Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

“Xiyetokan itech itlasojtlalis toTajtsin Dios”

 OKSEKI TLAMACHTILMEJ

¿Ken moneki tikyektlaliskej tla tisepantlanemakaj uan amo kuali kisa?

¿Ken moneki tikyektlaliskej tla tisepantlanemakaj uan amo kuali kisa?

Itech 1 Corintios 6:1-8, tlatitlanil Pablo otlajto itech tokniuan tlen okipiayaj ouijkayotl uan omoteluiayaj. Achto okijto omoyolkokoaya pampa sekimej tokniuan itech Corinto omixeuijkej ‘yaskeh motejteilitiweh ixpa se tekiwa non amo kitlakita Dios’ (tlaxelol 1). Pablo okinmilui okachi kuali ma kiyektlalikan ouijkayotl itech tlanechikol, uan amo ma moteluikan iixpan tekiuajkej. Ma tikitakan tleka moneki kichiuaskej tlen Jehová okinauati Pablo ma kijkuilo, uan noijki keman amo moneki ijkon kichiuaskej.

Tla timokualanijtokej iuan akin tisepantlanemakaj, noso otimotlalkouijkej iuan se tokni, ma tikyektlalikan non ouijkayotl ken Jehová kineki uan amo ken tejuan tiknekij (Proverbios 14:12). Ken okijto Jesús, moneki totoka ma tikyektlalikan ouijkayotl, amo ma timochiakan ijkuak okachi ueyi mochiuas (Mateo 5:23-26). Ualeua, sekimej tokniuan okachi kiueyitiliaj ouijkayotl uan mixeuiaj moteluitiuij iixpan tekiuajkej. Itech non tlamantli, Pablo okijto: “Tla ok nonmokuakualaniah iwa n oksikimeh nomokniwah, sanenka nochi tlan ya nonkichiwah”. ¿Tleka ijkon kijtoa? Pampa tokniuan uelis kisokiotiskej itoka Jehová akin tikueyichiuaj, uan amo kuali tlajtoskej itech tlanechikol. Pampa amo ijkon techpanos, moneki ma tiktlakamatikan tlen Pablo okijto: “Okachi kuali xikijyowikah tlan amokuali nomechtoktiah” (tlaxelol 7).

Pablo noijki okijto toTajtsin Dios okitlali tlen tlapaleuis ma moyektlalikan ouijkayomej itech tlanechikol. Itech tlanechikol katej tlayekankej tlen ixtlamatkej pampa momachtiaj Biblia, ik non, Pablo okijto: “Onka se nomokni tlaneltokak akin kimatis kenijki nomechnonotsas” ijkuak sekimej “motejteiliah itech nin tlaltíkpaktli” (tlaxelolmej 3 a 5). Jesús okijto pampa moyektlalis se ueyi ouijkayotl, ken ijkuak ikaj kijtoa tlen amo melauak itech ikaj uan ijkuak ikaj tlachteki ijkuak sepantlanemakaj, ouijkayotl uelis moyektlalis ika nin eyi tlamantli: achto, san sekan ma motlapouikan, tla amo ueli kiyektlaliaj ouijkayotl, oksepa ma motlapouikan pero axkan iixpan se noso ome tokniuan; uan  tla ijkon kichiuaj pero amo kiyektlaliaj, axkan moneki kinmiluiskej tlayekankej (Mateo 18:15-17).

Tokniuan tlayekankej amo yetoskej ken tekiuajkej noso akinmej tlapaleuiaj tlen kijtoaj ken moyektlalis ijkuak sepantlanemakaj. Noijki amo kijtoskej tlen moneki kichiuaskej tokniuan pampa kiyektlaliskej ouijkayotl. Okachi kuali, kinpaleuiaj tokniuan ma moyekanakan ika principios bíblicos uan ika yolseuilistli ma kiyektlalikan ouijkayotl. Tla okachi kiueyitiliaj ouijkayotl, tlayekankej xamo kijtoskej kitlajtlaniskej tlayekanki itech circuito tlen uelis kichiuaskej noso tlajtlaniskej itech kali kanin tekitij iTlaixpantijkauan Jehová. Axkan tikitaskej seki tlamantli ijkuak amo monekis tikchiuaskej tlen okijkuilo Pablo.

Ualeua monekis kichiuaskej se demanda ken kijtoa intlanauatil tekiuajkej pampa uelis kuali kiyektlaliskej ouijkayotl. Se neskayotl, pampa moxeloskej iixpan tekiuajkej akinmej yomonamiktijkej, pampa tlakatl noso siuatl uelis kimokauis ikone, pampa moijtos ken kimakaskej ikaj tlen ika mopanoltis, pampa ikaj uelis kitlaxtlauiliskej se seguro, pampa moijkuilos se amatl kanin kijtoa tiktlajtlani ma mitstlaxtlaui akin iuan otisepantekitik uan nochi okipolo, noso pampa mochiuas se testamento ken moneki. Ualeua se tokni uelis kijtos moneki kichiuas se contrademanda pampa mopaleuis. *

Tla se tokni ijkon kipanoa uan moteluia iixpan tekiuajkej pampa ma kipaleuikan uan amo san pampa kineki ouijkayotl, amo uelis tikijtoskej amo kitlakamati tlen Jehová okinauati Pablo ma kijkuilo. * Pero ken yitikmatij, okachi tiknekij ma moueyichiua itoka Jehová, nochtin kuali ma timouikakan itech tlanechikol uan ma tiyetokan ika yolseuilistli. Akinmej tikchiuaj ken Cristo okachi timoixmatij ika tlasojtlalistli, kema, timotlasojtlaj uan amo ‘tiktemoah san tlan techpaktia’ (1 Corintios 13:4, 5; Juan 13:34, 35).

^ párr. 2 Se tonal uelis se tokni kichiuas se ueyi tlajtlakoli ken kichiualtis ikaj ma moteka iuan, sapanoa teuitekis, temiktis noso tlachtekis. Tla ijkon panos, uelis kiteluiskej iixpan tekiuajkej, maski peuas se juicio civil noso penal.

^ párr. 3 Pampa okachi tikmatis, xikita tlen kijtoa La Atalaya 15 de marzo de 1997, itech páginas 17 a 22, uan noijki 15 de octubre de 1991, itech páginas 25 a 28.