Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 19

Jesús kijtoa tlen panoskia satepan itech nochi Tlaltikpak

Jesús kijtoa tlen panoskia satepan itech nochi Tlaltikpak

Jesús kijtoa ken momatiskia ke yopeuak tlanauatia uan yiualajsitok itlamilis nochi tlamantli tlen onka itech Tlaltikpak

IJKUAK okatka itech tepetl kan onkaya Olivos, kanin kuakualtsin motaya Jerusalén uan iteokali, naui itlatitlaniluan Jesús okiluijkej san ichtaka ma kinyekilui seki tlajtolmej tlen ye okijtojka. Jesús okijtojka ke iteokali Jerusalén kixixiniskiaj, uan okachi achto, noijki okintlapoui “nijkuak tlamis in tlaltikpak [tlamantli tlen onka itech]” (Mateo 13:40, 49). Ik non, okitlajtlanijkej: “¿Keman tlapanos iuan katlej yen señas tikchiaskej nijkuak tiualmuikas? ¿Iuan keman tlamis in tlaltikpak [tlamantli tlen onka itech]?” (Mateo 24:3).

Jesús okinyekilui tlen panoskia achto kixixiniskiaj Jerusalén uan iteokali. Uan tlen okijto noijki satepan mochiuaskia itech nochi Tlaltikpak. Pampa tlaltikpaktlakamej kimatiskiaj keman monextiskia Jesús, monekia tlachixtoskiaj ijkuak panoskia sekimej tlamantli tlen mochiuaskia itech nochi Tlaltikpak ipan non tonalmej. Tlen panoskia kiteititiskia ke Jehová yokitlali Jesús itech iluikak ken ueyi Tekiua itech Tekiuajkayotl mesiánico, nin tekiuajkayotl kitlajtlamis nochi tlen amo kuali uan kiyektlalis yolseuilis ipan nochi Tlaltikpak. Tlamantli tlen okijto Jesús mochiuaskia, kinextiskia itlamilis nochi tlen onka axkan ipan Tlaltikpak —ika nochi tekiuajkayomej, tlaneltokilismej uan tlaltikpaktlakamej tlen amo kitekichiuilia toTajtsin Dios— uan ipeualis se yankuik Tlaltikpak.

Jesús okijto ke ijkuak peuaskia tlanauatis itech iluikak, ipan nochi Tlaltikpak yetoskia apistli, chikauak tlaloliniskia uan noijki kokolismej. Ayakmo yetoskia tlakaitalis itech tlanauatil. Uan akinmej melauak kichiuaj ken Cristo tetlapouiskiaj ipan nochi Tlaltikpak kuali tlajtolmej itech iTekiuajkayo toTajtsin Dios. Nochi nin tlamantli tlamiskia itech “miek tlajyouilistle iuan temaujti”, tonalmej tlen okachi oui tlen amo keman moita (Mateo 24:21).

¿Uan ken kimatiskiaj akinmej melauak kichiuaj ken Cristo ke non tonal tlen sapanoa temomojti yiualajsitoka? Jesús okinmilui imachtijkauan: “Xikmomakakan kuenta in ejemplo de yen [h]igoskuauitl” (Mateo 24:32). Ijkuak peua kisaj ixijyo higoskuauitl, momati ke tonalmej keman tlatotonia yiualajsitok. Noijki ijkon, keman motaskia mochijtok nochi tlamantli tlen okijto Jesús, momatiskia ke itlamilis nochi tlen onka itech Tlaltikpak yiualajsitok. Jesús okijto ke san toTajtsin Dios kimati tlen tonal uan tlen hora peuaskia miak tlajyouilistli uan temaujti. Ik non, otlanejmachti: “Xiijsatokan [...], porke mach ankimatij kemanian ajsiki yon tonale” (Marcos 13:33).

(Okisak itech Mateo tlakotonaltin 24 uan 25, Marcos tlakotonal 13 uan itech Lucas tlakotonal 21.)

^ párr. 14 Tla tikneki okachi tikmatis itech tlen Jesús okijto panoskia, xiktemo itech tlamachtil 9 itech amochtli ¿Tlen melauak tlamachtia Biblia?, tlen okichijchijkej itlaixpantijkauan Jehová.