Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 2

Okinkixtijkej itech Xochitlal

Okinkixtijkej itech Xochitlal

Se ángel tlen amo okinek tetlakamatis okinkajkaya Adán uan Eva pampa amo ma kitlakamatikan toTajtsin Dios. Ijkon opejki tlajtlakol uan mikilistli

ACHTO yetoskiaj tlaltikpaktlakamej, toTajtsin Dios okinchijchi ángeles, tlen amo ueli moitaj. Se itech yejuan —tlen satepan okitokayotijkej Satanás noso Diablo— amo okinek tetlakamatis uan okikajkaya Eva pampa ma kikua itlakilol kuauitl tlen toTajtsin Dios okijto amo ma kikuakan.

Satanás okichi ke se koatl ma motlapoui iuan Eva, uan okilui ke ye uan inamik okimopolijtokaj itlaj kuali tlen toTajtsin Dios amo okinmakaya. Noijki okilui tla kikuaskiaj tlakilotl tlen toTajtsin Dios okinmiluij amo ma kikuakan yejuan amo mikiskiaj; ijkon kijtosnekia ke toTajtsin Dios okinkajkayaj. Diablo kualtsin okintlapouij, uan okijto tla amo kitlakamatiskiaj toTajtsin Dios kipiskiaj se tlamatilis okachi kuali uan ijkon uelis kichiuaskiaj tlen yejuan kinekiskiaj. Nochi nin se ueyi tlakajkayaualis: in achto tlakajkayaualis itech nochi tonalmej. Ipan melajka, non tekajkaya kinekia kijtos: ¿Kinamiki toTajtsin Dios ma kinauati nochi Tlaltikpak? ¿Kuali itlanauatiluan? ¿Techpaleuiskej tla tikintlakamatij?

Eva okineltokak itlakajkayaualis Satanás. Opejki kileuia non tlakilotl, uan okiyeko. Satepan okimakak inamik, uan noijki okiyeko. Maski non amo omotayaj ken se tlajtlakol, amo otetlakamatkej, otlajtlakojkej. Yejuan kuali kimatiaj tlen okichijtokaj: okixtopejkej itlanauatiluan toTajtsin Dios akin oKinchijchi uan akin okinmakak nochi tlen okipiayaj, inyolilis tlen amo okipiaya tlajtlakol.

“Ye kixajxamanis motsontekon uan te tikojkokos ikxi.” (Génesis 3:15)

ToTajtsin Dios okinmilui tlen kinpanoskia. Achto okijto, kiualtitlaniskia —se Temakixtiani— tlen kixpoloskia koatl, noso, Satanás. Satepan Ye okijto ke Adán uan Eva mikiskiaj, maski ijkon toTajtsin Dios okiteititi teiknomatilis inauak ipiluan uan ijkon amo san niman okinmikti. ¿Tlen chialistli kipiaskiaj ipiluan? Jehová okijto ke nin Temakixtiani kitlamiskia nochi tlajyouilis tlen onesik ijkuak amo otetlakamatkej itech Edén. ¿Akin yetoskia nin Temakixtiani uan ken kichiuaskia ma mochiua itlanekilis toTajtsin Dios? Nin tlanankilis omotemakak ijkuak opanok kauitl, ijkuak omoijkuiloaya Biblia.

Satepan, toTajtsin Dios okinkixti itech Xochitlal Adán uan Eva. Ijkuak ayakmo yetoskiaj ompa, monekia chikauak kitekipanoskej tlali uan kimotlaniliskiaj intlakual. Ijkuakon Eva okitlakatili achto ikone, Caín. Satepan, Adán uan Eva okipixkej oksekimej itelpokauan uan iichpokauan, ken Abel, uan noijki Set, ikojkol Noé.

(Okisak itech Génesis tlakotonaltin 3 a 5 uan itech Apocalipsis 12:9.)