Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 12

Kuali tlanojnotsalmej tlen techpaleuis itech tonemilis

Kuali tlanojnotsalmej tlen techpaleuis itech tonemilis

Amochtli Proverbios —tlen okijkuilo okachi Salomón— techmaka kuali tlayekanalis tlen uits itech toTajtsin Dios

¿KUALI tinemiskej tla tikseliaj itlayekanalis Jehová? Pampa tikmatiskej, moneki ma timomachtikan tlanojnotsalmej tlen techmaka itech iTlajtol. ¿Melauak kinextia ixtlamatilis itlanojnotsaluan? ¿Techpaleuia ma tikpiakan se kuali tonemilis? Itech amochtli Proverbios, ueyi tekiua Salomón okijkuilo miakej tlanojnotsalmej tlen kijtoa miak itech tonemilis. Ma tikitakan sekimej.

Toyekuikalis inauak toTajtsin Dios. Pampa kuali timouikaskej inauak Jehová, moneki ma timotenmachiakan itech ye. Salomón okijto: “Ximotenmachia itech Jehová ika nochi moyolo, uan amo xikchiua tlen timokuayejyekoa. Itech nochi tlen tikchiua xikchiua ken toTajtsin Dios kineki, uan ye kichiuas xikpia se kuali monemilis” (Proverbios 3:5, 6). ¿Ken tikteititiaj ke melauak timotenmachiaj itech toTajtsin Dios? Ma tikmokauilikan ma techyekana ye uan ma tiktlakamatikan. Tla ijkon tikchiuaj tiktekitiltiskej kuali tonemilis: tikyolpaktiskej toTajtsin Dios uan tikteititiskej ke ikualankaita Diablo se ueyi tekajkaya (Proverbios 27:11).

Ma kuali timoyekuikakan innauak oksekimej. Ipan nin tonalmej, kalchanejkej okachi moneki ma kiselikan itlayekanalis toTajtsin Dios. ToTajtsin Dios kiluia tlakatl: “Ximoyolpakti iuan siuatl tlen iuan otimonamikti ijkuak titelpochtli otikatka”, ijkon kilnamiktiaj tlakatl ke moneki yetos yolmelajki inauak isiua (Proverbios 5:18-20). Uan siuatl, itech tlakotonal 31 itech Proverbios kinextilia ken kichiuas pampa ma kitlakaitakan inamik uan ikoneuan. Uan, noijki, konemej kinyoleua ma kintlakaitakan intatajuan (Proverbios 6:20). Nin amochtli noijki technextilia ke moneki ma tikpiakan kuali toyolikniuan, uan technejmachtia ke tla tejuan amo timouikaj innauak oksekimej, tikteititiaj san tiktemoaj tlen tejuan tiknekij (Proverbios 18:1). Axkan kuali, ken toyolikniuan uelis techpaleuiskej noso techijtlakoskej, moneki kuali ma tikinpejpenakan (Proverbios 13:20; 17:17).

Itech tonemilis. Proverbios kipia miakej kuali tlanojnotsalmej tlen kichiua ma kuali timomachilikan uan amo ma timokuayejyekokan tlen amo techpaleuiaj, noijki kijtoa amo kuali ma se uinti uan kijtoa ma se tekiti ken moneki (Proverbios 6:6; 14:30; 20:1). Noijki, technejmachtia ke tla tikchiuaj ken tejuan timokuayejyekoaj uan amo ken toTajtsin Dios, amo kuali tinemiskej (Proverbios 14:12). Noijki techiluia ma tikmaluikan toyolo itech tlamantli tlen amo kuali, pampa “itech kisa tonemilis” (Proverbios 4:23).

Ninmej kuali tlanojnotsalmej yokinpaleuij miakej tlaltikpaktlakamej ma kuali nemikan, uan yejuan kuali kimatokej ke amo onka itlaj tlen okachi kuali ke ma kiselikan itlayekanalis Jehová.

(Okisak itech amochtli Proverbios.)