Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 7

ToTajtsin Dios kinmakixtia israelitas

ToTajtsin Dios kinmakixtia israelitas

Jehová kititlani chauistli ipan Egipto, uan Moisés kinkixtia israelitas. Ika Moisés, toTajtsin Dios kinmaka Tlanauatilmej

IPAN miak xiuitl israelitas kuali nemiaj Egipto, uan omomiaktilijkej. Ijkuakon, okse faraón tlen amo yolkuali uan tlen tetlajyouiltiaya opejki tlanauatia, tlen amo kixmatia José. Ken okitak ke israelitas omomiaktilijkej, otlanauati ma kinchiuakan tlakeualtin uan ma kinmeltsimakan itech aueyatl Nilo nochtin chokotsitsintin tlen tlakatiaj. Satepan, se siuatl israelita yolchikauak okikalaki ikone ijtik se chikiuitl uan okitlati itech xiuitl itempa aueyatl. Iichpoch faraón okajsik, uan okitokayoti Moisés uan okiskalti ichan faraón.

Ijkuak okipiaya 40 xiuitl, Moisés okipaleui se israelita tlen okimakatoka se egipcio, ik non, ocholoj itech se altepetl tlen okatka uejka. Ijkuak okipiaya 80 xiuitl, toTajtsin Dios okinauati ma mokuepa Egipto uan ma kitlajtlanili faraón ma kinkajkaua israelitas.

Faraón amo okinek kinkauas, toTajtsin Dios okitlajyouilti altepetl ika majtlaktli chauistli. Uan achto panoskia se chauistli, Moisés motlapouiaya iuan faraón uan okiluiaya tlen uelis kichiuas pampa amo kipanos. Maski ijkon, nochipa omoueyimatia uan okixnamikia Moisés uan Jehová. Itech majtlaktli chauistli, toTajtsin Dios okititlanki se ángel pampa kinmiktiskiaj inkoneuan tlen tlayekanaj itech Egipto. Nin ángel amo otemikti itech inchan akinmej okitlakamatkej Jehová uan okitlapaluijkej inkaltlatsakuil ika iestli ichkatl tlen okimankej. Pampa ma kilnamikikan tlen opanok non tonal, israelitas opejki kichiuaj se iluitl sejse xiuitl tlen itoka Pascua.

Satepan okipolo ikone tlen tlayekana, faraón okinmilui Moisés uan israelitas ma kisakan itech Egipto. San niman, nochtin israelitas opejki moyejyektlaliaj pampa kisaskej. Maski ijkon, faraón omoyolkuepki uan okintemoto ika isoldados uan icarros de guerra. Ijkuak israelitas oajsitoj itempa ueyi atl Rojo, nesia amo kipiayaj kanin choloskej. Maski ijkon, Jehová okitlajkoxeloj ueyi atl, uan israel opanok ipan ojtli uaki. Ijkuak egipcios inpan oyajkej, toTajtsin Dios okiualkajka atl uan ompa omeltsinkej faraón uan isoldados.

Satepan, israelitas omokauatoj inakastla tepetl Sinaí, uan ompa Jehová okichi innauak se tlajtolsenkaualis. Ika Moisés, okinmakak tlanauatilmej tlen kinyekanaskiaj uan kinpaleuiskiaj itech nochi innemilis. Tla yejuan yetoskiaj yolmelajkej uan tetlakamatkej, toTajtsin Dios oyeskia innauak uan ika yejuan kinteochiuaskia oksekimej altepemej.

Maski ijkon, miakej amo omotenmachiayaj inauak. Ik non okintlajyouilti, toTajtsin Dios okichi ma nentinemikan kanin tlauaki ipan 40 xiuitl. Ijkuakon, Moisés okitlali okse akin tlayekanaskia, se israelita yolmelajki tlen itoka Josué. Satepan, oajsik tonal ijkuak Israel kalakiskia itech tlali tlen toTajtsin Dios okijtojka kimakaskia Abrahán.

(Okisak itech Éxodo, Levítico, Números, Deuteronomio, Salmo 136:10-15 uan Hechos 7:17-36.)