki, yejuan tlatlamantli omokuayejyekoayaj. Se tonal Sara okilui itlaj Abrahán tlen “sapanoa okikualani”. Pero Jehová okilui ma kikakili isiua, uan Abrahán okikakili ika yolyamanilistli uan ikalchanejkauan okiselijkej miakej tlateochiualismej (Génesis 21:9-13). Nochtin akinmej yikipiaj miak xiuitl yomonamiktijkej uan tlen yikin, uelis itlaj momachtiskej itech inamiktilis Abrahán uan Sara, akinmej okitekichiuilijkej toTajtsin Dios.

24. ¿Ken kiteititiaj akinmej yomonamiktijkej kitlakaitaj Jehová, uan tleka?

24 Itech tlanechikol katej miakej tlen yomonamiktijkej uan yolpakij miak, siuamej kintlakaitaj innamik, tlakamej kintlasojtlaj uan kintlakaitaj insiuauan uan san sekan tekitij pampa okachi kitekichiuiliskej Jehová. Tla tikneki timonamiktis uelis kuali tikpejpenas monamik ika ixtlamatilistli uan kuali timoyektlalis pampa kuali tikpias monamiktilis tlen kitlakaitas Jehová. Tla ijkon tikchiuas, monamik uan tejuatsin nanyetoskej itech itlasojtlalis toTajtsin Dios.

^ párr. 11 Xikita amochtli El secreto de la felicidad familiar, tlamachtil 2

^ párr. 12 Sekimej tlen okatkaj yolmelajkej iixpan toTajtsin Dios, ken Abrahán uan Jacob okinpiayaj miakej insiuauan. Jehová okinkauili ma kinpiakan miakej insiuauan uan noijki israelitas. Pero axkan tikmatij ayakmo ikaj uelis kinpias miakej isiuauan (Mateo 19:9; 1 Timoteo 3:2).