Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 14

ToTajtsin Dios tlajtoa ika iteotlajtojkej

ToTajtsin Dios tlajtoa ika iteotlajtojkej

Jehová kintlalia teotlajtojkej pampa ma tlanejmachtikan itech ueyichiualis tlen melauak uan itech Mesías

IPAN intonaluan ueyi tekiuajkej itech Israel uan Judá okatkaj sekimej tlakamej tlen okintokayotijkej: teotlajtojkej. Nochtin yejuan monekia yetoskej yolchikauakej uan kipiaskiaj ueyi intlaneltokilis pampa kitematiltiskiaj itlajtol toTajtsin Dios. Axkan tikitaskej naui tlamantli tlen okijtojkej teotlajtojkej.

1. Okixpolojkej Jerusalén. Iteotlajtojkej toTajtsin Dios —ken Isaías uan Jeremías— miak xiuitl achto okijtojkej ke se altepetl kixpoloskia Jerusalén uan ayakmo akaj chantiskia ompa. Noijki okijtojkej tleka altepetl okikualani toTajtsin Dios. Maski okijtoayaj ke kiueyichiuaj Jehová, tlen okichiuayaj itech intlaneltokilis amo kuali okatka, sapanoa kichiuayaj tlen amo kuali (2 Reyes 21:10-15; Isaías 3:1-8, 16-26; Jeremías 2:1–3:13).

2. Moyektlalia ueyichiualis tlen melauak. Ialtepetl toTajtsin Dios opanokej 70 xiuitl itech Babilonia, satepan mokuepaskia ikalijtik uan kiyektlaliskia teokali itech Jerusalén uan kiyektlaliskia ueyichiualis tlen melauak (Jeremías 46:27; Amós 9:13-15). Kanaj 200 xiuitl achto panoskia ijkon, Isaías okijto ke se tlakatl tlen itoka katka Ciro kimoaxkatiskia Babilonia uan kimakixtiskia altepetl israel pampa oksepa kiueyichiuaskia Jehová. Noijki okitematilti ken kichiuaskia (Isaías 44:24–45:3).

3. Ijkuak ouala Mesías uan tlen okipanok. Mesías tlakatiskia itech se altepetl tlen itoka Belén (Miqueas 5:2). Yetoskia se tlakatl yolyamanki, uan kalakiskia itech Jerusalén ipan se burrojkonetl (Zacarías 9:9). Maski kinextiskia tlasojtlalis innauak tlaltikpaktlakamej, miakej kikokoliskiaj (Isaías 42:1-3; 53:1, 3). Tlajyouiskia uan temomojti mikiskia. ¿Kijtosneki ompa tlamiskia Mesías? Amo, pampa moyolitiskia uan moixpantiskia ken tlamanal uan ijkon ma kintlapojpoluikan nochtin tlaltikpaktlakamej (Isaías 53:4, 5, 9-12).

4. Mesías tlanauatia ipan Tlaltikpak. Tlaltikpaktlakamej tlajtlakolejkej uan amo ueli tlanauatiaj kuali, san ye ueyi Tekiua Mesiánico ueli kuali tlanauatis. Uan tlen okachi, kinotsaskiaj Tekiua tlen kitemaka Yolseuilis (Isaías 9:6, 7; Jeremías 10:23). Ijkuak tlanauatis ipan Tlaltikpak, onkas yolseuilis itech nochi Tlaltikpak, uan tlakamej uelis san sekan nemiskej iuan yolkamej (Isaías 11:3-7). Ayakmo onkas kokolismej (Isaías 33:24). Amo ok yetos mikilistli (Isaías 25:8). Uan noijki, sapanoa miakej tlaltikpaktlakamej oksepa moyolitiskej uan nemiskej ipan Tlaltikpak (Daniel 12:13).

(Okisak itech amochtin Isaías, Jeremías, Daniel, Amós, Miqueas uan Zacarías.)