Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 4

ToTajtsin Dios kichiua se tlajtolsenkaualis inauak Abrahán

ToTajtsin Dios kichiua se tlajtolsenkaualis inauak Abrahán

Abrahán kitlakamati toTajtsin Dios. Ken ye okineltokaya, Jehová kiluia kiteochiuas ika miak ixuiuan

YOPANOKEJ kanaj 350 xiuitl satepan opanok Apachiuilis. Itech Ur, se altepetl tlen omoskaltijtoya kuali tlen mokaua kanin axan Irak, ompa chantia Abrahán. Ye se tlakatl tlen otlaneltokayaj inauak toTajtsin Dios, maski ijkon, itlaneltokilis moyejyekoskia san niman. Ma tikitakan tlen opanok.

Jehová kiluia ma kikaua ialtepetl kanin otlakatki uan ma uia itech okse altepetl: Canaán. Amo omokuayejyeko kox kichiuaskia, Abrahán otetlakamatki. Iuan isiua Sara, isobrino Lot, nochtin ikalchanejkauan uan nochi tlen okipiaya okiskej uejka. Ijkuak oajsito Canaán, ochantinemia ika mantajkali. Jehová okichi se tlajtolsenkaualis inauak Abrahán: okilui nochtin tlaltikpaktlakamej kinteochiuaskia ika ye, iixuiuan mochiuaskiaj se ueyi altepetl uan tlali Canaán yetoskiaj inmiaxka.

Abrahán uan Lot okipixkej miakej iichkauan uan reses. Abrahán okatka se tlakatl yolkuali uan okikauili ipilo ma kipejpena tlali tlen okachi okipakti pampa iyolkauan. Lot okipejpenki tlali kanin mokaua aueyatl Jordán, kan okachi otlamochiuaya, uan omochanti inakastla Sodoma. Tlen ompa ochantiaj okichiuayaj miak tlajtlakol ixpan Jehová.

Satepan omoxelojkej Abrahán uan Lot, Jehová okilui kipiaskiaj miak iixuiuan ken sitlaltin tlen katej iluikak. Abrahán okipiaya tlaneltokilis inauak Jehová, maski ijkon, isiuatsin Sara amo uelia kipias ikoneuan. Ijkuakon, keman ye okipiayaj 99 xiuitl uan Sara yokajxitiaya 90, toTajtsin Dios okimatilti kipiaskiaj se ikone. Uan ijkon opanok: Sara okipixki se ikone tlen okitokayotijkej Isaac. Uan maski Abrahán okipixki oksekimej ikoneuan, Temakixtiani tlen omoijto itech Edén kisaskia itech ikalchanejke Isaac.

Lot ochantia iuan ikalchanejke itech Sodoma. Uan ye amo auilnemia ken okichiuayaj tlen ompa ochantiayaj, ye okatka se tlakatl yolmelajki. Ik non, ijkuak Jehová okijto kipojpolos Sodoma, achto okintitlanik sekimej ángeles pampa ma kinauatikan Lot. Yejuan okiluijkej Lot ma kisajteua iuan ikalchanejke uan amo monekia tlachiaskej tlakuitlapa. Ijkuakon, toTajtsin Dios okichi ma uetsi itech iluikak tlitl uan azufre uan okinmixpojpoloj tlen amo yolkualmej tlen ochantiayaj Sodoma uan noijki tlen ochantiayaj itech altepetl Gomorra. Lot uan iome ichpokauan omakiskej itech mikilistli. Uan isiua otlachixki tlakuitlapa, uelis pampa okiyolkoko tlamantli tlen okikajtoka. Ken amo otetlakamatki omiki.

(Okisak itech Génesis 11:10–19:38.)