Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 15

Se teotlajtojke tlen katka Babilonia kita tlen panoskia satepan

Se teotlajtojke tlen katka Babilonia kita tlen panoskia satepan

Daniel tlajkuiloa itech iTekiuajkayo toTajtsin Dios uan ijkuak ualaskia Mesías. Babilonia kimoaxkatiaj

DANIEL okatka se israelita yolmelajki tlen okiuikake Babilonia ijkuak okatka san se telpochtli, ijkuak amo miak poliuiya pampa kixpoloskiaj Jerusalén. Daniel uan oksekimej judíos, maski okatkaj ipan inmak babilonios, kinkauiliayaj ma kichiuakan sekimej tlamantli. Nochtin xiuitl ijkuak Daniel okatka ompa, toTajtsin Dios nochipa okiteochiuak. Uan tlen okachi, okimakixti itech se koyoktli kan okatkaj tekuanimej uan okichi ma kita tlen panoskia satepan. Itech tlen okijto Daniel, tlen okachi kipia ipati oyek itech Mesías uan iTekiuajkayo.

Keman ualaskia Mesías. ¿Keman kichiaskia ialtepetl toTajtsin Dios pampa ualaskia “Mesías in Tlayekanke”? Daniel okiyekiluijkej ke ualaskia 69 semanas ika xiuitl satepan kisaskia tlanauatil ma moyektlali itepamitl Jerusalén. Ken se semana kipia chikome tonal, se semana ika xiuitl kipia chikome xiuitl. Omotemakak tlanauatil pampa moyektlaliskia tepamitl itech xiuitl 455 (a.i.x. 1), satepan itech itonaluan Daniel. Tla itech non xiuitl tikpoaj 69 “semanas” —kijtosneki, 483 xiuitl—, tiajsij itech xiuitl 29. ¿Tlen opanok ijkuakon? Okachi tlayekapan tikitaskej. Daniel noijki okimatiltijkej ke Mesías “kitekiskiaj”, noso mikiskia, uan ijkon kitlaxtlauas intlajtlakoluan tlaltikpaktlakamej (Daniel 9:24-26).

Mesías mochiuaskia ueyi Tekiua itech iluikak. Itech se ueyi kochtemikilis, Daniel okitak akaj “akin omochi ken tlakatl” —ye okatka Mesías— uan oajsia kanin tlanauatia Jehová. Ijkuakon, Jehová okimakak “tlanauatijkayotl, tlakaitalis uan tekiuajkayotl”, se tekiuajkayotl tlen amo keman tlamis. Satepan Daniel okimatki okse tlamantli itech Tekiuajkayotl mesiánico: iueyi Tekiua tlanauatiskia iuan sekimej itlapaleuijkej tlen kintokayotiaj “yolchipauakej tlen iaxkauan toTajtsin Dios” (Daniel 7:13, 14, 27).

Tekiuajkayotl kintlajtlamis nochtin tekiuajkayomej tlen katej itech Tlaltikpak. ToTajtsin Dios okichi ke Daniel ma kimati tlen kijtosneki ikochtemikilis Nabucodonosor tlen okitekipachojtoka, ye ueyi tekiua itech Babilonia. Ye okitak itlaj tlen ochijchijtoya ken se tlakatl, ika oro ochijchijtoya itsontekon, ika plata ielpan uan imauan, ika cobre itlalax uan imetsuan, ika hierro ikotsuan uan ika hierro nelitok ika sokitl ochijchijtoya ikxiuan. Ijkuakon, se tetl tlen okisak itech se tepetl okixajxamani ikxiuan tlen katkaj yamanki. Daniel okiyekilui ueyi tekiua ke itsontekon kijtosneki Babilonia, uan tlen oksekimej, kijtosneki uejueyi tlaltikpak tekiuajkayomej tlen tlanauatiskiaj satepan. Itekiuajkayo toTajtsin Dios peuaskia tlanauatis ijkuak tlanauatijtoskiaj saiktlami tekiuajkayomej —in ikxiuan tlen ochijchijtoya ika hierro uan sokitl— itekiuajkayo toTajtsin Dios kinmixpoloskia nochtin tekiuajkayomej tlen katej itech Tlaltikpak. Satepan nochipa tlanauatiskia ipan nochi Tlaltikpak (Daniel, tlakotonal 2).

Daniel oyoltoka miak xiuitl uan okitak ken ouetsik Babilonia. Uan ijkon ken omoijtojka, ueyi tekiua Ciro okimoaxkati altepetl Babilonia. Satepan ijkuak omoajxiti 70 xiuitl, ijkuak amo akaj chantia itech Jerusalén, judíos okiskej itech Babilonia. Ika intlayekanalis sekimej tekiuajkej, teopixkamej uan teotlajtojkej yolmelajkej, judíos okiyektlalijkej Jerusalén uan okiyektlalijkej iteokali Jehová. Uan ¿tlen opanok ijkuak otlankej 483 xiuitl tlen omoijtojka?

(Okisak itech amochtli Daniel.)