Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

“Xiyetokan itech itlasojtlalis toTajtsin Dios”

 TLAMACHTIL 5

¿Tlen kijtosneki amo tikchiuaskej ken tlaltikpaktlakamej?

¿Tlen kijtosneki amo tikchiuaskej ken tlaltikpaktlakamej?

“Ayakmó nonkichiwah tlan yejwah kichiwah.” (JUAN 15:19.)

1. ¿Tlen okijto Jesús itech yoak ijkuak yimikiskia?

ITECH yoak ijkuak yimikiskia Jesús, okijto melauak okitekipachoaya ken yetoskiaj imachtijkauan satepan. Okitlatlaujti iTajtsin: “Amo nimitstlatlaujtia xikinkixti de itech nin tlaltíkpaktli, yej xikinyekmokuitlawi para amo makinkajkayawa n amokualitlakatl. Ijkó kemi Ne amo de nin tlaltíkpaktli, yejwah noiwa ayakmó de nin tlaltíkpaktli” (Juan 17:15, 16). Ijkuak Jesús omotlatlaujti ika nochi iyolo, okiteititi sapanoa okintlasojtlaya imachtijkauan, uan melauak ipati tlen okinmilui sekimej imachtijkauan itech non yoak: “Ayakmó nonkichiwah tlan yejwah kichiwah” (Juan 15:19). Jesús okitak miak ipati imachtijkauan amo ma kichiuakan tlen tlaltikpaktlakamej kichiuaj.

2. ¿Itech akinmej otlajto Jesús ijkuak okijto “ayakmó nonkichiwah tlan yejwah kichiwah”?

2 Ijkuak Jesús okijto “ayakmó nonkichiwah tlan yejwah kichiwah”, otlajto itech tlaltikpaktlakamej tlen amo kitemoaj toTajtsin Dios, akinmej Satanás kinyekana, tlen san motekipachoaj intech uan moueyinekij ken ye (Juan 14:30; Efesios 2:2; 1 Juan 5:19). Ik non, “nochi akin kimoknitia tlan amokuali onka itech nin tlaltíkpaktli, iselti mokopa ikokolikni n Dios” (Santiago 4:4). Ik non, nochtin akinmej tiknekij tiyetoskej itech itlasojtlalis toTajtsin Dios, ¿ken uelis tichantiskej nikan Tlaltikpak uan amo tikchiuaskej tlen tlaltikpaktlakamej kichiuaj? Ma tikitakan makuili tlamantli: nochipa ma tikpaleuikan iTekiuajkayo toTajtsin Dios uan amo ma timokajkalakikan itech política, ma tikixnamikikan iespíritu nin Tlaltikpak, ma timotlakentikan uan ma timoyejyektlalikan ken moneki, ma  tikpiakan san tlen moneki itech tonemilis uan ma tikmotlalilikan tepostli ajsitok tlen uits itech toTajtsin Dios.

MA TIKPALEUIKAN TEKIUAJKAYOTL UAN AMO SAN KANIN MA TIMOKAJKALAKIKAN

3. 1) ¿Omokajkalaki Jesús itech política tlen okatka itech nonmej tonalmej? 2) ¿Tleka moijtoa Jesús kintitlani imachtijkauan tlen tlapejpenalmej? (Noijki xikijto tlen kijtoa nota.)

3 Jesús amo omokajkalaki itech política tlen okatka itech nonmej tonalmej, okachi kuali, ye otetlapoui itech iTekiuajkayo toTajtsin Dios kanin ye yetoskia ueyi Tekiua (Daniel 7:13, 14; Lucas 4:43; 17:20, 21). Ik non, ye okijto iixpan tekiua romano Poncio Pilato: “Notekiwajyo amo kajki itech nin tlaltíkpaktli” (Juan 18:36). Ken tiimachtijkauan, tikchiuaj ken ye pampa tikpaleuiaj Cristo uan iTekiuajkayo uan titetlapouiaj itech non Tekiuajkayotl itech nochi Tlaltikpak (Mateo 24:14). Tlatitlanil Pablo okijkuilo: “Ik non, tejuan techtitlanij ipatka Cristo [...]. Pampa tikatej ipatka Cristo timechtlatlaujtiaj: ‘Ximokuepakan iuan toTajtsin Dios’” (2 Corintios 5:20, TNM). *

4. Akinmej melauak kichiuaj ken Cristo, ¿ken kiteititiaj kipaleuiaj iTekiuajkayo toTajtsin Dios? (Xikita recuadro “ Akinmej okichiuayaj ken Cristo amo san kanin omokajkalakiayaj”).

4 Tekiuajkej kintitlanij sekimej tlaltikpaktlakamej itech okse ueyi altepetl pampa inpatkaj ma tlajtokan, ik non, amo mokajkalakiaj itech tlen kichiua altepetl kanin kintitlanij. Yejuan kipaleuiaj tekiua tlen okintitlanki. Noijki ijkon kichiuaj tlapejpenalmej akinmej ‘incha kajki ilwikak’ (Filipenses 3:20). Ijkon ken yejuan, tlapejpenalmej mochijchikauaj miak pampa tetlapouiskej itech Tekiuajkayotl, ik non, sapanoa miakej yokinpaleuijkej “oksikimeh ichkameh” pampa ‘ma mokuepakan iuan toTajtsin Dios’ (Juan 10:16; Mateo 25:31-40). Uan ninmej noijki ken yetoskia kintitlani Cristo, pampa kinpaleuiaj iikniuan Cristo tlen tlapejpenalmej. Ken se nechikol tlen kipaleuia  Tekiuajkayotl Mesiánico, ninmej ome nechikolmej amo mokajkalakiaj itech política (xiktlajtolti Isaías 2:2-4).

5. ¿Ken okatka tlanechikol yiuejkika itech Israel uan ken kajki axkan, uan ken tikteititiaj akinmej tikchiuaj ken Cristo?

5 Amo timokajkalakiaj itech tlen tlaltikpaktlakamej kichiuaj  pampa amo tiknekij tikkauaskej Cristo, pero onka okseki tlamantli tlen techyolinia. Yiuejkika, israelitas san ochantiayaj itech altepetl tlen toTajtsin Dios okinmakak, axkan tejuan tikatej itech nochi Tlaltikpak (Mateo 28:19; 1 Pedro 2:9). Ik non, tla tikpaleuiaj se partido político kanin tichantij, kichiuas ma moxelokan tokniuan uan ayakmo uelis tikintlapouiskej tlaltikpaktlakamej itech iTekiuajkayo toTajtsin Dios (1 Corintios 1:10). Uan yetoskia ken tikinteuiskiaj tokniuan ijkuak mochiuas se guerra, non itlaj amo kuali, pampa otechnauatijkej ma tikintlasojtlakan (Juan 13:34, 35; 1 Juan 3:10-12). Ik non, Jesús okinmilui imachtijkauan amo ma kitekitiltikan tepostli tlen tekokoa. Okachi kuali, ye okijto ma kintlasojtlakan akinmej kinkokoliaj (Mateo 5:44; 26:52; xikita recuadro tlen itoka “ ¿Nimokajkalakia itech tlen tlaltikpaktlakamej kichiuaj?”).

6. ¿Ken tikitaj “César” akinmej yotimotemakakej itech toTajtsin Dios?

6 Akinmej melauak tikchiuaj ken Cristo, yotikmakakej toyolilis toTajtsin Dios uan amo se tlaltikpaktlakatl, se tlanechikol tlen kipiaj tlaltikpaktlakamej nion se altepetl. Itech 1 Corintios 6:19, 20 kijtoa: “Nomokuerpo [noso namoyolilis] mach ok nomoaxka, porke Dios onomechko saikpanoa patio”. Ik non, maski akinmej melauak tikchiuaj ken Cristo tikmakaj “César” tlen iaxka, ken ijkuak tiktlaxtlauaj tlen moneki, tiktlakaitaj uan tiktlakamatij maski amo itech nochi tlamantli, okachi timochijchikauaj ‘tikmakaskeh Dios tlan iaxka n Dios’ (Marcos 12:17; Romanos 13:1-7). Nin kijtosneki tikueyichiuaj, tiktlasojtlaj ika nochi toyolo uan tiktlakamatij nochipa. Uan tla monekis, noijki tiktemakaskej toyolilis pampa toTajtsin Dios (Lucas 4:8; 10:27; xiktlajtolti Hechos 5:29; Romanos 14:8).

MA TIKIXTOPEUAKAN “ESPÍRITU DE NIN TLALTÍKPAKTLI”

7, 8. ¿Tlen kijtosneki “espíritu de nin tlaltíkpaktli”, uan ken “kinyakantok” tlaltikpaktlakamej?

7 Noijki tikteititiaj amo tikchiuaj ken tlaltikpaktlakamej ijkuak tikixtopeuaj “espíritu de nin tlaltikpaktli”. Pablo  okijkuilo: “Tejwah amo otikselijkeh se espíritu de nin tlaltíkpaktli” (1 Corintios 2:12). Noijki okintlajkuilili tokniuan tlen ochantiayaj Éfeso: “Nomejwah ononkichiwayah tlan kichiwah n tlaltikpaktlakah. Ononkichiwayah tlan kiwilita non tlanawatia kan ejekatl, iwa axa kinyakantok akimeh amo kitlakitah Dios” (Efesios 2:2, 3).

8 Nin “ejekatl” noso “espíritu de nin tlaltíkpaktli” tlen amo moita, kinchiualtia tlaltikpaktlakamej amo ma kitlakamatikan toTajtsin Dios uan kintopeua ma kichiuakan tlen ‘inkuerpo kelewia, [uan] inmixtololowah noiwa kelewiah tlan kita’ (1 Juan 2:16; 1 Timoteo 6:9, 10). Nin espíritu “tlanawatia” pampa kitekitiltia tlajtlakoli tlen kajki totech uan amo moita ken kichiua, nochipa kitemojtok ken kichiuas ma titlajtlakolchiuakan uan san kanin kajki ken ejekatl. Noijki “kinyakantok” tlaltikpaktlakamej akinmej amo tetlakamatij, pampa kichiua amo ma kipiakan kuali inyelis ken ijkuak san intech motekipachoaj, moueyinekij, tlaixnekij, teixnamikij uan amo ikaj kitlakamatij. * Nochi nin kichiua yolik ma moskalti itech inyolo tlaltikpaktlakamej tlen Diablo kichiua (Juan 8:44; Hechos 13:10; 1 Juan 3:8, 10).

9. ¿Ken uelis kalakis “espíritu de nin tlaltíkpaktli” itech tokuayejyekol uan itech toyolo?

9 ¿Uelis kalakis “espíritu de nin tlaltíkpaktli” itech tokuayejyekol uan itech toyolo? Kema, tla amo timomaluiaj uelis ijkon techpanos (xiktlajtolti Proverbios 4:23). Uelis amo tikitaskej ken peuas moskaltis, uelis ika tlaltikpaktlakamej tlen moitaj yolkualmej, pero amo kitlasojtlaj Jehová (Proverbios 13:20; 1 Corintios 15:33). Noijki techijtlakos tla tikintlajtoltiaj amatlajkuilolmej tlen amo kuali, tla tikitaj pornografía noso tlen kitlaliaj itech Internet akinmej yomoxelojkej itech Jehová, ika tlamauisolmej tlen sokiojkej, ijkuak mauiltiaj uan motlatlanij, uan nochi tlamantli tlen kiteititia tlen Satanás mokuayejyekoa noso akinmej ye kinyekana.

10. ¿Ken uelis tikixtopeuaskej “espíritu de nin tlaltíkpaktli”?

 10 ¿Ken uelis tikixtopeuaskej “espíritu de nin tlaltíkpaktli” pampa tiyetoskej itech itlasojtlalis toTajtsin Dios? Moneki ma tikchikauakan totlaneltokilis ika nochi tlen Jehová techmaka uan nochipa ma tiktlatlaujtikan ma techmaka iespíritu santo. Maski Satanás uan nochi tlen kiyekana kipiaj chikaualistli, Jehová okachi chikauak (1 Juan 4:4). Sapanoa ma timotlatlaujtikan itech Jehová uan ijkon timotokiskej itech.

 MA TIMOTLAKENTIKAN UAN MA TIMOYEJYEKTLALIKAN KEN MONEKI

11. ¿Ken moita “espíritu de nin tlaltíkpaktli” itech ken motlakentiaj tlaltikpaktlakamej?

11 “Espíritu de nin tlaltíkpaktli” moita itech ken tlaltikpaktlakamej motlakentiaj, ken moyejyektlaliaj uan tla chipauakej. Pampa itech uejueyij altepemej miakej sapanoa pitsotik motlakentiaj, se tlakatl tlen tlajtoa itech televisión okijto satepan siuamej akinmej auilnemij ayakmo kipiaskej tlen kimokentiskej. Se periódico okijto: “San tepitsin tlakemitl uan amo ikaj pinaua”, uan ijkon motlakentiaj maski ok ichpokatsitsintin. Noijki, tlaltikpaktlakamej tlen pitsotik motlakentiaj kiteititiaj amo ikaj kitlakamatij uan amo motlakaitaj nion motlasojtlaj.

12, 13. ¿Tlen principios bíblicos techpaleuiaj ma tikmatikan ken moneki timotlakentiskej?

12 Pampa tiitekipanojkauan Jehová, tiknekij kuali timotaskej, kijtosneki tikpiaskej chipauak totlaken, kualtsin uan tlen kinamikis kanin tiaskej. Moneki nochipa ma timotlakentikan ‘ken moneki uan ika kuali tokuayejyekolis’, uan ‘ma tikchiuakan tlen kuali’ ken moneki kichiuaskej tlakamej uan siuamej tlen “kiueyichiuaj toTajtsin Dios”. Amo techtekipachoa san tejuan ma techitakan, okachi kuali, tiknekij ‘tiyetoskej itech itlasojtlalis toTajtsin Dios’ (1 Timoteo 2:9, 10, TNM; Judas 21, TNM). Okachi kuajkualtsin technextiaj ‘tiyetoskeh tlakualtsi ik tlaijtik, itech toyolo, [...] ni tlan okachi ipati ixpan n Dios’ (1 Pedro 3:3, 4).

13 Nochipa ma tikilnamiktokan ken timotlakentiaj uan ken timoyejyektlaliaj, kichiuas ma kitakan kuali noso amo tlaneltokalistli tlen melauak. Ijkuak tlajtoa itech ken tikpiaj tonemilis, tlajtoli griego tlen kijtoa “ken moneki” kijtosneki se kitlakaitas tlen kimachiliaj noso mokuayejyekoaj oksekimej. Ik non, okachi moneki ma tiktlakaitakan intlalnamikilis oksekimej uan amo ma timokuayejyekokan san tejuan tikijtoaj ken tiknekij timotlakentiskej. Okachi kuali, tiknekij tikueyichiuaskej Jehová uan ialtepe, tikteititiskej tiitekipanojkauan  uan ‘nochi tikchiuaskeh para tikiweyijkachiwaskeh n Totajtsi Dios’ (1 Corintios 4:9; 10:31; 2 Corintios 6:3, 4; 7:1).

¿Kiueyichiua Jehová ken nimotlakentia uan nimoyejyektlalia?

14. ¿Tlen moneki timotlajtlaniskej pampa tikmatiskej kox kuali timoyejyektlaliaj uan kox tichipauakej?

14 Moneki chipauak ma yeto totlaken uan kuali ma timoyejyektlalikan ijkuak tiauij nechikol noso ijkuak titetlapouitiuij. Ximotlajtlani: “¿Nechtlajtlataj ken nimotlakentia noso pampa amo nichipauak? ¿Pinauaj oksekimej ijkuak nechitaj? ¿Okachi nikpatioita tlen nikneki uan amo nimochijchikauas pampa nikselis se tekitl itech tlanechikol?” (Salmo 68:6; Filipenses 4:5; 1 Pedro 5:6).

15. ¿Tleka Biblia amo nochi techiluia ken moneki timotlakentiskej, timoyejyektlaliskej noso ken tikteititiskej kox tichipauakej?

15 Akinmej tikchiuaj ken Cristo, Biblia amo nochi techiluia ken moneki timotlakentiskej, timoyejyektlaliskej noso ken tikteititiskej kox tichipauakej. Jehová techkauiliaj ma tikpejpenakan tlen tiknekij uan ma tiktekitiltikan totlalnamikilis. Ye kineki kuali ma timokuayejyekokan ika principios bíblicos, uan ma tikchiuakan ken akinmej “ya kuali kimatih kiyejyekoliah tlan kuali iwa tlan amokuali” (Hebreos 5:14). Uan tlen okachi ipati, Jehová kineki ma tikchiuakan nochi pampa tiktlasojtlaj uan pampa tikintlasojtlaj oksekimej (xiktlajtolti Marcos 12:30, 31). Onka miak tlakemitl uan tlatlamantli kajki ken uelis timoyejyektlaliskej tlen kualtsin moita. San moneki tias itech uejueyij nechikolmej tlen kipiaj iTlaixpantijkauan Jehová tlen  mochiuaj san kanin, uan tikitas ken tlatlamantli motlakentiaj uan melauak yolpakij.

MA TIKPIAKAN SAN TLEN MONEKI ITECH TONEMILIS

16. ¿Tleka “espíritu de nin tlaltíkpaktli” kixnamiki tlen otlamachti Jesús, uan tlen moneki timotlajtlaniskej?

16 “Espíritu de nin tlaltíkpaktli” sapanoa tlakajkayaua uan kintopeua tlaltikpaktlakamej ma mokuayejyekokan yolpakiskej tla kipiaskej miak tlamantli uan tomin. Ik non, Jesús okijto: “Amo xikmokawilikah manomechyoltilana n tomi, porke n tlakatl amo kipia nemílistli san por kipia miak tomi” (Lucas 12:15). Jesús amo okijto sepa amo itlaj ma tikpiakan, okachi kuali, okijto melauak tiyolpakiskej tla ‘tikakih itlajtol Dios iwa tiktlakitah’ uan tla itech tonemilis tikpiaj san tlen moneki, okachi timotekipachoskej ken uelis tiktekichiuiliskej toTajtsin Dios ika nochi toyolo uan ken kuali timouikaskej iuan  (Lucas 11:28; Mateo 6:22, TNM). Ximotlajtlani: “¿Nikneltoka tlen otlamachti Jesús, noso nikmokauilijtok ma nechijtlako ‘teta de nochteh non tlakajkayawah’?” (Juan 8:44). “¿Tlen kiteititia notlajtol, tlen nikneki nikchiuas, tlen okachi nikpatioita uan ken nikpia nonemilis?” (Lucas 6:45; 21:34-36; 2 Juan 6.)

17. Xikijto ken techpaleuia tikpiaskej san tlen moneki itech tonemilis.

17 Jesús okijto: “Ixtlamatilis Dios moixmati ika tlan kichiwah” (Mateo 11:19). Ma tikitakan ken techpaleuis tikpiaskej san tlen moneki itech tonemilis. Se neskayotl, pampa titekitij itech iTekiuajkayo toTajtsin Dios okachi tikpiaj yolseuilistli (Mateo 11:29, 30). Amo okachi timotekipachoaj, ik non, amo timoyolkokojtokej nion san timokuayejyekojtokej (xiktlajtolti 1 Timoteo 6:9, 10). Tiyolpakij pampa tikpiaj tlen okachi moneki, ik non, okachi timajxiliaj tiyetoskej iuan tokalchanejkauan uan tokniuan. Uan okachi kuali tikochij (Eclesiastés 5:12). Tiyolpakij pampa timochijchikauaj tikinpaleuiskej oksekimej (Hechos 20:35). Uan noijki tikpiaj “miak pakílistli iwa yolsewílistli” (Romanos 15:13; Mateo 6:31, 32). ¡Ninmej tlateochiualismej melauak miak inpati!

MA ‘TIKMOTLALILIKAN TEPOSTLI AJSITOK’

18. ¿Tlen kijtoa Biblia itech akinmej techkokoliaj, tlen kitekitiltiaj uan ken inmiuan timoteuiaj?

18 Tla tikatej itech itlasojtlalis toTajtsin Dios, ye techmaluis pampa Satanás amo techtsakuilis ma tiktekichiuilikan, pampa ye amo san kineki amo ma tiyolpakikan, noijki kineki amo ma tikpiakan yolilistli tlen amo keman tlamis (1 Pedro 5:8). Pablo okijto: “Porke amo timotekilmakatokeh iwan tlakah non kipiah inmesso kemi tejwah, yej iwan espíritus amokualteh non nemih tlakpak, iwa kipiah weletílistli. Yejwah kinnawatijtokeh akimeh kichijtinemih tlan amokuali ken nemih itech tleyuálistli” (Efesios 6:12). Tlajtoli “timotekilmakatokeh” kijtosneki timokitskis iuan ikaj uan timoteuis, amo kijtosneki san uejka tiyetos noso ken timotlatijtoskia itlampa tlali. Noijki ijkuak non tlaxelol tlajtoa itech akinmej “kipiah weletílistli” uan  akinmej “kinnawatijtokeh akimeh kichijtinemih tlan amokuali”, kijtosneki nochtin ninmej san sekan tekitij uan yikimatij ken kichiuaskej.

19. Xikyekijto tlen kijtosneki tepostli ajsitok tlen uits itech toTajtsin Dios.

19 Maski amo ueli tikchiuaj miak tlamantli uan ualeua amo tiyolchikauakej, uelis titlatlaniskej. ¿Ken uelis tikchiuaskej? Tla tiktekitiltiaj “tepostli ajsitok tlen uits itech toTajtsin Dios” (Efesios 6:13, TNM). Efesios 6:14-18 techiluia itech nin tepostli ajsitok, kijtoa: “Ijkó kiné, ximoyekketokah, ximotlajkotelinikah ika n milák tlájtoli, iwa xitlakentitokah [ika melajkayotl, TNM] kemi ijkuak se soldado konakia ikoto de tépostli para makipalewi. Sa ximokaktikah para nontetlapowitiweh de n kualitlájtoli non techmaka yolsewílistli, ijkó kemi mokaktia se soldado ijkuak yawi motekilmakati. Noiwa xikpiakah nomotlaneltokalis kemi se tépostli non ika nonmopalewiskeh iwa nonkitsakuiliskeh ijkuak n diablo nomechmojmotlas ika kuawitl non xotlatok. Ximokuaonakiltikah n tépostli non ika timomakixtiah, noiwa xikpiakah itlajtol Dios kemi se espada non techmaka n Espíritu Santo. Nochipa ximotiotsajtsilikah, iwa n Espíritu Santo manomechyakana ijkuak nonmotlatlaujtiskeh iwa nonkitlajtlaniliskeh Dios manomechpalewi. Ixmostla ximosepantiotsajtsilijtokah iwa amo ximosotlawakah, yej nochipa xiktlajtlanilikah Dios makimpalewi nomokniwah non iaxkawah Dios”.

20. ¿Tleka tejuan amo tikatej ken soldados tlen tikinmixmatij?

20 Nin “tepostli ajsitok tlen uits itech toTajtsin Dios” nochipa techpaleuis tla nochipa tiktekitiltiaj. Tejuan amo tikatej ken soldados tlen tikinmixmatij, tlen yauij moteuitiuij uan moseuiaj miakej tonalmej ijkuak tlami se guerra, tejuan nochipa timoteuijtokej pampa amo timikiskej, uan non tlamis ijkuak toTajtsin Dios kixpolos nochi tlen kiyekana Satanás uan kintsakuas amo kuali iejekauan (Apocalipsis 12:17; 20:1-3). Ik non, amo ximosotlaua tla axkan sapanoa timochijchikajtok pampa amo tikchiuas tlen amo kuali. Tinochtin timochijchikauaj ‘tiknajnawatiskeh tokuerpo’ pampa amo techtlanilis uan ijkon amo tikkauaskej Jehová  (1 Corintios 9:27). Ma timotekipachokan tla amo timoteuijtokej.

21. ¿Ken uelis titlatlaniskej itech guerra espiritual kanin timoteuijtokej?

21 San tejuan toselti amo uelis titlatlaniskej. Ik non, Pablo techiluia: “Nochipa ximotiotsajtsilikah, iwa n Espíritu Santo manomechyakana”. Noijki moneki ma tikkakikan Jehová ijkuak timomachtiaj Biblia uan ma timonechikokan iuan tokniuan tlen noijki mochijchikajtokej ken tejuan, pampa amo toselti tikatej (Filemón 2; Hebreos 10:24, 25). Tla tikchiuaj nochi nin, amo san titlatlaniskej, noijki uelis tikpaleuiskej tlen tikneltokaj ijkuak amo kuali tlajtoskej itech.

MA TIKMATOKAN KEN UELIS TIKPALEUISKEJ TOTLANELTOKILIS

22, 23. 1) ¿Tleka nochipa moneki tikmatoskej ken tikpaleuiskej totlaneltokilis, uan tlen moneki timotlajtlaniskej? 2) ¿Tlen timomachtiskej itech okse tlamachtil?

22 Jesús okijto: “Yejwah nomechtlawelitah porke ayakmó nonkichiwah tlan yejwah kichiwah” (Juan 15:19). Ik non, akinmej tikchiuaj ken Cristo moneki tikmatoskej ken tikpaleuiskej totlaneltokilis ika tlakaitalistli uan ika kuali tlajtolmej (xiktlajtolti 1 Pedro 3:15). Ik non, moneki ma timotlajtlanikan: “¿Nikajsikamati tleka iTlaixpantijkauan Jehová amo kichiuaj ken tlaltikpaktlakamej?”. “Ijkuak nikpia ouijkayotl, ¿nikneltoka Biblia uan tlakeuali yolmelajki kijtoaj tlen melauak?” (Mateo 24:45, TNM; Juan 17:17.) “Uan ijkuak moneki nikchiuas tlen kuali iixpan Jehová, ¿nikteititia amo nikneki nikchiuas ken tlaltikpaktlakamej uan niyolpaki pampa ijkon nikchijtok?” (Salmo 34:2; Mateo 10:32, 33.)

23 Ijkuak okachi timochijchikauaj pampa amo tikchiuaskej ken tlaltikpaktlakamej, Satanás okachi techyejyekoa, uan ualeua amo tikitaj ken kichiua. Se neskayotl, ye kineki techyoltilanas ika tlamauisolmej tlen sokiojkej. ¿Ken uelis tikpejpenaskej tlen ika timoyolpaktiskej tlen techyolchikauas uan kichiuas kuali ma tikpiakan totlalnamikilis? Itech okse tlamachtil tikitaskej ken uelis tikchiuaskej.

^ párr. 3 Itech Pentecostés itech xiuitl 33 ik tlayekapan, Cristo opejki tlanauatia itech intlanechikol tlapejpenalmej nikan Tlaltikpak (Colosenses 1:13). Uan itech xiuitl 1914, Jesús okiseli tlanauatilistli ken ueyi Tekiua itech “nochteh n altepetlakameh”. Ik non, axkan tlapejpenalmej kintitlanij pampa ma tlajtokan itech Tekiuajkayotl Mesiánico (Apocalipsis 11:15).

^ párr. 8 Xikita amochtli Razonamiento a partir de las Escrituras, itech páginas 140 a 144, tlen kichijchiuaj iTlaixpantijkauan Jehová.