Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 3

Omakiskej itech se apachiuilis

Omakiskej itech se apachiuilis

ToTajtsin Dios okinpojpolo nochtin tlen amo yolkualmej, uan okinmakixti Noé uan ikalchanejkauan

IJKUAK omomiaktiliaya tlaltikpaktlakamej, tlajtlakol uan tlen amo kuali omoxitini ipan nochi Tlaltikpak. Enoc, uelis san ye okitekichiuiliaya toTajtsin Dios ipan Tlaltikpak, okinmilui ke Jehová kinmixpoloskia nochtin tlen amo yolkualmej. Maski ijkon, amo okineltokakej, uan okachi kichiuayaj tlen amo kuali. Uan tlen okachi, sekimej ángeles amo okinekej kitlakamatiskej Jehová, okikajkej inteki tlen okipiayaj itech iluikak, omokuepkej ken tlakamej uan omonamiktijkej ika nochi siuamej tlen yejuan okinekej. Ijkuak omotekakej iuan siuamej okinpixkej inkoneuan uejkapantikej uan tlen okipiayaj miak chikaualis tlen okintokayotijkej nefilim, yejuan okichijkej okachi ma moxitini tlen amo kuali ipan nochi Tlaltikpak. ¿Uelis timokuayejyekos ken omoyolkoko toTajtsin Dios ijkuak okitak nochi tlen okichi omoijtlakojtoka?

Satepan imikilis Enoc okse tlakatl yolkuali okatka: Noé. Ye iuan ikalchanejkauan omochijchikajkej miak uan ijkon okiyolpaktijkej toTajtsin Dios. Jehová okitlali se tonal ijkuak kiualikaskia se Apachiuilis tlen ika kinmixpoloskia nochtin tlen amo yolkualmej. Maski ijkon, amo okinekia ma mikikan yolkamej nion yolmelajki Noé. Ik non, okilui ma kichijchiua se akali, ken se kali ueyak uan uejkapantik. Monekia ompa kalakiskiaj ye uan ikalchanejkauan uan ijkon momakixtiskiaj, uan noijki ompa kinkalakiskiaj miakej yolkamej tlatlamantli. Noé okitlakamatki toTajtsin Dios uan opanok kanaj 40 noso 50 xiuitl okichijchi akali. Itech non kauitl, noijki “okitematilti kenik se uelis yetos chipauak inauak Dios” (2 Pedro 2:5). Okinnejmachti tlaltikpaktlakamej ke oualajsitoya Apachiuilis, uan amo akaj okitlakakili. Oajsik tonal ijkuak Noé iuan ikalchanejkauan uan yolkamej okalakej ijtik akali. Ijkuakon, toTajtsin Dios okitsakuak kaltlatsakual uan opejki kiaui.

Chikauak okiauik itech 40 tonalmej uan 40 youali, oatemik nochi Tlaltikpak. Amo omoka nion se tlen amo yolkuali. Opanokej tonalmej uan opejki temoa atl uan akali omokauato ipan se tepetl. Opanok se xiuitl ijkuak Noé uan ikalchanejkauan ueli okiskej. Noé omotlasojkamatki inauak Jehová uan okitlamanili se yolkatl. ToTajtsin Dios okitemakak itlajtol ke amo keman kiualtitlaniskia okse Apachiuilis tlen ika kinpojpoloskiaj nochi tlen yoltok ipan Tlaltikpak. Ika kosamalotl, Jehová okitemakak itlajtol. Nochipa ijkuak kitaskiaj, tlaltikpaktlakamej kilnamikiskiaj tlajtol tlen toTajtsin Dios okijto.

Satepan opanok Apachiuilis, toTajtsin Dios okitemakak yankuik tlanauatilmej. Okinkauili ma kikuakan inakayo yolkamej, uan okinmilui amo ma kikuakan estli. Noijki otlanauati ma moxitinikan ipan nochi Tlaltikpak. Maski ijkon otlanauati, miakej amo otetlakamatkej uan omonechikojkej itech se altepetl uan opejkej kichijchiuaj se ueyi tepamitl ika itlayekanalis Nemrod. ToTajtsin Dios amo okinkauili ma kichiuakan tlen kinekiaj. ¿Ken okichi? Okichij ma tlajtokan tlatlamantli tlajtolmej nochtin tlen ompa ochantiayaj itech non altepetl —tlen okitokayotijkej Babel, uan satepan Babilonia—. Ken amo ueli omoasikamatkej, omosotlajkej uan omoxitinijkej.

(Okisak itech Génesis tlakotonaltin 6 a 11 uan Judas 14, 15.)