Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

“Xiyetokan itech itlasojtlalis toTajtsin Dios”

 TLAMACHTIL 7

Ma tikpatioitakan yolilistli ijkon ken toTajtsin Dios kipatioita

Ma tikpatioitakan yolilistli ijkon ken toTajtsin Dios kipatioita

“Motech meya yolilistli.” (SALMO 36:9.)

1, 2. ¿Tlen tetliokolil otechmakak toTajtsin Dios tlen axkan miak ipati, uan tleka?

TOTAJTSIN Dios otechmakak se tetliokolil tlen miak ipati: toyolilis ika tokuayejyekol pampa ma tikteititikan iyelis tlen ye kipia (Génesis 1:27). Pampa otechmakak nin tetliokolil, uelis timokuayejyekoskej itech principios bíblicos uan ika timoyekanaskej. Tla ika timoyekanaj, okachi chikauak yetos totlaneltokilis, tiktlasojtlaskej Jehová ken akinmej “ya kuali kimatih kiyejyekoliah tlan kuali iwa tlan amokuali” (Hebreos 5:14).

2 Axkan sapanoa moneki ma timopaleuikan ika principios bíblicos pampa nochi sapanoa oui, amo onka tlanauatilmej tlen techiluiskej tlen uelis tikchiuaskej itech nochi tlen techpanos itech tonemilis. Ma tikitakan se neskayotl, ken ijkuak kitekitiltiaj pajtli tlen kipia estli uan ken tlapajtiaj kanin monekis kitekitiltiskej toeso. Nin tlamantli techtekipachoa akinmej tiknekij tiktlakamatiskej Jehová. Tla tikinmajsikamatij principios bíblicos, kuali tikpejpenaskej tlen tikchiuaskej, kuali tikpiaskej totlalnamikilis uan tiyetoskej itech itlasojtlalis toTajtsin Dios (Proverbios 2:6-11). Ma tikitakan seki principios bíblicos.

SAPANOA MIAK INPATI YOLILISTLI UAN ESTLI

3, 4. ¿Keman omoijto itech Biblia sapanoa miak ipati estli, uan tlen principios bíblicos kipaleuiaj?

3 Ijkuak Caín okimikti Abel, Jehová okitematilti yolilistli uan estli mouikaj uan ye sapanoa kinpatioita. ToTajtsin Dios okilui Caín: “¡Xikaki! Ieso mokni nechtsajtsilijtok itech tlali” (Génesis 4:10). Iixpan Jehová, ieso Abel okineskayotiaya  iyolilis, akin sapanoa temomojti okimiktijkej. Uelis tikijtoskej ieso Abel okitsajtsilijtoka toTajtsin Dios ma kimakuepa (Hebreos 12:24).

4 Ijkuak opanok Apachiuilistli, toTajtsin Dios okinkauili tlaltikpaktlakamej ma kikuakan nakatl, pero estli amo uelis kikuaskiaj. Ye okinmilui: “San nakatl ika iyolilis —ieso— amo xikkuakan. Noijki, namechtlajtlanis itech inyolilis” (Génesis 9:4, 5). Pampa nochtin tiixuiuan Noé, axkan noijki moneki tiktlakamatiskej nin tlanauatil. Nin techilnamiktia ijkuak toTajtsin Dios omotlapoui iuan Caín uan okijto iyolilis nochi tlen yoltok, kajki itech estli. Nin tlanauatil kiteititia ken Jehová, akin Kitemaka yolilistli, kintlajtlanilis akinmej amo kitlakaitaj yolilistli uan estli (Salmo 36:9).

5, 6. ¿Ken okiteititi Tlanauatil tlen okijkuilo Moisés Jehová sapanoa kipatioita estli? (Xikita recuadro itech “ Ma tiktlakitakan inyolilis yolkamej”).

5 Ninmej ome principios —estli kineskayotia yolilistli uan estli sapanoa miak ipati— noijki katej itech Tlanauatil tlen okijkuilo Moisés. Itech Levítico 17:10, 11, Jehová kijtoa: “Uan tla se tlakatl [...] kikua san tlen estli, melauak itech nitlachixtos itech non yolilistli tlen kikuajtok estli uan melauak nikixpolos itech ialtepe. Pampa yolilistli kajki itech estli, uan ne noneuian oniktlali ipan altar pampa kinpojpoloskej namotlajtlakoluan, pampa estli non tlen namechchipaua pampa itech kajki yolilistli” (xikita recuadro “ Estli kipojpoloa tlajtlakoli”). *

6 Tla ieso se yolkatl amo okitekitiltiayaj itech altar, omonekiaya kinokiskej ipan tlali. Tla ijkon okichiuayaj, yetoskia ken okikopiliayaj yolilistli akin iAxka (Deuteronomio 12:16; Ezequiel 18:4). Israelitas amo omonekiaya sapanoa kitlatemoliskiaj nakatl kox ok okipiaya estli uan kikixtiliskiaj. San omonekiaya kikechtsontekiskiaj uan kuali kikixtiliskiaj ieso,  uan ijkon ijkuak kikuaskiaj amo kinkuejsoskia intlalnamikilis pampa yokiteititijkej kitlakaitaj akin Kitemaka yolilistli.

7. ¿Ken okiteititi David okipatioitaya estli?

7 David akin ‘okipaktiaya’ toTajtsin Dios okinmajsikamatki principios bíblicos tlen katej itech itlanauatiluan Jehová itech estli (Hechos 13:22). Se tonal ijkuak sapanoa oamikiaya,  eyi itlakauan omoteuijkej ijkuak opanokej kanin okatkaj filisteos uan okikixtijkej atl itech se atekochtli uan okiuikilijkej David. ¿Tlen okichi ye? Okijto: “¿[Nikonis] inmieso tlakamej tlen oyajkej maski uelis mikiskiaj ompa?”. Iixpan David non atl okineskayotiaya inmieso nonmej tlakamej. Ik non, maski sapanoa oamikiaya “okinokili Jehová” non atl (2 Samuel 23:15-17).

8, 9. ¿Okipatlak toTajtsin Dios ken kita yolilistli uan estli ijkuak opejki intlanechikol akinmej kichiuaj ken Cristo? Xikyekijto tleka ijkon titlanankilia.

8 Kanaj 2,400 xiuitl satepan ijkuak Noé okiseli tlanauatil itech estli uan kanaj 1,500 xiuitl satepan ijkuak okitemakakej Tlanauatilmej, Jehová okinauati Cuerpo Gobernante tlen okinyekanaya akinmej achto opejkej kichiuaj ken Cristo ma kijkuilokan: ‘Porke n Espíritu Santo iwa tejwah noiwa, yotikijtojkeh amitla ok se tomechnawatiskeh xikchiwakah; sanwel ni tlan milák moneki nonkichiwaskeh: Amo xikkuakah nakatl non yokinmanilijkeh n diosmeh non kinmachijchiwah. Amo xikkuakah estli nion nakatl de n yolkameh non san okintoskamalinkeh, [...] nion ximomekatijtinemikah’ (Hechos 15:28, 29).

9 Cuerpo Gobernante itech achto siglo okajsikamatki toTajtsin Dios kipatioita estli uan tla amo kuali kitekitiltiskia, yetoskia ken kinueyichijtoskiaj teotsitsintin noso auilnentoskiaj. Axkan, akinmej melauak tikchiuaj ken Cristo tiktlakamatij nin tlanauatil. Noijki timokuayejyekoaj ken uelis timopaleuiskej ika ninmej principios bíblicos, uan tikyolpaktiskej Jehová ika tlen tikpejpenaj tikchiuaskej itech estli.

ESTLI TLEN MOTEKITILTIA KEN PAJTLI

¿Ken uelis nikyekiluis akin tlapajtia kox nikselis tlamantli tlen kipia san tepitsin estli?

10, 11. 1) ¿Kimotlaliliaj iTlaixpantijkauan Jehová estli uan naui tlamantli tlen kipia estli? 2) ¿Akinmej kichiuaj ken Cristo, ¿tlen tlamantli itech estli moneki kipejpenaskej?

10 ITlaixpantijkauan Jehová tiktlakamatij nin tlanauatil: “Amo xikkuakah [...] estli”. Nin noijki kijtosneki amo tikmotlaliliaj estli, amo tiktemakaj toeso nion pampa kitlatiskej uan satepan oksepa techtlaliliskej. Noijki pampa  tiktlakamatij itlanauatil toTajtsin Dios, amo tikseliaj naui tlamantli tlen kipia estli: glóbulos rojos, glóbulos blancos, plaquetas uan plasma.

11 Axkan, ninmej naui tlamantli tlen kipia estli kixexeloaj uan kichiuaj okseki tlamantli tlen kipia san tepitsin estli, tlen kitekitiltiaj itech miak tlatlamantli. ¿Uelis kiselis akin kichiua ken Cristo tlamantli tlen kipia san tepitsin estli? ¿Kitas ken yetoskia melauak “estli”? Nin san tisejse uelis tikpejpenaskej tlen tikchiuaskej. Noijki tikpejpenaskej kox tikseliskej hemodiálisis, hemodilución uan recuperación de sangre, tla amo achto okitlatijkej toeso (xikita okse tlamachtil “Tlamantli tlen kipia san tepitsin estli uan ken tlapajtiaj”).

12. Tla techkauilia totlalnamikilis, ¿ken moneki tikitaskej uan tlen tikchiuaskej ijkuak itlaj tikpejpenaskej?

12 ¿Kipatioita Jehová tlen tikpejpenaj itech nin tlamantli?  Kema, pampa ye kitekipachoa tlen timokuayejyekoaj uan tlen techyolinia ma tikpejpenakan tlen tikchiuaskej (xiktlajtolti Proverbios 17:3; 24:12). Moneki timotlatlaujtiskej itech Jehová uan timoyekanaskej ika totlalnamikilis tlen yotikmachtijkej ika Biblia pampa tikpejpenaskej pajtli noso ken timopajtiskej (Romanos 14:2, 22, 23). Ik non, amo tikchiuaskej tlen oksekimej techiluiskej nion tikintlajtlaniskej: “¿Tlen tikchiuas tla ijkon mitspanotoskia?”. Itech nin tlamantli san tejuan “tosejselti tikmokuitiskeh inawak Dios nochi tlan otikchijkeh” (Romanos 14:12; xikita recuadro “ ¿Nikpatioita estli?”). *

ITLANAUATILUAN JEHOVÁ KITEITITIAJ TECHTLASOJTLA KEN SE TETA

13. ¿Tlen kiteititia Jehová ika itlanauatiluan uan ika principios bíblicos? Xikyekijto ika se neskayotl.

13 Tlanauatilmej uan principios bíblicos kiteitititaj Jehová akin Kitemaka Tlanauatilmej ye ixtlamatki, uan ken se Teta tlen motekipachoa itech ikoneuan pampa kuali ma yetokan (Salmo 19:7-11). Maski nin tlanauatil “ma kimoxikoltikan [...] estli”, amo kitlaliaj akinmej tlapajtiaj, techpaleuia pampa amo itlaj techpanos ika tlen kipia kitas ijkuak kimotlaliliaj estli (Hechos 15:20, TNM). Miakej akinmej amo tlapajtiaj ika estli kijtoaj nin tlen okachi kuali itech ninmej tonalmej. Ik non, akinmej melauak tikchiuaj ken Cristo, tikitaj nin techititia Jehová sapanoa ixtlamatki uan sapanoa techtlasojtla (xiktlajtolti Isaías 55:9; Juan 14:21, 23).

14, 15. 1) ¿Ika tlen tlanauatilmej okiteititi toTajtsin Dios kitlasojtla ialtepe? 2) ¿Ken uelis techpaleuiskej ninmej principios tlen kipiaj ninmej tlanauatilmej pampa amo timokokoskej?

14 ToTajtsin Dios nochipa kitekipachoa kuali ma yetokan itekipanojkauan. Ijkon okiteititi itech yiuejkika altepetl Israel ijkuak okinmakak tlanauatilmej. Se neskayotl, tla se israelita kichijchiuaskia se kali, omonekiaya kiyaualos  ikuapak ika tepamitl pampa amo ikaj motepexiuiskia, pampa ompa okichiuayaj tlatlamantli tekitl uan omonekiaya momaluiskej (Deuteronomio 22:8; 1 Samuel 9:25, 26; Nehemías 8:16; Hechos 10:9). Noijki okinnauati ma kintsakuakan intoros tlen uelis tekokoskiaj (Éxodo 21:28, 29). Akin amo okintlakamatiaya ninmej tlanauatilmej, okiteititiaya amo okintlakaitaya oksekimej pampa kuali ma yetokan, uan tla ikaj mikiskia yetoskia itlajtlakol.

15 ¿Ken uelis timoyekanaskej ika principios tlen kisaj itech ninmej tlanauatilmej? Timokuayejyekoskej ken kajki tocarro uan ken tikuikaj, toyolkauan, tokalijtik, kanin titekitij uan ken tikpejpenaj tlen ika timoyolpaktiaj. Itech uejueyij altepemej mikij miakej telpokamej uan ichpokamej pampa kiouijtiliaj inyolilis. Ik non, telpokamej uan ichpokamej tlen kinekij yetoskej itech itlasojtlalis toTajtsin Dios uan kipatioitaj yolilistli, amo moyolpaktiaj ika tlamantli tlen uelis kinkokos. Amo mokuayejyekoaj amo itlaj kinpanos. Okachi kuali, momaluiaj pampa amo tlajyouiskej uan non kichiua ma yolpakikan (Eclesiastés 11:9, 10).

16. ¿Tlen principio bíblico techpaleuia itech tlamayauilistli? (Xikita nota.)

16 Noijki Jehová kinpatioita konemej tlen ayamo nesij. Yiuejkika itech altepetl Israel, tla ikaj okikokoaya se siuatl tlen kipiaskia ikonetsin, uan tla ye noso ikonetsin mikiskia, toTajtsin Dios okitaya itlajtlakol akin otemikti uan kitemakaskia “se yolilistli ika se yolilistli” (xiktlajtolti Éxodo 21:22, 23). * Ma timokuayejyekokan tlen kimachilia Jehová pampa kinmayauij sapanoa miakej konemej sejse xiuitl, uan ualeua ijkon kichiuaj pampa auilnemij.

17. ¿Ken uelis tikyolseuiskej se siuatl tla okimaya ikonetsin ijkuak ayamo omomachtiaya itlanauatiluan toTajtsin Dios?

17 ¿Tlen panoa tla se siuatl okimaya ikonetsin ijkuak ayamo  okimatiaya tlen melauak tlamachtia Biblia? ¿Kijtosneki toTajtsin Dios amo kiknomatis? Amo. Tla melauak moyolkuepa, Jehová kitlapojpoluis ika ieso Jesús tlen okinoki (Salmo 103:8-14; Efesios 1:7). Ik non, Jesús okijto:  “Amo onikinnotsako non yekmilajkameh. Ne onikinnotsako n tlajtlakolchijkeh” (Lucas 5:32).

MA TIKMOKIXTILIKAN TLEN AMO KUALI TIMOKUAYEJYEKOAJ

18. ¿Ken kiteititia Biblia tleka sekimej momiktiaj?

18 Amo san moneki amo titekokoskej, Jehová kineki ma tikkixtikan itech toyolo tla titekokoliaj, pampa nin kichiua miakej ma momiktikan. Tlatitlanil Juan okijto: “Nochi akin kikokolia ikni, se temikti” (1 Juan 3:15). Nin amo san kijtosneki amo kineki kitas ikni, ye kinekiskia ma miki. Akin tekokolia uelis kijtos tlen amo melauak itech ikni noso kitlajtlakoltis itlaj, tla ijkon kichiua, toTajtsin Dios kixkomakas (Levítico 19:16; Deuteronomio 19:18-21; Mateo 5:22). Sapanoa ipati ma tikmokixtilikan itech toyolo tlen amo kuali (Santiago 1:14, 15; 4:1-3).

19. Akin moyekana ika principios bíblicos, ¿ken kinmita tlaxelolmej ken Salmo 11:5 uan Filipenses 4:8, 9?

19 Akin kipatioita yolilistli uan kineki yetos itech itlasojtlalis Jehová, kixtopeua nochi tlen ika moteuiaj. Itech Salmo 11:5 kijtoa Jehová “kikokolia akin kipaktia moteuis”. Nin tlaxelol amo san techiluia ken iyelis toTajtsin Dios, noijki techmachtia se principio bíblico tlen uelis kiyekanas tonemilis. Pampa tiktlasojtlaj toTajtsin Dios tikixtopeuaj nochi tlamauisol tlen kichiua ma techpakti ken moteuiaj. Ik non, Jehová “akin kichiwa matikpiakah yolsewílistli”, techpaleuia ma tikpiakan itech tokuayejyekol uan itech toyolo “tlan teyolpakti iwa tlan moneki se kiyektenewas”, tlen kichiua ma yeto yolseuilistli (xiktlajtolti Filipenses 4:8, 9).

ORGANIZACIONES TLEN INTLAJTLAKOL MIKIJ TLALTIKPAKTLAKAMEJ

20-22. ¿Tlen kipejpenaj kichiuaskej akinmej kichiuaj ken Cristo, uan tleka?

20 Iixpan toTajtsin Dios, nochi tlen Satanás kiyekantok itlajtlakol pampa kinokiaj miak estli. Itech Biblia moneskayotiaj tekiuajkej ken se yolkatl tlen temomojti, pampa yokinmiktijkej  sapanoa miakej tlaltikpaktlakamej, uan miakej itekipanojkauan Jehová (Daniel 8:3, 4, 20-22; Apocalipsis 13:1, 2, 7, 8). Ninmej tekiuajkej, tlasemankej uan ixtlamatkej san sekan tekitij pampa kinchijchiuaj miak teposmej tlen temomojti uan kitlanij sapanoa miak tomin. Melauak “nochteh n tlaltikpaktlakah [...] kinnawatijtok n satanás” (1 Juan 5:19).

21 Pampa tikchiuaj ken Cristo, tejuan “ayakmó de nin tlaltíkpaktli” pampa amo timokajkalakiaj itech política nion itech guerras, ik non, amo timotlajtlakoltiaj inmiuan pampa temiktiaj (Juan 15:19; 17:16). * Noijki tikchiuaj ken Cristo, ijkuak techtojtokaj amo tikinteuiaj. Okachi kuali, tikintlasojtlaj akinmej techkokoliaj uan timotlatlaujtiaj inpampa (Mateo 5:44; Romanos 12:17-21).

22 Ik non, akinmej melauak kichiuaj ken Cristo, amo mokajkalakiaj itech tlen kichiua “weyi Babilonia”, akin  kinyekana nochi tlaneltokalistli tlen amo melauak uan noijki itlajtlakol pampa miakej yomikej. Biblia kijtoa itech “Babilonia, omajsik inmesso n profetas, inmesso n nochteh akimeh iaxkawah Dios, iwa de nochteh akimeh okintoskatsontekeh itech nin tlaltíkpaktli”. Ik non, technauatia: “Nomejwah akimeh onomechpejpenki, xikisakah de Babilonia” (Apocalipsis 17:6; 18:2, 4, 24).

23. ¿Tlen kijtosneki se kisas itech “weyi Babilonia”?

23 Akin kisa itech “weyi Babilonia”, amo san kipojpoloskej itoka kanin ijkuilitokej nochtin akinmej pouij itech. Moneki kikokolis nochi tlen kichiua noso tlen kiselia tlaneltokalistli tlen amo melauak, ken auilnemilistli, mokajkalakiskej itech política uan kitemoskej sapanoa miak tomin (xiktlajtolti Salmo 97:10; Apocalipsis 18:7, 9, 11-17). ¡Sapanoa miakej yokipolojkej inyolilis pampa kichiuaj nin tlamantli!

24, 25. 1) Tla akin otemikti moyolkuepa, ¿san ika tlen uelis kitlapojpoluis toTajtsin Dios? 2) ¿Uan tlen techilnamiktia tlen yiuejkika omochiuaya?

24 Sejse tejuan achto tikseliskiaj tlaneltokalistli tlen melauak, otikpaleuiayaj tlen kiyekana Satanás, ik non, otimotlajtlakoltijkej pampa miakej yokinmiktijkej. Pero otikpatlakej toyelis, otitlaneltokajkej itech imikilis Cristo uan yotimotemakakej itech toTajtsin Dios, ik non, Jehová techtlapojpoluia uan techmaluia pampa kuali iuan ma timouikakan (Hechos 3:19). Ken techmaluia, techilnamiktia altepemej tlen yiuejkika okatkaj kanin sekimej omopaleuiayaj (Números 35:11-15; Deuteronomio 21:1-9).

25 ¿Ken omotekitiltiayaj nonmej altepemej? Tla se israelita amo okitak ken okimikti ikaj, oyaya itech se altepetl pampa ompa mopaleuiskia. Uan jueces okijtoayaj tlen kipanoskia akin amo okitak ken otemikti, uan omonekiaya ompa yetoskia hasta ijkuak mikiskia ueyi teopixki. Uan satepan ueliskia chantis san kanin kinekiskia. ¡Sapanoa kuajkualtsin ken teiknomati Jehová uan ken kipatioita iyolilis tlaltikpaktlakatl! Ijkon ken altepemej tlen yiuejkika okatkaj kanin omopaleuiaya akin amo okitak ken otemikti, axkan  noijki toTajtsin Dios, ika imikilis Cristo techmaluia amo ma timikikan pampa ualeua amo tikintlakamatij itlanauatiluan itech yolilistli uan estli. ¿Tikpatioita ken techpaleuia? ¿Ken uelis tikteititis melauak ijkon tikchiua? Uelis tikinyoleuas oksekimej noijki ma mopaleuikan itech tlen okineskayotijkej altepemej kanin omopaleuiayaj. Uan moneki totoka, pampa yiuits “tlaijyowílistli [tlen] yetos satlawel temojti” (Mateo 24:21; 2 Corintios 6:1, 2).

TIKPATIOITAJ YOLILISTLI TLA TITETLAPOUIAJ ITECH ITEKIUAJKAYO TOTAJTSIN DIOS

26-28. ¿Tleka noijki techpanotok ken teotlajtojki Ezequiel, uan ken uelis tiyetoskej itech itlasojtlalis toTajtsin Dios?

26 Tlen axkan kipanotok ialtepe toTajtsin Dios, techilnamiktia ijkuak okatka teotlajtojki Ezequiel, ijkuak okinauatijkej ma tlajpixto itech ikalijtik Israel. Jehová okilui: “Ijkuak tikkakis notlajtol moneki tikinnejmachtis nopampa”. Tla Ezequiel amo kitlakamatiskia nin tlanauatil, yetoskia itlajtlakol ijkuak ye kixkomakaskia Jerusalén (Ezequiel 33:7-9). Pampa Ezequiel otetlakamatki, amo itlajtlakol omikej tlaltikpaktlakamej.

27 Ayakmo uejkauas pampa nochi tlen kiyekana Satanás kixpoloskej. Ik non, akinmej tiiTlaixpantijkauan Jehová tikpiaj se tlateochiualistli, tiktematiltiskej “tonal ijkuak momakuepas toTajtsin Dios” uan noijki itech iTekiuajkayo (Isaías 61:2; Mateo 24:14). ¿Timochijchikaua pampa titlapaleuis itech nin tekitl? Tlatitlanil Pablo okitak sapanoa ipati tetlapouis. Ik non, okijto: “Amo notlajtlakol tla aka amo momakixtis. Porke ne onomechmatilti nochi tlan Dios kimonekiltia, iwa amitla onomechtlaatili” (Hechos 20:26, 27). ¡Melauak se kuali neskayotl otechmakak!

28 Axkan, pampa tiyetoskej itech itlasojtlalis toTajtsin Dios, amo san moneki tikitaskej yolilistli uan estli ken ye kita. Moneki tiyetoskej tichipauakej iixpan, ijkon ken tikitaskej itech okse tlamachtil.

^ párr. 5 Itech tlajtolmej “yolilistli kajki itech estli”, se revista tlen itoka Investigación y Ciencia, kijtoa: “Amo san tikijtoskej estli kineskayotia yolilistli, tikitaj melauak nin: nochi tlatlamantli células tlen kipia estli moneki pampa yetos yolilistli”.

^ párr. 12 Xikita revista ¡Despertad! de agosto de 2006, itech páginas 3, 5 uan 10, tlen kichijchiuaj iTlaixpantijkauan Jehová.

^ párr. 16 Akinmej momachtiaj itech tlajtolmej hebreas tlen kipia Biblia, kijtoaj: “Nonmej tlajtolmej amo kiteititia san omonekiaya mochiuas itech siuatl akin okikokojkej”. Noijki, Biblia amo kijtoa kox Jehová achto kitaskia keski kauitl okipiaya konetl tlen ayamo onesiaya pampa tlaixkomakaskia.

^ párr. 70 Pampa okachi tikmatis, xikita okse tlamachtil “Tlamantli tlen kipia san tepitsin estli uan ken tlapajtiaj”.