Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 16

Ualajsi Mesías

Ualajsi Mesías

Jehová kinextia ke Jesús akin ochantiaya Nazaret ye Mesías tlen omoijtojka ualaskia

¿KEN ueliskia tlaltikpaktlakamej kixmatiskiaj Mesías? ToTajtsin Dios ineuia kitematiltiskia akin ye. Ipan 400 xiuitl satepan otlanki omoijkuilo Escrituras Hebreas, se ángel tlen itoka Gabriel okimonextili María, se ichpochtli tlen ochantiaya ik norte itech Galilea, itech Nazaret. Gabriel okilui María ke kipiaskia se ikone. Maski ye ichpochtli okatka, ika espíritu santo, toTajtsin Dios kichiuaskia ma kipia se konetl. Nin konetl yetoskia ueyi Tekiua tlen omoijtojka, tlen nochipa tlanauatiskia. ToTajtsin Dios kipanoltiskia ijtik María iyolilis iKone tlen iuan onemia iluikak.

María ika yolyamanilis uan pakilis okiseli nin kuali tekitl. Tlakatl tlen iuan monamiktiskia, se kuajxinki tlen itoka katka José, satepan ke toTajtsin Dios okititlanili se ángel pampa ma kilui tlen opanotoka, omonamikti iuan María. Axkan kuali, ma tikilnamikikan omoijtojka ke Mesías tlakatiskia itech Belén, uan amo itech Nazaret (Miqueas 5:2). ¿Ken mochiuaskia nin, tla non altepetl okatka ipan 150 kilómetros itech ompa?

Opanokej sekimej tonalmej, se tekiua romano otlanauati ma mochiua se censo, uan nochtin monekia moijkuiloskej kanin otlakatkej. Ken tikitaj, ichanejkauan José uan María otlakatkej Belén, ik non, oyajkej ompa ijkuak yoajsia tonal pampa kitlakatiliskia ikone (Lucas 2:3). Jesús otlakatki kanin katej yolkamej, uan okitekake kanin tlakuaj yolkamej. Ijkuakon, amo uejka ik ompa, miakej ángeles omonextijkej innauak sekimej tlajpixkej uan okinmiluijkej ke yotlakatik Mesías noso Cristo tlen omoijtojka.

Noijki oksekimej tlaltikpaktlakamej kitematiltiskiaj ke Jesús okatka Mesías tlen omoijtojka. Teotlajtojke Isaías okijtojka ke akaj kipeualtiskia tekitl tlen miak ipati tlen kichiuaskia Cristo (Isaías 40:3). Nin tlakatl itoka katka Juan akin Teapolaktiaya. Se tonal, ijkuak okitak Jesús, okijto: “Xikitakan iichkatsin in toTajtsin Dios, katlej kintlapojpoluis in tlaltikpaktlakaj de intlajtlakol”. San niman, miakej imachtijkauan Juan omochijkej imachtijkauan Jesús. Se itech yejuan okijto: “Yotikajsikej in Mesías” (Juan 1:29, 36, 41).

Satepan akaj okachi kitematilti itech ye. Ijkuak Jesús omoapolakti inauak Juan, Jehová okitokayoti Mesías ika iespíritu santo uan okijto: “Yen yin notlasojKone, katlej inauak nipaki” (Mateo 3:16, 17). ¡Ijkuakon ualajsiko Mesías tlen omoijtojka!

¿Keman opanok non? Itech xiuitl 29, keman omoajxitijkej 483 xiuitl tlen okijtojka Daniel. Melauak, nin san sekimej tlamantli tlen kinextia ke Jesús ye Mesías. Axkan kuali, ¿itech tlen tlajtoskia ijkuak yetoskia itech Tlaltikpak?

(Okisak itech Mateo tlakotonaltin 1 a 3, Marcos tlakotonal 1, Lucas tlakotonal 2 uan itech Juan tlakotonal 1.)