Xikita nochi

Tlen kiualika

 TLAMACHTIL 6

Job okipixki iyolo ajsitok

Job okipixki iyolo ajsitok

Satanás kijtoa ke Job amo uelis kipias iyolo ajsitok inauak toTajtsin Dios, maski ijkon, ye okipixki iyolo ajsitok

¿UELIS kipiaskej inyolo ajsitok itekipanojkauan toTajtsin Dios keman kipiaskej ouijkayotl, maski moita ke amo kinpaleuia? Se tlakatl akin itoka Job ijkon okipanok. Ma tikitakan.

Job okatka se ikalchanejke Abrahán tlen onemia kanin axkan Arabia ijkuak israelitas onemiaj Egipto. Se tonal, Jehová okinnechikoj iángeles, uan opejki motlapouiaj itech Job. Noijki ompa okatka Satanás. Imixpan nochtin, Jehová opejki kiueyichiua Job tlen amo okatka okse ken ye tlen yolmelajki, uan kinexti ijkon ke itech motenmachia. Uan Satanás okijto ke Job kitekichiuiliaya toTajtsin Dios pampa kiteochiuaya, uan kimakaya miak tlamantli uan kimaluiaya. Okijto ke tla kipoloskia nochi tlen okipiaya, omoxeloskia inauak Jehová.

ToTajtsin Dios okikauili Diablo ma kikixtili nochi tlen Job okipiaya, satepan ikoneuan uan noijki omokokoj. Ken Job amo kimatia ke Satanás kichiuaya ma tlajyoui, amo kajsikamatia tleka toTajtsin Dios okitekauiliaya ijkon ma kipano. Maski ijkon, amo keman okika Jehová.

Ijkuakon, okitlajpalokoj Job eyi tlen omoijtoayaj iyolikniuan uan opejkej kinojnotsa uan okajuakej. Non tlen yejuan okiluijkej ijkuilitok itech amochtli Job, kinekiaj kichiuaskej ma kineltoka ke toTajtsin Dios kitlajyouiltijtoka pampa okitlatijtoka itlajtlakoluan. ¡Amo ijkon okatka! Noijki okiluijkej ke amo motekipachoa itech itekipanojkauan uan nion motenmachia itech yejuan. Job amo okinneltokili tlajtolmej tlen okiluijkej uan ye okimilui ke kipiaskiaj iyolo ajsitok maski mikiskia.

Maski ijkon, Job otlajtlako ijkuak omotekipacho miak pampa mopaleuis. Elihú, se telpochtli tlen nochi okikaktoka, okinojnotsak pampa okachi motekipachoaya itech ye uan amo itech itoka uan itlayekanalis Jehová. Noijki, okinmajuak akinmej moijtoayaj iyolikniuan Job.

Satepan, ineuia Jehová okiyektlali ikuayejyekolis Job. Okitlapoui itech nochi tlen kuakualtsin okichi, okimachti ke tlakatl amo itlaj ipati ijkuak moneskayotia ika nochi iueyitilis toTajtsin Dios. Job okiteititi yolyamanilis ijkuak okitlakakili Jehová. Uan Jehová, akin “sa tekitl tetlasojtlak iuan teiknomatke”, okipajti uan okikuepili ojpa nochi tlen ye okipiaya uan ika ok majtlaktli ikoneuan (Santiago 5:11). Iyolmelaualis Job kuali okinankili Satanás uan okinexti ke tlaltikpaktlakamej kema uelis yeskej yolmelajkej inauak toTajtsin Dios maski kipiaskej miak ouijkayotl.

(Okisak itech amochtli Job.)