Xikita nochi

Tlen kiualika

 TLAMACHTIL 11

“Ma kitlakaitakan namiktilistli”

“Ma kitlakaitakan namiktilistli”

“Xiyolpaki iuan siuatl akin iuan otimonamikti itech motelpokayo.” (PROVERBIOS 5:18.)

1, 2. ¿Tlen tlajtlanilmej timomachtiskej, uan tleka?

¿YOTIMONAMIKTI? Tla kema, ¿tiyolpaki iuan monamik noso nantlajyouiaj? ¿Tikmachilia amo kuali nanmoixmatij? ¿San tika iuan monamik maski ayakmo tiyolpaki? Tla ijkon mitspanotok, uelis timoyolkokoa pampa ayakmo nanmotlasojtlaj ken achto onanmotlasojtlayaj. Tla tikchiua ken Cristo, tikneki monamiktilis ma kiueyichiua Jehová akin melauak tiktlasojtla. Maski non mitsyolkokoa uan mitstekipachoa, amo kijtosneki amo keman tikyektlalis monamiktilis.

2 Sekimej tlen kichiuaj ken Cristo, san omoxikojtokaj maski amo kuali omouikayaj uan amo oyolpakiayaj iuan innamik. Pero okajsikamatkej ken uelis okachi kichikauaskej innamiktilis. Uan tejuatsin, ¿ken uelis tiyolpakis iuan monamik?

OKACHI XIMOTOKI ITECH TOTAJTSIN DIOS UAN TIMOTOKIS ITECH MONAMIK

3, 4. ¿Tleka akinmej yomonamiktijkej okachi motokiaj itech innamik tla mochijchikauaj motokiskej itech Jehová? Xikyekijto ika se neskayotl.

3 ¿Tleka tla okachi timochijchikaua timotokis itech toTajtsin Dios noijki timotokis itech monamik? Ma tikitakan se neskayotl. Ximokuayejyeko itech se tlakatl uan se siuatl tlen kintlatlajkoxeloa se tepetl uan kinekij tlejkoskej itech. Ijkuak yejuan katej ikxitlan tepetl, ueuejka katej, pero ijkuak okachi peuaj tlejkotiuij okachi  peua monamikitiuij. ¿Tikita ken techyolseuia nin neskayotl?

4 Pampa timochijchikauaj tiktekichiuiliskej toTajtsin Dios, uelis tikijtoskej ken titlejkotiuij itech se tepetl. Pampa nankitlasojtlaj Jehová, uelis tikijtoskej yinantlejkotiuij itech non tepetl. Tla tejuatsin uan monamik amo kuali nanmoixmatij, yetoskia ken yikin nantlejkotiuij itech tepetl. ¿Tlen panos tla nantlejkotiaskej? Maski ueuejka nanyetoskej, tla nanmochijchikauaj nanmotokiskej itech toTajtsin Dios —noso nantlejkotiaskej—, okachi san sekan nanyetoskej. Tla timotokia itech toTajtsin Dios, mitspaleuis okachi ximotoki itech monamik. ¿Ken uelis tikchiuas non?

Ximoyekana ika tlen kijtoa Biblia pampa ma mochikaua monamiktilis

5. 1) ¿Ken uelis motokiskej itech Jehová uan itech innamik akinmej yomonamiktijkej? 2) ¿Ken kita Jehová namiktilistli?

 5 Tla tejuatsin uan monamik nankinekij “nantlejkoskej”, moneki nanmopaleuiskej ika tlen namechiluia iTlajtol toTajtsin Dios itech namiktilistli (Salmo 25:4; Isaías 48:17, 18). Ma tikitakan se tlamantli tlen okijkuilo Pablo: “Nochtin ma kitlakaitakan namiktilistli” (Hebreos 13:4, TNM). ¿Tlen kijtosneki nin? Tlajtoli “ma kitlakaitakan” kijtosneki itlaj tlen sapanoa ipati. Uan Jehová ijkon kita namiktilistli: itlaj tlen sapanoa ipati.

TLA TIKTLASOJTLA JEHOVÁ MITSYOLINIS

6. ¿Ken uelis moajsikamatis tlen otenejmachti Pablo, uan tleka ipati tikilnamiktoskej?

6 Tla tejuatsin uan mosiua nankitekichiuiliaj toTajtsin Dios, yinankimatij namiktilistli sapanoa miak ipati, pampa ye Jehová akin okitlali (xiktlajtolti Mateo 19:4-6). Tla tikpia ouijkayotl iuan monamik, san nankimatiskej itech namiktilistli moneki nanmotlakaitaskej amo namechpaleuis pampa ximotlasojtlakan uan ximotlakaitakan. Ik non, ¿tlen mitsyolinis ijkon tikchiuas? Xikita kuali tlen okijto Pablo ken moneki tiktlakaitaskej namiktilistli. Ye amo san okijto “motlakaita namiktilistli”, okachi kuali okijto “ma kitlakaitakan namiktilistli”. Ijkuak ijkon okijto, ye itlaj otenejmachti. * Tla tikajsikamati tlen okijto Pablo, mitspaleuis oksepa xiktlasojtla monamik. ¿Tleka ijkon tikijtoaj?

7. 1) ¿Tlen tlanauatilmej tikintlakamati, uan tleka ijkon tikchiua? 2) ¿Ken mitspaleuia tikintlakamatis?

7 Ma timokuayejyekokan itech seki tlanauatilmej tlen  techmaka Biblia, tlen techiluia ma titetlapouikan uan ma timonechikokan pampa tikueyichiuaskej toTajtsin Dios (Mateo 28:19; Hebreos 10:24, 25). Ualeua oui tikintlakamatiskej ninmej tlanauatilmej. Pero tejuatsin tio titetlapouiti maski amo nochtin mitskakij, noso maski ijkuak otitekitito uan yitisotlajtok uan moneki tias nechikol. Maski oui, timochijchikaua titetlapouiti itech iTekiuajkayo toTajtsin Dios uan tias nechikolmej. Nion Satanás noso ikaj tikkauilia ma mitstsakuili. ¿Tleka? Pampa tiktlasojtla Jehová ika nochi moyolo, nin mitsyolinia xikintlakamati itlanauatiluan (1 Juan 5:3). ¿Ken mitspaleuia nin? Pampa tio itech nechikolmej uan titetlapouia, tikpia yolseuilistli uan tiyolpaki pampa tikmati tikchijtok itlanekilis toTajtsin Dios. Uan pampa ijkon tikmachilia, okachi mitsyolchikaua (Nehemías 8:10). ¿Tlen techmachtia nin?

8, 9. 1) ¿Tlen mitsyolinis xiktlakamati tlanauatil itech namiktilistli, uan tleka? 2) ¿Tlen ome tlamantli timomachtiskej?

8 Pampa tiktlasojtla Jehová, nin mitsyolinia tias titetlapouiti uan tias nechikolmej maski tikpia ouijkayotl, noijki pampa tiktlasojtla Jehová tiktlakamati nin tlanauatil tlen kijtoa “ma kitlakaitakan namiktilistli”, maski ualeua oui (Hebreos 13:4TNM; Salmo 18:29; Eclesiastés 5:14). Ken tikita, Jehová mitsteochiua pampa titetlapouia uan timonechikoa, uan noijki mitsteochiuas pampa timochijchikaua tikpatioitas namiktilistli (1 Tesalonicenses 1:3; Hebreos 6:10).

9 Ik non, ¿tlen mitspaleuis pampa tiktlakaitas monamiktilis? Moneki tikixtopeuas nochi tlamantli tlen uelis kisokiotis monamiktilis. Noijki ok moneki itlaj tikchiuas tlen mitspaleuis xikchikaua monamiktilis.

 AMO XIKCHIUA NION XIKIJTO ITLAJ TLEN UELIS KIYOLKOKOS MONAMIK

10, 11. 1) ¿Tlen amo kitlakaita namiktilistli? 2) ¿Tlen moneki tiktlajtlanis monamik?

10 Yikanaj keski xiuitl se tokni siuatl okijto: “Niktlatlaujtia Jehová ma nechpaleui pampa ma nitlaxiko”. ¿Tleka ijkon okijto? Ye kijtoa: “Nechyolkokoa ken nechnotsa nonamik. Maski itech notlalnakayo amo moita ken nechkokoa, sapanoa nechyolkokoa ijkuak ye nechiluia: ‘San tinechkualania’, noso ‘Sepa amo itlaj mopati’”. Tlen kijtoa nin siuatl, kiteititia tlen kinpanotok akinmej yomonamiktijkej: moiluiaj tlen kinyolkokoa.

11 ¡Techtekipachoa ijkuak akinmej yomonamiktijkej uan kichiuaj ken Cristo moiluiaj tlen kinyolkokoa, tlen oui kilkauaskej! Ik non, akinmej ijkon monotsaj amo kitlakaitaj namiktilistli. ¿Ken tiknotsa monamik? Pampa tikmatis xiktlajtlani monamik: “¿Tlen tikmachilia ika tlen nimitsiluia?”. Tla monamik mitsiluia kiyolkokoa tlen tikiluia, moneki timochijchikauas tikpatlas ken tiknotsa (Gálatas 5:15; xiktlajtolti Efesios 4:31).

12. ¿Tleka uelis kitas toTajtsin Dios amo itlaj ipati ken tikueyichiua?

12 Xikilnamikto ken tiknotsa monamik kichiuas ayakmo kuali ximouika iuan Jehová. Biblia kijtoa: “Tla ikaj mokuayejyekoa kuali kiueyichijtok toTajtsin Dios uan amo kinauatia inenepil, san kikajkayajtok iyolo, uan iueyichiualis amo itlaj ipati” (Santiago 1:26, TNM). Amo ma timokajkayauakan, ken titlajtoaj kipia tlen kitas iuan ken tikueyichiuaj toTajtsin Dios, pampa Biblia amo kijtoa san ma timochijchikauakan tiktekichiuiliskej toTajtsin Dios, uan amo itlaj ipati tlen panoa tokalijtik. Amo ximokajkayaua itech nin tlamantli nion san xikajauilmati (xiktlajtolti 1 Pedro 3:7). Maski ueli tikchiua miak tlamantli uan titlaneltoka, tla tiknotsa  monamik ika tlajtoli tlen kiyolkokoa, amo tiktlakaita namiktilistli uan toTajtsin Dios kitas amo itlaj ipati ken tikueyichiua.

13. ¿Ken uelis moyolkokoskej akinmej yomonamiktijkej?

13 Akinmej yomonamiktijkej, moneki kitaskej kuali tlen kichiuaj pampa amo kinyolkokoskej innamik. Ma tikitakan ome neskayomej. Achto, se siuatl tlen iselti kinmiskaltia ikoneuan, sapanoa motlapouia iuan se tokni tlakatl tlen kipia isiua, uan kitlajtlanilia ma kilui tlen uelis kichiuas itech seki tlamantli. Uan okse neskayotl, se tokni tlakatl tlen ayamo monamiktia, sejse semana sapanoa tetlapouia iuan se tokni siuatl akin yomonamikti. Maski kinekij kichiuaskej tlen kuali akinmej intech timotlapouijtokej, ¿tlen kimachiliaj innamik? Se tokni siuatl tlen ijkon okipanok okijto: “Nechyolkokoa ijkuak nonamik uejkaua motlapouia uan motekipachoa itech se tokni siuatl. Kichiua ma nimomachili amo itlaj nopati”.

14. 1) Akinmej yomonamiktijkej, ¿tleka moneki ma kitlakamatikan tlen kijtoa Mateo 19:5? 2) ¿Tlen moneki motlajtlaniskej akinmej yomonamiktijkej?

14 Tikajsikamatij tleka moyolkokoaj akinmej ijkon kinpanotok. Sekimej tlen yomonamiktijkej amo kitlakamatij tlen toTajtsin Dios kinmiluia: “Yika n tlakatl kikawas ita iwa ina iwa moseitilis iwa isiwa” (Mateo 19:5). Nin amo kijtosneki ayakmo kinmaluiskej intatajuan, pero toTajtsin Dios kijtoa achto motekipachoskej itech insiua. Noijki, san itech monamik ximotekipacho maski melauak tikintlasojtla mokniuan. Tla akinmej yomonamiktijkej okachi katej iuan tokniuan, inkalchanejkauan noso iuan tlen amo innamik, kipiaskej ouijkayotl iuan innamik. Ik non, ximotlajtlani: “¿Kichiua nin ma nikpia ouijkayotl iuan nonamik? ¿Niyetok iuan nonamik, nikkaki ijkuak nechtlapouia uan noijki niktlasojtla ken moneki?”.

15. Ijkon ken kijtoa Mateo 5:28, ¿tleka akinmej yomonamiktijkej amo sapanoa ma mouikakan iuan akin amo innamik?

 15 Ik non, tla akinmej yomonamiktijkej sapanoa motekipachoaj itech ikaj tlen amo innamik, noso sapanoa mouikaj iuan akinmej ok inselti, kimotemolijtokej ouijkayotl. Melauak techyolkokoa ijkuak sekimej tlen kichiuaj ken Cristo peuaj kitlasojtlaj akin amo innamik,  pampa sapanoa mouikaj iuan (Mateo 5:28). Miakej pampa ijkon kimachiliaj, kichiuaj tlen amo kuali noso okseki tlamantli. Ma tikitakan tlen okijto Pablo itech nin tlamantli.

“CHIPAUAK MA YETO TLAPECHTLI KANIN MOTEKAJ”

16. ¿Tlen otenejmachti Pablo itech namiktilistli?

16 Ijkuak Pablo okijto “ma kitlakaitakan namiktilistli”, noijki otenemachti: “Chipauak ma yeto tlapechtli kanin motekaj, pampa toTajtsin Dios kinmixkomakas akinmej auilnemij uan momekatiaj” (Hebreos 13:4, TNM). Tlajtoli “tlapechtli kanin motekaj”, kijtosneki ijkuak se tlakatl moteka iuan se siuatl. Pampa “chipauak ma yeto” san uelis motekaskej akinmej yomonamiktijkej. Ik non, akinmej kichiuaj ken Cristo kitlakamatij tlen kijtoa Biblia: “Xiyolpaki iuan siuatl akin iuan otimonamikti itech motelpokayo” (Proverbios 5:18).

17. 1) ¿Tleka amo tikitaj auilnemilistli ken kitaj tlaltikpaktlakamej? 2) ¿Ken uelis tikchiuaskej ken Job?

17 Akin moteka iuan ikaj tlen amo inamik, amo kintlakamati itlanauatiluan toTajtsin Dios. Itech ninmej tonalmej miakej kitaj amo tlajtlakoli momekatiskej. Maski tlaltikpaktlakamej mokuayejyekoaj amo tlajtlakoli, akinmej melauak tikchiuaj ken Cristo, amo ijkon timokuayejyekoaj. Pampa tikajsikamatij ye “toTajtsin Dios kinmixkomakas akinmej auilnemij uan momekatiaj” uan amo se tlaltikpaktlakatl (Hebreos 10:31; 12:29). Ik non, akinmej kichiuaj ken Cristo kitaj nin tlamantli ken Jehová kita (xiktlajtolti Romanos 12:9). Noijki, ma tikilnamikikan tlen okijto Job akin okatka yolmelajki: “Yonimokuayejyeko nikchiuas itlaj iuan noixtololouan” (Job 31:1). Pampa amo itlaj techchiualtis ma tiauilnemikan, akinmej tikchiuaj ken Cristo tikinmaluiaj toixtololouan  pampa amo keman ma tiktlasojtlakan akin amo tonamik (xikita okse tlamachtil “¿Tlen kijtoa Biblia ijkuak akinmej yomonamiktijkej moxeloaj noso mokajkauaj inmixpan tekiuajkej?”).

18. 1) ¿Ken kinmita Jehová akinmej momekatiaj? 2) ¿Tleka akin momekatia noijki ken akin kiueyichiua se teotsin?

18 ¿Kita toTajtsin Dios sapanoa ueyi tlajtlakoli akinmej momekatiaj? Tlanauatil tlen okijkuilo Moisés techpaleuia ma tikajsikamatikan ken kita nin tlamantli. Itech altepetl Israel, akinmej omomekatiayaj uan okinueyichiuayaj teotsitsintin, omonekiaya kinmiktiskej (Levítico 20:2, 10). ¿Tleka ninmej ome tlamantli se ueyi tlajtlakoli okatka? Pampa tla se israelita okiueyichiuaya se teotsin, okikajkayauaya Jehová. Noijki, akin momekatia kikajkayaua inamik. Akinmej kichiuaj ninmej ome tlamantli, sapanoa tekajkayauaj (Éxodo 19:5, 6; Deuteronomio 5:9; xiktlajtolti Malaquías 2:14). Jehová akin yolmelajki uan akin uelis itech se tlaneltokas amo kiselia ninmej tlamantli.

19. ¿Tlen uelis mitspaleuis pampa amo keman timomekatis, uan tleka?

19 Akinmej tikchiuaj ken Cristo, ayakmo timoyekanaj ika Tlanauatil tlen okijkuilo Moisés. Techpaleuia ma tikilnamiktokan israelitas okichijkej se ueyi tlajtlakoli ijkuak omomekatijkej, uan non techpaleuia amo ijkon ma tikchiuakan. ¿Tleka? Ma tiktlalikan se neskayotl. ¿Tikalakiskia teopan uan timotlankuaketsaskia iixpan se teotsin uan tiktlatlaujtiskia? Tejuatsin tikijtos: “¡Amo keman ijkon nikchiuas!”. ¿Uan tla mitsiluiskej mitsmakaskej miak tomin? Tejuatsin tikijtos: “¡Nion nimokuayejyekos ijkon nikchiuas!”. Pampa melauak tikchiuaj ken Cristo, techtlajyaltia tikueyichiuaskej se teotsin uan tikkajkayauaskej Jehová. Ik non, maski san tlen mitsyoltilanas, moneki ma mitstlajyalti tikkajkayauas Jehová uan monamik (Salmo 51:1, 4; Colosenses 3:5). Amo tiknekij tikchiuaskej itlaj tlen kipaktia  Satanás uan tlen kiyolkokos Jehová uan amo kitlakaitas namiktilistli.

¿KEN UELIS TIKCHIKAUAS MONAMIKTILIS?

20. ¿Tlen kinpanotok akinmej yomonamiktijkej? Xikyekijto ika se neskayotl.

20 Pampa nanmotlakaitaskej, amo san moneki nankixtopeuaskej tlen amo kitlakaita namiktilistli, moneki nankichiuaskej okseki tlamantli. ¿Tlen tlamantli? Pampa tikmatis, ximokuayejyeko namiktilistli ken se kali. Uan satepan ximokuayejyeko itech tlajtolmej kuajkualtsitsintin tlen uelis tikiluis, tikititis tiktlasojtla uan okseki tlamantli tlen kitlakaitas monamiktilis. Nin yetos ken se kali tlen tikxochiotia pampa kualtsin ma moita. Tla tejuatsin iuan monamik san sekan nankatej, yetoskia ken se kualtsin kali kanin onka tlasojtlalistli. Uan tla ayakmo nanmotlasojtlaj, yetoskia ken se kali tlen amo kixochiotiaj, pampa poliui tlasojtlalistli tlen onankimopialiayaj. Tla tiktlakamatis itlanauatil toTajtsin Dios kanin kijtoa “ma kitlakaitakan namiktilistli”, mitsyolinis xikyektlali tlen mitspanotok. Uelis oksepa tikyektlalis tlamantli kuajkualtsitsintin tlen onankipiayaj, ¿ken uelis tikchiuas? Biblia kijtoa: “Ika ixtlamatilistli mochijchiua se kali, uan ika ajsikamatilistli kuali yetos. Ika tlamatilistli kalijtik temi ika tlamantli tlen miak ipati uan teyolpaktia” (Proverbios 24:3, 4). Ma tikitakan ken uelis techpaleuis nin tlaxelol itech namiktilistli.

21. ¿Ken uelis tikchikauas monamiktilis? (Xikita recuadro “ ¿Ken uelis nikchikauas nonamiktilis?”).

21 Itech se kalchanejke kipia “tlamantli tlen miak ipati” ken ijkuak onka melauak tlasojtlalistli, kitlakaitaj toTajtsin Dios ika nochi inyolo uan kipiaj chikauak intlaneltokilis (Proverbios 15:16, 17; 1 Pedro 1:7). Uan ijkon  kipia kuali innamiktilis. Ijkon ken kijtoa nin tlaxelol, ¿ken motemitia kalijtik ika tlamantli tlen teyolpaktia? “Ika tlamatilistli.” Kema, ijkon panoa ijkuak tlaltikpaktlakamej moyekanaj ika tlen kijtoa Biblia tlen kichiua ma kipatlakan ken mokuayejyekoaj uan oksepa ma motlasojtlakan (Romanos 12:2; Filipenses 1:9). Ik non, ijkuak tika iuan monamik, ximomachtikan Biblia uan okseki amatlajkuilolmej tlen tlajtoaj itech akinmej yomonamiktijkej. Non namechpaleuis pampa nankitaskej “tlamantli tlen miak ipati” tlen moneki kipias se kalijtik pampa kuajkualtsin ma moita. Ijkuak itlasojtlalis Jehová mitsyolinia ximopaleui ika tlen mitsiluia itech monamiktilis, yetoskia ken tiktemitia mokalijtik ika “tlamantli tlen miak ipati”. Uan ijkon, moitas kuajkualtsin mokalijtik kanin onka tlasojtlalistli.

22. ¿Ken nanyolpakiskej tla nanmochijchikauaj nankitlakaitaskej namiktilistli?

22 Uelis sapanoa timochijchikauas pampa oksepa kuajkualtsin ma moita monamiktilis. Pero tla nanmochijchikauaskej uan nankichiuaskej tlen moneki, nanyolpakiskej pampa nankitlakamatij itlanauatil Biblia kanin kijtoa moneki ximotlakaitakan (Romanos 12:10; Salmo 147:11). Tla nanmochijchikauaj nankitlakaitaskej namiktilistli, nin namechpaleuis xiyetokan itech itlasojtlalis toTajtsin Dios.

^ párr. 6 Tlen okijto Pablo itech namiktilistli moita ijkuak otenejmachti itech okseki tlamantli (Hebreos 13:1-5).